Йылпумъянъёс лэсьтэмын, ужпумъёс тодмостэмын

Ужрадын ортчем 2021 арлы йылпумъянъёс лэсьтэмын но выль 2022 арын быдэстыны чаклам ужъёсын тодматэмын вал.
Собрание автономилэн ёросъёсысь ёзэтъёсыныз кивалтӥсьёс но муниципал кивалтэтысь муртъёс, Татарстанысь Калыкъёслэн эшъяськон юртсылэн директорез Ирек Шарипов, Татарстанысь Кун Кенешлэн депутатэз Людмила Рыбакова но мукет гажано куноос пыриськизы. Озьы ик нимысьтыз та нуналэ Казане Удмуртиысь кунооос но вуизы, соос пӧлын вал Вань удмуртъёслэн «Удмурт Кенеш» огазеяськонзылэн тӧроез Татьяна Ишматова но. Со сяна, туэ ужрадэз радъясьёс ZOOM платформаез но уже кутӥзы, кудӥз автономиысь вань мылкыд карись ёзчиослы ужрадэ пыриськыны, уж борды итӥськыны луонлык кылдытӥз (мазэ веранэз, коронавирус вӧлмонтэм понна но та пайдаё амал луиз).

Ужрад мынэмъя ёрос ёзэтъёсысь кивалтӥсьёс кылем арын ужамзылы йылпумъянъёс лэсьтӥзы но 2022 арын ужанъя малпанъёссэс веразы. Татарстанысь удмуртъёслэн автономизы но, егитъёслэн ёзэтсы но асьсэлэн ар ӵоже ужамзылы дунъет сётӥзы, 2022 арлы ужанрадлык юнматӥзы. Отчы пыризы кызьы «Гырон быдтон», «БиГерд» но «Мудорвай» кадь сяме пырем ужрадъёсты ортчытон, озьы ик выльёсыз но, кылсярысь, грантъёсъя конкурсъёсы пыриськон но Удмуртиен валче ӵектосъёс (проектъёс) бордын ужан.

Со сяна, ужрадэ пыриськемъёс Татарстанысь удмуртъёслэн огазеяськонзылэн Уставаз пыртэм воштонъёсты, автономилэсь пуссэ (эмблемазэ), автономиен кивалтӥсьёсты но правленилэсь ёзчиоссэ юнматӥзы. Автономилы тӧрое Андрей Герасимовез ик бырйизы, нош быдэсъясь кивалтӥсьлэсь ужзэ выльысь Ольга Чайниковалы оскизы.

Нялтас вераса, туэ удмурт лулчеберетъя «Гырон быдтон» элькун шулдыръяськон но удмурт егитъёслэн «БиГерд» улосвылкуспо форумзы Бавлы ёросын ортчыны кулэ. Та ужрадъёсты радъян но ортчытон сярысь люкаськонын вераз Бавлы ёросысь удмурт огазеяськонлэн тӧроез Наталья Зайдуллина.

Фото: https://addnt.ru/