Атае – матысь эше

Мынам атае Терентьев Пётр Александрович. Со лэсьтӥськон удысын ужа. Мон атайме туж юн яратӥсько. Со милемыз яратэ но котьку валаны тырше. 
Гужем ми атаеным плотинае чорыганы ветлӥськом. Толалтэ ми соин ӵош азбарысь лымыез сузяськом. Лякыт, востэм сямыз понна сое данъяськом. Со милесьтым анаймес, Людмила Викторовнаез, яратэ но гажа. Нокинлэн атаез мынамез кадь мусо ӧвӧл. 
Терентьев Тимофей, 3 класс

Мынам вераме потэ аслам атае сярысь. Нимыз солэн Вячеслав. Атае мынам ужа полициын, аслэсьтыз ужзэ яратэ. Со визьмо, усто, кужмо, ӟеч сюлэмо адями. Мон соин дорысь ужъёсты карисько, лымы октӥсько, гужем чорыганы ветлӥсько. Тужгес но яратэ со пӧйшуранэз. Мон туж яратӥсько аслэсьтым атайме. 
Григорьев Дмитрий, 3 класс

Мынам атаелэн нимыз Женя. Солы 41 арес. 
Мынам атае — туж умой адями. Со туж ужась. Монэ но со ужаны дышетэ. Мон атаелы гужем кутьы возьманы, турын дасяны юрттӥсько, толалтэ ми ӵош лымы поттӥськом. 
Атае — мынам матысь эше. Гужем ми ӵош походэ, чорыганы ветлӥськом, толалтэ катокын хоккей шудӥськом, бассейнэ уяны ветлӥськом.
Атай монэ но апайме туж яратэ. Ми но сое туж яратӥськом. Бадӟым будӥ ке, мон но атае кадь луо. 
Плотников Роман, 3 класс

Мынам атаелэн нимыз Иван. Солы куамын тямыс арес. Со лапег мугоро, курень синмо, сьӧд йырсиё. Со ужа тракторист луыса. Ужез кельше. Гужем лумбыт бусыын тырше. 
Мынам анаелэн нимыз Наташа. Соос 13 ар ӵош уло ни. Будэто куинь нылпи.
Кузьмина София, 3 класс

Мынам атайлэн нимыз Витя. Со вордскиз Улын Ушма гуртын 1974-тӥ арын, 21-тӥ шуркынмонэ солы 50 арес тырмиз. Витя ним возьматэ адямилэсь вормись но кужмо луэмзэ. Нимыз атаелы туж тупа, со сыӵе ик тыршись, вормись но кужмо адями. Мынам атае пудо-животъёсты яратэ, соин ик пудо трос вордэ. Милям гидамы вань парсьпиос, кунянъёс но скалъёс. Венера кушемнимо валмы но вань. Вазь ӵукна султыса атаймы соосты сюдыны потэ. Скалъёсыз анае кыске, собере атай йӧлзэ йӧл-вӧй комбинатэ нуэ, отын солы коньдон тӧляло. Вань дыръяз парсьпиос но вуза. Мынам атае визьмо но каньыл мылкыдо. Мон мое туж яратӥсько. Атае ноку но медаз висьы, котьку пинал но чебер мед луоз, мон но со кадь ик луыны тыршо.
Параманов Павел, 3 класс

Атай — семьялэн йырыз. Йыр — со кылкутӥсь, кыл кутэ котьма понна, нимысьтыз семья понна. Со визьмо, кужмо, ӝужыт но туж чебер. Атай монэ но анаез туж кужмо яратэ. 
Атайлэн нимыз Женя. Со шофёр луыса колхозын ужа. Атай котьмар карыны усто. Со яратэ чорыганы но пӧйшураны. Трос чорыг кутыса вае. Со чорыген анай шыд пӧзьтэ. Шутэтскон нуналаз ми вань семьяен мынӥськом парке. Атай милемлы анаен ческыт вата басьтэ. 
Атай котьку милемлы юрттэ. Анае но вера: «Атайлэн киыз зарни, сюлмыз яратӥсь». Ми анаен туж атаез яратӥськом.
Егорова Анастасия, 3 класс

Мынам атаелэн нимыз Сергей. Мон яратӥсько соин футболэн шудыны. Милемыз со спортэз гажаны дышетэ. Али дыре атаймы Атаймузъеммес возьма (СВО-ын). Мон туж мӧзмисько солэсь. Ӝоген мед быроз ини каргам ожмаськон. Ваньмы шудо уломы.
Волкова Валерия, 3 класс 

Мынам атаелэн нимыз Алексей. Атай — со семьялэн йырыз. Со кылкутӥсь адями. Атае мынам визьмо, чебер. Ми соин яратӥськом шудыны. Ваньмон дыръёсы пуныен, кучапиенымы ӵош нюлэскы калгыны ветлӥськом, со пуныосты туж яратэ, малы ке шуоно пуны — адямилэн зэмос эшез. Атае монэ куасэн ветлыны дышетӥз. Чечен ожъёс мыныку, атае армиын служить кариз, кунгожмес возьмаз пограничник луыса. Али атае монтажник луыса тырше, бадӟымесь юртъёсты лэсьтэ. Солэн киыз зарни. Анаеным ми атаймес туж яратӥськом, соин данъяськиськом. 
Сидоров Тимофей, 4 класс

