Хезмәт

26 июле Ижкарын удмурт калык тӥрлыклы — кубызлы — сӥзем нырысетӥез фестиваль ортчиз

Фестиваль улсын кык арня ӵоже пӧртэм тодосчиосын кенешонъёс, мастер-классъёс, концертъёс ортчытӥськизы

Кубызэн удмуртъёс вашкала дырысен шудыны яратӥллям. Тужгес но сюанъёсын соин шудыло вылэм. Но, жаляса верано луэ, кубызэн шудыны быгатӥсьёслэн лыдзы арысь аре кулэсме. Таин валче ик Ижкарын кубыз фестиваль но радъязы, кудӥз ортчиз 12-26 июле. Фестиваль радъямын вал вань кадь кубызчиосты огазеян понна но Удмуртиын кубызэн шудонэз азьланьтон вылысь. Асьмеос, Татарстанысь удмуртъёс, али данъяськыны быгатӥськомы — одӥгез данлы, тодмо кубызчи — аспалмы, Улын Ушма гуртысь Михаил Ефимович Романов (трос аръёс ӵоже Казаньын улэ ини) луэ. Михаил Ефимович кубызэн пичи дырысеныз уг люкиськы вылэм ини, Ижкаре мыныкумы но автобусын, яратоно крезьгур тӥрлыксэ поттыса, сюлмысь шудыса кырӟаз. Но таиз ини мукет веран.

Фестивале куно карыса Михаил Ефимовичез сяна Сырья гуртысь «Сырья зоутъёс» ансамблез но ӧтизы. Кузь сюреслэсь но пӧсь куазьлэсь кышкатэк, потӥмы ми — «Сырья зоутъёс» ансамбль, кубызчи Михаил Ефимович, Марина Иванова, Татарстанысь удмуртъёслэн НКА-зылэн исполнительной директорез но мон. Милемыз Ижевск пӧсь куазен гинэ ӧвӧл, пӧсь мылкыдын но пумитаз. Фестивальлэн валтӥсь радъясез, Дарали Лели, куноослы тазьы вазиськиз: «Асьмелы ноку но вунэтыны кулэ ӧвӧл, Татарстанын но, Пермь но Киров улосъёсын но, Удмуртиын но — котькытын — удмуртъёс бадӟым эшлыко диаспора кылдыто шуыса. Шаермылэн пӧртэм улосъёсаз улӥськомы ке но, ог-огмы сярысь котьку но малпаськомы, ог-огмес тодӥськомы но яратӥськомы шуыса вунэтыны кулэ ӧвӧл. Шумпотӥськомы, туннэ ми доры Татарстанысь зэмос кубызчи вуиз шуыса, малы ке шуоно кубыз кылемын именно шошма удмуртъёс дорын, али ке но со отын улэп. Кубызэз крезез кадь ик калыке вуттэммы потэ, мед со сярысь тодозы».

Пыриськизы фестивале бадӟым куноос но. Соос пӧлын Румыниысь, Трансильваниысь, Миклош Дэметэр, озьы ик Удмуртиысь тодмо артистъёс ӝытэз шулдыртӥзы — «Айкай» театрысь но «Эктон корка» студиысь артистъёс, туала электронной но рок стилен музыкаен вырисьёс но мукетъёс. Асьме «Сырья зоутъёс» ансамбльмылэн кивалтӥсез, Леонид Дмитриевич Сапожников, куноослы но вань учкисьёслы вазиськыса вераз:

Ӟечбуресь, гажано эшъёс. Лулысь-сюлмысь ӟечкыласьком тӥледыз кубызмес бурдъясь фестивален. Оскиськомы, кубызмы, данлы бадӟым крезьмы сямен ик, выльысь дорамы бертоз, Балтась но Карлыган удмуртъёс, шошма удмуртъёс доры гинэ ӧвӧл, вань кадь удмуртъёс дорын паськыт вӧлмоз. Туж шумпотӥськомы, ӝытмы мипал гуръёслы, мипал кырӟанъёслы, мипал кубызчиослы сӥземын шуыса. Вашкала выжыосынымы данъяськыса, та фестивалез радъясь Елена Владимировна Петровалы (Дарали Лелилы — Н. Ж.) йыбырттыса тау кылмес вераськомы, озьы ик Миклош Дэметэрлы, солэн семьяезлы. Зарни киё, зарни сюлмо кубыз лэсьтӥсьёслы, кубызэн шудӥсьёслы, Культурая но туризмъя министерстволы но ваньзылы та ӝытэз радъясьёслы но учкисьёслы ваньзылы тау кареммы потэ.

