Татарстанда «Ел студенты» премиясенә гаризалар кабул итү башланды

Татарстан студентлары ел саен үткәрелә торган «Ел студенты» премиясе өчен көрәшә ала. Гаризалар 25 октябрьгә кадәр кабул ителә. Бу хакта «Татар-информ» мәгълүмат агентлыгында узган матбугат конференциясендә Студентлар лигасы президенты Шамил Якупов хәбәр итте.

Конкурста барлыгы 20 номинация каралган: тугыз шәхси һәм 11 коллектив номинациясе. Җиңүчеләр кыйммәтле бүләкләр алачак. Алар арасында – халыкара стажировка узу мөмкинлеге, партнерлардан акчалата премияләр, ноутбуклар, уку һәм түләүле сәфәрләр бар.

Республикада колледж һәм башка урта һөнәри белем бирү учреждениеләре студентлары өчен 2016 елдан аерым премия — «Ел казанышы» үткәрелә.

Быел оештыручылар шулай ук яңа номинация өстәделәр — «Елның студентлар үзидарәсе остазы». Ул студентлар белән тәрбия эше белән шөгыльләнүче кураторлар өчен билгеләнгән.