Андрей Герасимов: «Ми востэм, кылкутӥсь калык»

Татарстан Республикаысь удмуртъёслэн национально-культурной автономизылэн кивалтӥсез Андрей Герасимов котькуд кутсконын адӟем карымон луыку гинэ азьпал мыныны луэ шуыса вера. Со автономиен 2016 арысен кивалтэ. Соин ми удмурт калыклэн улэмез-вылэмез, вуонолы малпанъёсыз сярысь вераськимы.

— Кыӵе соос, Татарстанын улӥсь удмуртъёс, Андрей Сергеевич?

— Удмуртъёс — ужез яратӥсь, востэм, кылкутӥсь калык. Ми семья дунлыкъёсты утиськом. Гуртъёсын та тужгес но шӧдӥське. Сям-йылолъёс, лулчеберет выжыысь выжые мед сётӥськоз шуыса но сюлмаськиськом. Огшоры луон сяммы но вань. Мукет адямиосын сакесь. Соин сэрен милемыз оскытыны секыт шуыса верасал. Но удмуртъёс ноку уз султэ адямиез вузан сюрес вылэ. Мукет калыкъёсын ми эшъяськиськом. Ӟучсэ но, бигерзэ но, валамон гинэ ӧвӧл, вераськымон уровенен тодӥськом! Гуртъёсын та юнгес шӧдӥське.

— Ватонэз ӧвӧл, вакытэз сыӵе: глобализациен, туала сямъёслы тупатӥськемен но мукетэныз сэрен сям-йылолъёс, лулчеберет сярысь вунэтӥськом. Та ласянь удмуртъёслэн югдурзы кыӵе? Егитъёслы сыӵе макеос тунсыко но ӧвӧл кадь ук.

— Удмурт егитъёслэн примерзы вылын мукетсэ адӟисько. Кылсярысь, туж чурыт кариськыса, мукет удмуртъёсын удмурт кылын гинэ вераськись егитъёс вань. Соос трос ӧвӧл, но вань. Лулчеберетэз ке верано, выжыысь выжые семья дунлыкъёсты выжтыны мылкыд карись егитъёс но ӧвӧл шуыса вераны уг луы. Советской дыръёсы ас кылыныд вераськыны возьыт потылӥз кадь. Но али йӧскалык политикалэн мукет сюресъя азинскемез шӧдӥське. Ас кылыныд, вордскем кылыныд вераськон — со «модно», со — данъяськон. Кужмысь карон ӧвӧл, актуальной карон но валэктон уж кулэ. Егитъёслэсь кылэз дышетыны кыстӥськемзэс мон адӟисько. Туэ ортчиз финн-угор калыкъёслэн форумзы. Мон нимысьтыз егитъёслэн секциязы гожтӥськи. Пайми! Егит поколение ас кылзэ, лулчеберетсэ популяризировать каронэн герӟаськем туж уно но тунсыко проектъёсты ӵектӥз. Сыӵе адямиосты одӥг интые люканы гинэ кулэ ук. Туж умой, кунмы но со понна луонлыкъёс кылдытэ шуыса. Павел Александров (Shoner Paul — Ред.) егит удмурт пимес тодӥськоды, дыр. «Пичи калыкъёслэн Евровидениязы» пыриськиз со, куинетӥ инты басьтӥз. «Закария» группа но тодмо, дыр. Та ведь — егитъёс. Ӵапак соос ведь — вуоно улон. Кызьы верай ини, луонлыкъёс ке кылдытӥд, егитъёс асьсэос кыстӥсько. Соослы та тунсыко ӧвӧл шуыса вераны шонер уз луы.

— 2021 аре — Анай кылъёслэн но калык огазеяськонлэн араз – кыӵе планъёсын пыриды? Огазеяськондылэн таин валче ужамез сярысь но тодэм потэ.

— Милям автономимылэн арысь аре выжись кӧня ке валтӥсь ужпумъёсыз вань. Вань ужрадъёс ӵапак соосын герӟаськемын. Талы ватсам валтӥсь ужпум — ас кылзэс, историзэс, лулчеберетсэс тодӥсь адямиослэсь лыдзэс будэтон но мукет калыкъёсын эшлыко улыны луонлыкъёс кылдытон.

