Выльдӥськон – ӟеч азьпаллэн инъетэз медло (2 люкет)

Йылпумъянъёс но ужпумъёс

2016-2024 аръёсы Татарстанысь удмуртъёслэн лулчеберетъя йӧскалык автономиенызы кивалтӥз Андрей Герасимов. Выжыезъя соудмурт, вордскемын Удмурт Элькунысь Кез ёросын. Ачиз удмурт кылын уг вераськы ке но, удмурт калык понна трос пайдаё ужъёс лэсьтӥз. Солэн кивалтэмез улсын таӵе проектъёс азинтӥськизы: «Мудорвай», дошкольной дышетонъя вордскем кылъёсын тужгес усто педагог, ёросысь бадӟым классъёсын дышетскисьёсын пумиськонъёс, «Гырон быдтон» удмурт праздник улсын ортчись БиГерд форум, «Чеберина но Батыр», «Шудо-буро удмурт семья» вожвылъяськонъёс, удмурт студентъёсын пумиськонъёс, финн-угор калыкъёслэн «Мы ветви древа одного» фестиваль. Татын ик со Быдэс Россиын ортчись «Чакара» фольклор фестиваль сярысь ивортӥз, Мамадыш ёросысь НКА-зылэн — Сергей Никитинлэн — «Улӟытон» («Возрождение») группаезлэн ужезлы саклык висъяз, военно-патриотической «Туктым» мемориал комплекс сярысь вераз. Ужан вакытаз пӧртэм пумо юрттэт сётэмъёслы но сюлмысь таукарон кылъёсты вуттӥз. Зэмзэ но, туж трос лэсьтӥз Андрей Сергеевич удмурт калыкез азьпала валтон понна. Кызьы со ачиз пусйиз, ас мылкыдэн луыса гинэ бадӟымесь азинсконъёсы вуыны луэ, ӝуась сюлмын ке уж борды кутскиськод, одно ик ваньмыз пӧрмоз. Та понна уждун уг тыро, со ваньмыз ас сюлмысьтыд потэ. 

Кыкетӥез доклад егитъёслэн движенизылы сӥземын вал. Солэн кивалтӥсез — Светлана Зянкулова — 2022-2024 аръёсы лэсьтэм ужъёслы йылпумъянъёс лэсьтӥз. Егитъёсты удмурт лулчеберетэз но кылэз утён, азинтон ужъёсы кыскон — со пӧртэм удысын ужасьёслэн бервыло тыршемзылэн емышез. Ёросъёсысь кивалтӥсьёслэн, удмурт азьветлӥсьёслэн, интыысь ӧнерчиослэн огазе тыршемзы гинэ вордскем кылэз но калык лулчеберетэз утьыны юрттозы. Азьланяз но удмурт егитъёслэн мылкыдзы медаз кысы. 
Дышетон удысысь азинлыко практиосын тодматӥз асьме ёросысь удмуртъёслэн НКА-зылэн кивалтӥсез Ольга Пчельникова. Татын вожвылъяськонъёс, олимпиадаос, конференциос пыр пиналъёсты удмурт кылэн, лулчеберетэн тунсыкъяськытон ужлэсь кулэлыксэ тодмостӥзы. Нимысьтыз телевидение сярысь но кыл потӥз. Лулчеберет удысысь бервыло практикаосын Кукмор ёросысь лулчеберетэз азинтонъя «Удмурт азбар» автономной некоммерческой организацилэн кивалтӥсез, Ошторма-Юмья гурт клублэн заведующиез Ольга Зайцева тодматӥз. Адӟиськиз, кызьы ёросын удмуртъёслэн вашкала киужзылы — куиськонлы — бадӟым саклык висъяське. Озьы ик пӧртэм квалификаци ӝутон ужъёс сярысь ивортодэт чузъяськиз. Пӧртэм амалъёсты пыртыса, Кукмор ёросын лулчеберет удыс яркытгес усьтӥськыны кутскиз.

2025 арын ёросамы туж бадӟым ужрадлэн ортчемез витиське — удмурт лулчеберетлэн «Гырон быдтон» элькун праздникез.

Калыкмылэн яратоно праздникез Ципья черкогуртын 29 инвожое ортчоз шуыса витиське.

Праздникез ортчытон сярысь вераз Балтасьысь исполнительной комитетлэн кивалтӥсезлэн воштӥсез Ильгам Гайнутдинов. Татын пусйиськизы праздниклэн дасяськон этапъёсыз. Оскиськом, элькунэн ёрослы пуктэм осконъёсыз быдэсмозы шуыса.