Балтачтагы чаңгы трассасы бер минут та буш тормый

Ильнур, 8 гыйнвар 2015 - 15:47

2457

Алдагы көннәрдә үзәк шугалак янында сүлпәнлек дип хәбәр иткән идек. Әллә оештыручылар, әллә инде райондашларыбыз гаебе.

Балтачтагы чаңгы трассасы бер минут та буш тормый

Миңа калса, монда теләк кенә кирәк. Теләге булган кеше ял итәргә чарасын таба. Ә инде ялкаулык көчле һәм диван яки креслодан, телевизор белән компьютердан аерыла алмыйсың икән, ник шунда аю биетмиләр.

Бу нисбәттән чаңгы трассасы бер генә минут та кешесез тормый. Биредә 4 һәм 6 гыйнвар көннәреннән кала ярышлар булмады, Халыкны җыяр өчен махсус чаралар да үтмәде. Әмма аңа карап трассаның буш торганы юк. Үз күзләрем белән күрмәсәм, ышанмас та идем. Көн саен үзем бер чаңгыда шуарга чыгам, саф һава сулап, агачларның сихри шаулавына хозурланып кайтам.

Кеше кушканга түгел, урыслар әйтмешли, для души. Махсус салынган чаңгы юллары булганда ник өйдә ятырга, ди. Инде чаңгы юк дип сәбәп табарга теләгәннәргә киңәшем шул, һич югында урман яныннан бер җәяүләп үтегез яки балачакларны искә алып гаиләгез белән чанада шуыгыз. Кышкы бу матурлык бик тиз узып китә, рәхәт мизгелләрнең кадерен белеп калыйк.

Фото: http://static.panoramio.com/photos/large/65339798.jpg