Ужпумъёсмы пӧлы ас калыкысьтымы адямиослэн пӧртэм сӥосыз (слойёсыз) пыро. Нырысетӥез — нылпи садэ ветлӥсь но покчи классъёсын дышетскись пиналъёслы анай кыллы яратонэз пыӵатон, анай-атайёслэсь тунсыкъяськонзэс будэтон. Со понна, Татарстанысь Дышетонъя но наукая министерстволэн юрттэменыз, республика масштабен «Мудорвай» конкурсэз радъяськом. Со удмурт лулчеберетэн тунсыкъяськись дошкольной аресэн но покчи классъёсын дышетскись нылпиос пӧлын ортчытӥське. Та конкурсэз кутскыкумы, пыриськисьёслэн лыдзы 340 вал, нош али ини 800-лэсь трос луимы. Вераны кулэ: мукет калыкысь представительёс но пыриськыны мылкыдзэс верало! Мукет адямиослэн но милям лулчеберетэнымы тунсыкъяськемзы — шумпоттӥсь югдур!

Нылпи садъёсысь визьнодасьёс понна конкурсмы вань. Татын ини визьнодасьёслэсь удмурт кылын кыӵе методикаез уже кутыса дышетэмзэс, опытсэс учкиськом.

Кыкетӥез ужпуммы — шор но бадӟым классъёсын дышетскисьёслы ас кылзылы, лулчеберетсылы яратон пыӵатон, тунсыкъяськон мылкыдзэс улӟытон. Татын Кукмор но Балтась ёросъёсты пусъеме потэ. Арлы быдэ научно-практической конференциез радъяло. Та — нылпиослэн но педагогъёслэн опытэз вуттон, малпанъёсын вошъяськон площадказы. Удмуртиысь, Башкортостанысь дышетӥсьёсты ӧтиськом. Предметъёсъя олимпиадаос ортчем бере, вормем нылпиосын пумиськыны, вераськыны тыршиськом.

Куинетӥез ужпум — кыллы но лулчеберетлы яратонэз, тунсыкъяськонэз студентъёс но ужась егитъёс пӧлын пыӵатон, вӧлмытон. Арлы быдэ «БиГерд» форумез радъяськом. Со Гырон быдтон праздникен валче ортче. Егитъёслы пӧртэм тематикаен площадкаосты ӵектӥськом. Та — соослэн пумиськон, вераськон интызы. Арлы быдэ сентябрь-октябрь толэзьёсы городэ лыктэм удмурт егитъёсын пумиськылыны тыршиськом. Соослы город улонлы дышыны юрттӥськом. Со дыре ик выжыоссэс но медаз вунэтэ вал шуыса вераськом.

Ньылетӥез ужпум — удмуртъёсты фестиваль-конкурсъёсы уноен пыриськыны кыскон. Татын ини тросгес бадӟымъёсын, фольклор коллективъёсын ужаськом.

Витетӥ ужпуме кунэн, муниципал кивалтонэн, организациосын, бизнесэн ужан пыре: пӧртэм форумъёсы, съездъёсы пыриськон, муниципал кивалтӥсьёслэн пыриськеменызы ортчись интыосысь автономиослэн представительёсынызы пумиськонъёс. Кыӵе ке но юанъёс ке кылдо, ӵошен радъяны тыршиськом.

Куатетӥез ужпум — интыосысь национально-культурной автономиослэсь ужзэс радъян. Толэзяз кӧня ке пол ZOOM пыр пумиськылӥськом. Арлы огпол гинэ люкаськыса, уж ӧй мынысал.

Сизьыметӥез ужпум — информациез вӧлмытон. Со — лэсьтэм ужъёсмес калыклы возьматон. Социальной вотэсъёсын, интернетэн мыло-кыдо пайдаяськиськом. Та озьы ик кусып возён амал но луэ.

«Ватаным Татарстан» газетысь.

Удмурт кылэ берыктӥз Екатерина Салтыкова