Александр Ефремов дорын куноын

Ефремовъёслэн капка бордазы кык горд кизили юнматэмын. Статьялэн героез доры лыктыса вуэмен валче, соос синме йӧтӥзы. Со кизилиос валэкто, та юртысь кык адями оже кошкем шуыса. Соосты учкыса сылыкум, Александр Алексеевич ураме потыса вуиз:

— Гондыргуртысь воргоронъёс но вормонэз матэктон понна трос кужымзэс сётӥзы. Соос пӧлын вал мынам атае Алексей но ӵужмуртэ Валентин. Капкаысьтымы кизилиос соослы шуыса юнматэмын.

Александр агай трос аръёс ӵоже Ижкарын улэм ке но, Гондыргуртын сое калык тодэ но гажа. Татын ортчем солэн пичи но егит дырыз, пересьмон даурзэ но со татын пумита. Соин гажамон пиосмуртэн матысенгес тодматскыны вуимы.  

Ефремовъёс гуртын гажамон семья луиллям

— Мон 1942-тӥ арын 19 южтолэзе татын, Гондыргуртын, вордски. Анае, Татьяна Прокопьевна, 1905-тӥ арын Ярак-Чурма гуртын Копейёслэн семьяязы вордскемын. Со татчы атайлы картлы бызем. Атай, Алексей Андреевич, 1910-тӥ арын вордскем. Анай-атай куспазы тупаса улӥллям, вить нылпизы вордскем. Мон самой покчиез, витетӥез, луисько, — асэныз тодматыны кутске Александр Алексеевич.

Атаез жугиськонэ кошкыку (сое 1941-тӥ арлэн пумаз оже басьтӥллям), Александр вордскымтэ на. Пиезлэсь вордскемзэ Алексей Андреевич кузпалэзлэн гожтэтысьтыз гинэ тодэм. Со гожтэт берпуметӥез луэм ини…

1943-тӥ арын Алексей Ефремов ивортэк ыше. Вить нылпиоссэ кузпалэзлы огназ пыд йылазы султытыны тупа.

 — Жугиськон дыръя луэмзэ веранэз ӧвӧл. Пот турынлэсь нянь пыжыса сиимы, сисьмем барангиез но ческыт карыса сиимы ведь… Али жугиськон бырем бере но улонэз нокинлэн капчи ӧй вал. Малпаса утьы: тросаз семьяосысь воргоронъёс ожысь ӧз ни берытске, вань ужъёсты нылкышноослы но нылпиослы, мӧйыослы быдэсъяны тупаз. Колхозэз но ӝутоно. Милям семьямы куанер ӧз улы, мазэ ватонэз. Но со шоры учкытэк, ваньзы ужасесь луиллям. Анае, кылсярысь, пичи дыръям монэ тыбыраз ошыса ужаны ветлэ вал (жугиськон дыръя со Соснаын ужаз). Атае туж усто столяр луэм. Андрей бабае но визьмо, ужась пиосмурт луэм. Со мушъёсты вордэм, 100 умортоез луэм солэн! 30-тӥ аръёсы, коллективизация дыръя, умортоосыз колхозлы выжиллям. Ыжгон тугон машинаез но луэм, сое но колхоз асэстэм… Нош семьяме ӧжыт гинэ раскулачить карыса Сибире келямтэзы…

Санька агай (пиосмурт солы озьы вазьыны лэзиз) ӵыжы-выжыосызлэн улонэз сярысь трос вераз но ваньзэ пыр-поч мадиз. Сомында тодэмезлы паймемме адӟыса, со шуиз: «Мыным ваньмыз сярысь анае вералляз, соин тодӥсько мон ӵыжы-выжыосы сярысь. Ачим сярысь но куинь аресысен кутскыса ваньзэ вераны быгатӥсько, ваньмыз йырам кылемын… Гуртмы соку пичи ӧй вал. 70-лэсь трос юрт вал. Ини берлогес Читае, Амур улосэ улыны кошкизы, улон секыт луэмысь. Библиотекамы вал, тӥни отын магазин сылӥз (Санька агаен урамын вераськимы бере, со возьматӥз, кытын но мар гуртазы интыяськемын вал), сопалан, шур дурын, дуриськон куала (кузница) сылӥз; озьы ик отын вал ыжгон тугон машина, кудзэ милесьтым басьтыса шур дуре интыязы. Общественной мунчо но вань вал шур дурын, отчы кулэ карись мурт мунчое пырыны ветлӥз».

Гондыргуртын покчиёзо школазы но луэм. Санька агай ньыль ар ӵоже отын дышетскем, собере Покчи Лӧзяысь школаын 8-тӥ классозь тодон-валан басьтэм, нош 11-тӥ классэ Балтасьын йылпумъям ини.