Мынам атаелэн нимыз Сергей. Со ужа сварщик луыса. Атае мукет киужлы но усто: туж чебер кырӟа, арганэн шудэ, ческыт пӧраське. Солэсь пӧрам сиёнзэ шӧмъяд ке, кылдэ ньылод! Ми соин ӵошен пельнянь, пуртыпирог (вареники) кутӥськом. Толалтэ вуиз ке, лымы сузяськом, гужем яратоно пуныенымы ӵош вуэ пыласькыны ветлӥськом. Атае ужез яратыны дышетэ. Мон туж яратӥсько но данъяськисько соин. 
Гладышев Прохор, 4 класс

Мынам атае Петров Родион Валентинович. Солы 60 арес. Атае Музъем вылысь самой кужмо но лякыт адями. Монэ атае турникын кыдатэ. Мон сое туж яратӥсько.
Гужем вуиз ке, ми ӵошен чорыганы ветлӥськом. Та ужлы со монэ нимысьтыз дышетӥз. Тунсыко чорыган амалъёслы тодэмысь, милемлы бадӟымесь чорыгъёс шедё.
Али дыре атае МЧС-ын ужа, шудтэм учыре шедемъёслы юрттэ. Егитгес дыръяз лётчик луэм. Тини сыӵе мынам атае. Азьланяз мон но со кадь луыны тыршо. 
Петров Егор, 4 класс

Атае мынам Фёдоров Виталий Валентинович. Школаез бере со Елабугаысь культурая училищеез йылпумъям. Со трос музыкальной инструментъёсын шудыны быгатэ: баянэн, пианиноен, балалайкаен, контрабасэн.
Али дыре «Сурнай» эштосын ужа, со дыре ик Ӟаны культурая юртын хормейстер луыса тырше (баянэн шудэ).
Атае ужез туж яратэ, дорамы трос пудо вордӥськом, ми но солы быгатэммыя юрттӥськом. Дырыз луыкуз, милемыз шулдыртэ, пӧртэм шудон интыосы ветлытэ. Атае лякыт сямо. Ми сярысь со котьку сюлмаське, милемыз яратэ. Мон сое туж юн яратӥсько. 
Фёдоров Артём, 4 класс

Мынам атае Шишкин Алексей Геннадиевич. Со котькуд ласянь адӟем карымон атай. Толалтэ ми соин ӵош куасэн нискыласьком, конькиен ветлӥськом. Ноку уг вунэтӥськы, кызьы ми Киров улосысь Вятские Поляны каре мотоциклэн ӵошатсконъёсты учкыны ветлӥм. Сомында яркыт мылкыдъёс басьтӥм!? Арлэн котькуд дыраз ми атаеным ӵошен: гужем вуын пыласькиськом, чорыгаськом, кезьыт тол жытъёсы шахматэн шудӥськом. Атае мон понна — зэмос воргорон. 
Шишкин Артём, 4 класс

Яратоно, мусо атаймы! Вань сюлмысь ӟечкыласьком тонэ 23 тулыспалэн. Сӥзиськом тыныд шудбур, тазалык. Улонэд котьку сяськаяськыса мед улоз! Сюлэмад яратон но шуныт тылсиос мед пиштозы.
Тынад яратоно нылпиосыд 
Мирослав но Милана Никифоровъёс, 4 класс

Мынам атаелэн нимыз Вячеслав (Славик). Солы 32 арес. Ужа со Высокая Гораысь «Элита» нимо эштосын шофер луыса. Татын со кивалтӥсьсэс нуллэ. Соин ик атаелы котьку сюрес вылын ветлон тупа. Ужез солэсь сюрес вылын сак луэмзэ кулэ каре. Атае мыным ваньмон дыръяз урокъёслы дасяськыны юрттэ. Шутэтскон нуналъёсты ми котьку ӵошен ортчытӥськом: толалтэ лымы куяськом, гужемъёсы вуэ пыриськом, инкуазьын ветлӥськом, ческыт шашлык дасяськом. Мон атайме туж яратӥсько. 
Автономова Луиза, 4 класс

Атаелэн нимыз Геннадий. Солы 52 арес. Со котькыӵе ужез быдэстыны быгатэ, нокыӵе ужез уг люкы. Атае пудо-животъёсты яратэ, соосын котьку огкыл шедьтэ. Али дыре атае «Сурнай» эштосын скал кыскись луыса тырше. Ужез солы туж кельше. Дорамы но ми трос пудо вордӥськом. Анай-атаймылы юрттыны тыршиськом. Мон данъяськисько соин. 
Фёдорова Маша, 4 класс

Гожъямъёссэс дасязы дышетӥсьёссы — Антонова Наталия Львовна но Пчельникова Ольга Мироновна.