Культурая но туризмъя министрлэн воштӥсез, Пётр Павлович Данилов но, фестивале пыриськиз. Сценаын ӟечкылан кылъёс верам сяна, со мызган но кубыз гуръёс улсын шулдыръяськиз, Балтась куноосты матын карыса, соосын огазе ӝытсэ ортчытӥз.  

— Туннэ асьме понна бадӟым праздник усьтӥське. Удмурт калыклэн, Балтась удмуртъёслэн туннэ нуналлы улонэ кылем кубыз крезьгур тӥрлыкез улонэ пыӵа. Туннэ бадӟым инты, саклык висъяське та крезьгур тӥрлыклы, солэн даныз вӧлме удмурт калык пӧлын, солэн чеберлыкез вӧлмиз ке мукет калыкъёс азьын но... Туннэ та люкаськем ӝыт шара возьматэ, макем чебер крезьгур тӥрлык вань удмурт калыклэн шуыса. Сюлмысь тау вераме потэ туннэ асьме доры лыктэм куномылы Михаил Ефимович Романовлы, малы ке шуоно вань кубызчиос пӧлысь нырысетӥез но берпуметӥез кубызчи, азьло даурен туннэ нуналэз герӟась адями луэ Михаил Ефимович. Тау кылъёсты вераме потэ солы. Кема улон, ӟеч мылкыд, тазалык, мылкыдды кубызэн шудыны даурды ӵоже мед луоз, Михаил Ефимович!

Удмурт Республикаысь культура но туризмъя министерстволэн нимыныз та фестивале пыриськисьёслы, куное лыктэмъёслы но учкисьёслы но тау шуэме потэ. Туж бадӟым инты висъяське удмурт калык инструментлы, кубызлы, кудӥз вашкала дырысен возиськыса кылиз но Татарстанысь Балтась, шошма удмуртъёслэн лулчеберет улоназы тужгес яратоно но гажано крезьгур тӥрлыксы луыса кылиз. Туннэ нуналэ но та крезьгур инструментэз удмурт калык гажа, — пусйиз Пётр Павлович.

Туж шуныт пумитазы Удмуртиын Татарстанысь удмуртъёсты. Марина Иванова Бигерысь удмуртъёслэсь пӧсь салам гинэ вераз, но сое соку ик кужмо кичабонъёсын но шуланъёсын пумитазы. Татарстанысь удмуртъёслэн НКА-зылэн исполнительной директорез пусйиз, фестиваль кылдэм понна нырысь ик Дарали Лелилы бадӟым тау вераны кулэ шуыса. Кубыз фестиваль радъяны кулэ шуыса малпанэз кемалась вань вылэм ни, но малпанэн гинэ уг луы ведь — кулэ луонлыкъёс. Луонлыкъёсты кылдытэмзы понна Марина Анатольевна тау карон кылъёссэ вуттӥз Удмуртиысь Культурая но туризмъя министерстволы. «Соос ӧз ке юрттэ, таӵе фестиваль ӧй радъяськысал. Огдыре шекан кылдэм вал, крезь быре шуыса. Нош али со улэ, сое ярато. Милям кубызмы но озьы ик улӟоз шуыса малпаме потэ. Та фестиваль туэ нырысьсэ ортче, вуоно аре но, азьпалан но со мед ортчоз. Туж бадӟым тау куное ӧтемды понна», — шуиз со.

Тау карон кылъёсты милям делегациысь нокин но вератэк ӧз кыльы, дыр, та нуналэ. Пумитазы, куно каризы, сюдӥзы-вордӥзы, кошкыкумы нош, уйин, делегацимес автобусмы доры лыктыса ик, шуныт кылъёс вераса келязы. Та понна пӧсь куазен, пичи автобусын вить час гинэ но ӧвӧл, дас час но мыныны соглаш луод. Тау бадӟым, Кубыз фестиваль! Тау бадӟым, Ижкар!

 

 

Нравится
Поделиться:
Реклама
Комментарии (0)
Осталось символов: