Норма мәктәбенең үз үсеш ноктасы бар

Тарихы ерак гасырларга тоташкан шахмат уены бүгенге компьютер, гаджетлар дөньясында да популярлыгын югалтмый. Әлеге уенның әһәмияте – балаларнын интеллектуаль сәләтен үстерергә ярдәм итү. Татарстанның беренче Президенты Минтимер Шәймиев хәтта шахматларны мәктәп программасына кертергә дә тәкъдим иткән иде.

Районыбызның Норма мәктәбендә шашка-шахмат уенына аеруча зур игьтибар бирелә. Мәктәп 2019 елда “Точка роста-үсеш ноктасы” гранты отты һәм шул проект кысаларында белем йортында шахмат зонасы булдырылды. Шахмат үткән уку елында 1нче сыйныфларга түгәрәк буларак та кертелә башлады. Шулай ук зуррак сыйныфлар өчен мәктәп базасында спорт мәктәбенең шахмат-шашка түгәрәге эшләп килә.

– Балалар шахмат дәресләрен көтеп алалар, бик теләп уен серләренә өйрәнәләр, мәктәбебезнең шахмат осталары район-районара ярышларда даими катнашып киләләр, призлы урыннар яулыйлар, – ди мәктәп директоры Ләйсән Гатауллина.

Районыбызның башка мәктәпләре дә Норма мәктәбеннән үрнәк алып шахмат спортына игьтибарларын арттырсалар республика күләмендә үткәрелүче ярышларда җиңүчеләребез дә күбрәк булыр иде.