Аспӧртэмлыко гурт

Татын улӥсьёс христиан осконэ пырымтэ, азьло трос инмаръёслы вӧсяськыса улэмлэсь кылем вашкала сям-йылолъёсты утьыны тыршо.

Дауркыл верамъя, гуртлы инъет XVIII дауре Удмуртиысь Покчи Бӧдьяысь но Пичи Пургаысь адямиос понӥллям. 1775 аръёс котыр Багыш (Пичи Пургаысь Юртай нимо воргоронлэн пиез), кужмысь черке пыртэмлэсь пегӟыса, ӵыжы-выжыосыныз но эшъёсыныз Варклед шур дурын гуртлы инъет понэм. Гуртэз, та шурлэсь но воршуд выжызылэсь нимъёссэс ватсаса, Варклед-Бодья шуыны кутско. Та гуртын али но языческой сямъёсты утё. Озьы ке но куд-ог йылолъёс вунэмын ини.

Кылсярысь, азьло бызем кышномуртъёс йыркышет нуллӥллям, песянайёс йырзэс пелькышетэн пытсаллям, егитъёс йырсизэс айшон улэ ватылӥллям. Пукон вылэ пуксемзылэсь азьло юртлэн кузёосыз отчы пичи гинэ азвесь коньдон шуккылӥллям. Та ачиз аспӧртэмлыко курбон сётон луэм.

Мазэ веранэз, калык дӥсьёс туннэ нуналозь утиськемын. Сое праздникъёсы дӥсяло. Ортчемзэ но гурт уг вунэты. Паймымон, татын гуртлы инъет понэм Юртайлэн выжыысьтыз дасэтӥ поколениез улэ вылэм ини.

Гуртын ужез яратӥсь но творческой калык улэ. Сям-йылолъёсты, фольклорез утён ужпумен татын «Бодья кенакъёс» коллектив но кылдэ. 2018 арын со калык кырӟанъя «Инвис» ансамбль луэ. Коллективен Наталья Матвеева кивалтэ. Варклед-Бодья калыклэн сямызлы тупаса, Наталья но Виктор Матвеевъёс но, «ужез секыт луиз ке но, емышез ческыт луэ» шуыса уло. Та семья сценалэн но, гуртлэн но чеберез луэ. Асьсэос кырӟаса но эктыса, удмурт калыклэсь чебер сямъёссэ утьыса но соосты вуоно поколенилы сётыса уло соос. Та паймымон но ӧвӧл. Наталья трос аръёс ӵоже Варклед-Бодья клубен кивалтэ. «Арлэн нылкышноез» элькун вожвылъяськонын ворме, со удмуртъёслэн Агрыз ёросысь национально-культурной огазеяськонзылэн председателез луэ. Ёросысь электротыл сётон удысын ужась Виктор кузпалыз но куке но клубен кивалтэм. Али со — лулчеберет центрын ортчись ужрадъёсын Натальялэн бур киыз.

Тӥни озьы, ӵошен гуртэз но улӟытыса уло, улонзэс но уноезлы адӟем карымон нуо.

— Гидамы тямыс скал, вить кунян, ыжъёс вань. Нош курегез, ӟазегез, ӵӧжез лыдъяса ик ум улӥське, — серекъя кузё кышно.

Кык ар талэсь азьло Матвеевъёс мини-ферма лэсьтон понна республика программае пыриськиллям. Кунлэн юрттэменыз гидзэс радэ пыртӥллям. Сиён понон, ву люктан интыос лэсьтӥллям, кыед поттыны транспортёр радъяллям.

Нуналлы быдэ йӧл люкасьлы 40 литрлэсь трос йӧл сёто. Кылемезлэсь усто кузё кышно кузятэм, йӧлвыл, катык, вӧй лэсьтэ.

— Скалъёсмы бадӟым семьямес но, гуртоосмес но сюдо, — шуэ Наталья.

Гужемез пудо понна толлы тырмымон пудо сиён дасяса ортчыто. Та ужын валтӥсь юрттӥсьёссы — нылпиоссы но ӵыжы-выжыоссы. Казаньын Калыкъёслэн эшъяськон юртазы ужась бадӟымез нылзы Марина шутэтсконзэ гуртын трос уж луон дыръя басьтыны тырше. Школаын дышетскись Аделина но пудо котырын ветлыны яратэ. Ижевскысь техникумын тодон-валан басьтӥсь Станислав пизы но шутэтскон нуналъёсы гуртаз бертэ. Диплом басьтыса, Станислав анай-атаез вӧзы бертоз но соослэсь ужзэс азинтоз шуыса, оскон бадӟым. Наталья но Виктор Матвеевъёслэн асьсэлэн но мылкыдзы сыӵе. «Пимылы, вордскем юртаз интыяськыса, милесьтым ужмес азинтыны мед кылдоз», — шуо соос.

Та гуртын, вашкала йылолъёсты тодэм сяна, соосты быдэсъяло но али. Соослэн одӥгез — егит пиосты зэмос воргоронэ кутон сям. Со йылол Эрукарон шуыса нимаське. Со нуналэ пиос, вазь ӵукна султыса, дэра айшет дӥсяло но, коркась корка ветлыса, сиён-юон люкало. Люкам кеньырлэсь, вӧйлэсь, курегпузлэсь но сӥльлэсь вӧсьрадэз ортчытон луд вылын интыям пуртыосын ӝук пӧзьто. Маиз тунсыко: та празднике куноос но, нылкышноос но пыриськыны уг быгато.

Йылолэз ортчытӥсьёс узыр урожай, гуртлы но отын улӥсь калыклы каньыллык, шудбур куро. Собере вань люкаськем воргоронъёс ӝук сиё. Праздник пумын возь вылын лэсьтэм тылыс ӝуатӥське, гурт урамъёстӥ ортчыку, сера пуштытӥське. Калык оске, озьы карыку, албастыос пегӟыса кошко шуыса. Доразы адямиос сусыпу ӝуато. Егит нылъёслэн но талы тупась йылолзы вань. Соиз Быдӟым Нунал шуыса нимаське.  Пельняньлэн нуналэз но татын туж шулдыр ортче. Туэ туж быгатыса та гурт республиканской Гырон быдтон праздникез но радъяз.

«Ватаным Татарстан» газетысь берыктӥз Екатерина Салтыкова