“Балтач” ял паркында халык бәйрәм итте (+фоторепортаж)

11 июньдә иртәнге сәгатьләрдән үк бистә үзәгендәге "Балтач" ял паркында бәйрәм атмосферасы хакимлек итте.

Районның яшьләр эше һәм спорт бүлеге, "Хыял" яшьләр үзәге, "Факел" яшүсмерләр клубы, мәгариф идарәсе, район социаль яклау бүлеге хезмәткәрләре балалар өчен күңел ачу чаралары, төрле уеннар, бәйгеләр оештырдылар. Мәктәпкәчә яшьтәге кечкенә балалар өчен "Туган як" дип исемләнгән рәсем бәйгесе үтте. Иң җитез, оста һәм тапкыр балалар бүләкләргә ия булды. Мөмкинлеге чикле райондашларыбыз да бу чарадан читтә калмады. Алар бик теләп рәсемнәр бәйгесендә катнаштылар. Үзәк китапханә хезмәткәрләре исә Рәсәй тарихына һәм хәзерге үсешенә бәйле китаплар күргәзмәсе булдырганнар иде. Биредә шулай ук якташ язучы һәм шагыйрьләребез китапларына да игътибар бирелгән.
Бәйрәм уңаеннан район башкарма комитеты җитәкчесе урынбасары Илһам Гайнетдинов балтачлыларны Рәсәй көне белән тәбрикләп, район башлыгы Рамил Нотфуллинның һәм район башкарма комитеты җитәкчесе Рамил Шакировның Котлауларын ирештерде. Илебезгә иминлек, һәрбарчабызга исәнлек-саулык, бәрәкәтле гомер, күтәренке кәеф, уңышлар теләде.

Бәйрәм район мәдәният үзәге хезмәткәрләре, балалар сәнгать мәктәбе укучылары, үзешчән коллективлар тырышлыгы белән әзерләнгән концерт белән дәвам итте. Бәйрәмдә әби-бабаларның оныклары, яшь гаиләләрнең балалары белән килүе үзгә бер ямь өстәде.