— Гуртын соку нылпиос ӧжыт ӧй вал бере, гуртмы но, школа но гурлаз. Туж йӧно дышетӥсь, Борисова Мария Ивановна, дышетӥз милемыз. Покчи Лӧзяын дышетскемме но тодам возисько. Сюрес вылын ветлыку гинэ но кыӵе учыръёс ӧз луылэ. Пӧсен но кезьытэн, зорен но шундыен ветлӥмы. 8-тӥ классозь Покчи Лӧзяын дышетски бере, удмурт кылын ортчо вал урокъёсмы. Соин Балтасе дышетскыны выжеме бере, секыт йӧтӥз ӟуч кылын дышетскон. Химиез туж яратыса дышетски.

«Терешковаез космосэ келяй»

1961-тӥ арын тулыс школазэ йылпумъяз ке, толалтэяз Александр арми радъёсы басьтӥськиз ини. Служить карем автомобильной войскоын куинь ар ӵоже.

— Армие мон ачим куриськи. Азьло ведь армиын служить карисьтэмъёсты, службалэсь пегӟисьёсты, огъя армие мынӥсьтэмъёсты «третий сорт» шуо вал. Мынам сыӵе луэме ӧз поты (серекъя). Служить кари Байконурын. 1963-тӥ арын Терешковаез космосэ келяй.

— Зэмзэ-а? — юасько оскытэк.

— Зэмзэ но. Со вал гужем. Космосэ лобӟон дыраз, жаляса верано, мон сюрес вылын машинаын вал. Солдатъёсты поликлиникае нуисько вал. Терешковалэсь лобӟемзэ укнотӥ адӟыса, киын шонай. Озьы бере, келяй луэ ини (серекъя).

«Электрик луыса ужаны туж кельшиз»

Армиысь Александр Алексеевич 1964-тӥ арын бертэ. Но вордскем палъёсаз ӧвӧл, Коми республикае ужаны кошке. Дежурной слесарь луыса ужаны интыяське. Одӥг ар ӵоже ужаса, Ижевске улыны лыктэ, отчы сое Анатолий агаез ӧте. Ижевскын пӧртэм интыужъёсын ассэ уте Александр Алексеевич: пуэн ужанъя цехын плотник но луэ (огвакытэ ДОСААФ-ын радиотелемастерлы дышетскыса, сое отличиен йылпумъя), телеательеын телевизоръёсты но ремонт каре, автозаводын станокъёсъя электрик луыса но тырше, ужаса уте «Ижмашын» но электрик луыса.

— Пӧртэм интыын ужаса ути ке но, аслым тужгес электрик луыса ужаны кельшиз. Уг тодӥськы малы, сюлмам кельше вал со уж. 62 аресэн пенсие потэм бере одӥг ар шутэтскыса но, нош ужаны кутски Ижевскын электрик луыса. Шумпотыса вераны быгатӥсько: монэ отчы умой ужамысьтым нош ик ужаны ӧтизы. 70 аресозь ужало ни шуыса малпаськем вал но, ӧз пӧрмы, тазалыке ӧз тырмы.

Ижкарын улыкуз, Александр Алексеевич Любовь нимо кышномуртэн семья кылдытэ. Но, жаляса верано, кузпалъёс люкисько. Александр агайлэн кык нылъёсыз вань — Инесса но Лариса. Кыкназы ик соос Удмуртиын ас семьяосынызы уло. Туннэ нуналэ воргоронлэн внукъёсыз но вань ини. 2010-тӥ арын Санька агай вордскем палъёсаз, Гондыргуртэ бертэ. Татын уго солэн кык апайёсыз уло — Александра но Ольга.

— Гуртэ бертыны Шура апае ӵектӥз. Апайёслы кыкназылы секыт вал татын улыны. Ижкарын улыкум но арлы быдэ сентябрь толэзе бертыны тырши — бакча ужъёсты ужаны кулэ шуыса. Аръёс ортчо, нош уж гуртын уг кулэсмы. Соин малпай но гуртэ бертӥ. 2010-тӥ арысен куиньнамы тупаса, ог-огмылы юрттыса улӥськомы.

«Вить пол кулэмлэсь кыли»

Туннэ нуналэ Александр Алексеевичлэн улонэзлы ӝожтӥськыны мугез ӧвӧл.

— Мон асме шудтэм адями шуыны уг быгатӥськы. Вить пол кулонлэсь кыли ини мон. Одӥг пол вуэ пичи гинэ ӧй выйы, мукет ползэ толалтэ буранэн нюлэскын йыроми… Соку монэ быдэс гуртэн утчазы. Шеди, Инмарлы тау. Соин мон тазьы верасал: Инмар кӧня сётоз, сомында улод.

Александр агайлэн Анатолий агаез но Марфа апаез туннэ нуналэ кулэмын ини.  Соин пересьмон даурзэс Ефремовъёс валче пумитало. Гурт калыкен тупаса, огъя кыл шедьтыса уло соос Гондыргуртын.