«Атаймылэн ожын кулэмез вань азьпал улонмес воштӥз»

Кин газетын потэм статьяосме кӧня ке ар ӵоже лыдӟе, шӧдӥз, дыр, ини: мон тужгес яратӥсько мӧйыос сярысь материалъёсты дасяны. Аспӧртэмлыкоесь соос, каньылэсь, огшорыесь, возьдаськисесь – удмурт песянайёс но бабайёс. Трос вераськыны но уг ярато, ушъяськон-мактаськон сямзы но ӧвӧл. Та муген лыдӟисьёслы но мӧйыос сярысь статьяосы матын луо. Но берло дыре, дистанционной амалэн ужамен сэрен, мӧйыос сярысь туж шер гожъяны кутски — телефон но интернет пыр соослэсь интервью басьтыны секытгес луэ. Нош та статьяелэн героиняез телефонэн вераськыса но пӧртэм мылкыдъёсы вуттыны быгатӥз — жалянэ, паймонэ, синмаськонэ… Веранэ Сырья гуртысь Андреева Любовь Петровна сярысь.

Мари-Турек ёросысь Шолдынер гуртын вордскем но будэм Сергеева Любаез улон нылпи дырысеныз эскерыны кутскем. Ож пуромон вакытэ солы 3 арес гинэ луэм ке но, ожмаськонлэсь вань шуг-секытсэ, вань бервылъёссэ, пытьыоссэ со ас вылаз туж умой шӧдэм.

— Атайлэсь кошкемзэ мон уг ни тодӥськы — пичи вал соку. Сезьы аран вакытэ кошкиз шуыса анаймылэн гинэ верамез вань. 5 толшоре 1942 арын Белоруссиын мынэм кужмо ожмаськон бере бырем атаймы. Та сярысь ожысь бертэм атайлэн самой матысь эшез, Васильев Иван берлогес вераз. Ожын адӟем шуг-секытъёссы, отын луэм пӧртэм учыръёссы сярысь мадьылӥз Иван агай милемлы. Одӥгзэ тыныд но вераме потэ. 4 толшоре, кызьы верай ини, Белоруссиын кужмо ожмаськон мынэм. Со нюръяськонын солдатъёс, пуштыса кулэм валъёслэсь кылем-мылем люкетъёссэ люкаса, котелокын лымы шунтыса сӥтьсюлъёссэ пӧзьтыса сииллям… Атае соку шуэм: «Сиськи ини, табере кулэме но луэ». Кин тодэм соку, та солэн берпум верам кылъёсыз луозы шуыса. Мукет нуналаз атаймылэн йыраз тушмонлэн пуляез шеде. Тӥни озьы со егитысен сопал дуннее кошке, кышноез но кык пичи нылпиосыз доры уг ни берытскы, — синкылиоссэ поттыны тыршытэк маде Любовь Петровна.

Озьы кышномурт пичи дырысен атайтэк кылем. Жугиськон йылпумъяськем бере куд-ог эшъёссылэн атайёссы доразы берытскиллям, нош Люба но солэн Ваня выныз атайзэс ноку адӟымтэзы ни. Луо эшъёссылы вожъяськон вакытъёссы но… Анайзы, нылпиоссэ сюдыны-вордыны тыршыса, вазь ӵукнаысен бер ӝытозь ужа. Песяй-бабайзы но соослэн луымтэ. Соин Любалы туж вазь быдэ вуыны, вань ужъёслы аслыз дышыны тупам.

— Покчи классъёсын дышетскыкумы ик каб шуккиськомы вал. Ваня выны гуртысьтымы кутьыез но возьмаз — кызьы меда пичи нылпилы сыӵе секыт ужез оскиллям, мон паймисько. Малпаса-малпаса паймисько, сизьым классэз йылпумъяны быгатэмелы но: дӥськут, пыдкутчан ӧвӧл, книга ӧвӧл ук. Тямысэтӥ классэ выжеме бере, анае дышетсконме куштыны косӥз ини — уксёмы ӧвӧл шуыса валэктӥз. Мон пумит ӧй луы, ваньзэ туж умой валасько вал. Ужаны интыяськи гуртысьтымы фермае, ыжъёсты ути, — азьланьтэ веранзэ Люба апай. — Фермаын ужам сяна, анайлы юрттыны но тырши, нюлэскы писпу погыръяны ветлӥ. Валъёс луымтэысь, анайлы писпуосты вайыны ошак сётӥзы. Син азяд пукты али ошакен кышномуртэ. Таӵе учыр луиз огпол. Корам писпуосты анаен кыкнамы уробоямы тыримы, бертон сюрес вылэ потӥмы. Нош сюрес матын ӧвӧл. Мыныкумы шунды пиштэ ке вал, бертыкумы кисьтыса зорыны кутскиз. Кышкыт, кужмо зор вал со, тӧл но потӥз. Тӥни озьы бертыкумы витьымтэ шорысь ошакмы уробоен ӵош нюке мед усёз-а! Анае черекъяса бӧрдыны кутскиз: «Мар понна мон таӵе шудтэм, мар понна мыным улон сомында эскеронъёс сётэ…» Сокем кужмо бӧрдӥз со, куараез али но пель сьӧрам, ноку уз вуны. Ачим но вӧзаз бӧрдыса сылӥ, анайме жаляса. Али малпаськыса, анае эшшо но жаль потэ: мискинь кышномуртлэн йыраз кыӵе малпанъёсыз гинэ кылдымтэзы, дыр, соку — кызьы табере ошакез берыктоно, кызьы корам писпуосты дорозь вуттоно шуыса…

Та выллем тодэ ваёнъёсыз Люба апайлэн туж трос, ваньзэ гожъяса но уд быдты. Ож бырем бере али кӧня дасо аръёс ӵоже солэсь бервылъёссэ шӧдыса-адӟыса улэм калык — ваньмы валаськомы. Жугиськон кутскытозь, ож вакытэ но ож бере вордскем нылпиос — ваньзы, Люба апай кадь ик, трос шугадӟонъёсын пумиськиллям. Но улон эскеронъёслы со сётскымтэ.

1962-тӥ арын Любовь Петровна Сырья гуртысь Петыр нимо воргоронлы картлы кошке. Дышетскемез луымтэ бере, фермае сяна нокытчы ужаны интыяськемез уг луы. Сырьяысь парсь фермаын Люба апай кема аръёс ӵоже бервыло ужа. Нылпи дырысен секыт воргорон ужъёслы дышем бере, уг кышка со нокыӵе секыт ужъёслэсь но.

— Фермаын уж котьку секыт вал ини со. Но егит дыръя кужым трос вал. Сомында секыт ведраос ӝуткан но номыр интыын ӧй вал кадь. Кивалтэт мар косэ — ваньзэ дыраз быдэстӥмы. Куро дасян, турын турнан, дежурить карон — ваньзэ асьмеос ужамы. Ӧм ӝожтӥське, чидамы. Чидатэк кытчы пырод? Ваньзы огкадь условиосын ужазы: котькин улыны тыршиз. 

Дано шутэтсконэ потытозяз кӧня ке дыр ӵоже со гуртысьтызы медпунктын санитарка луыса тыршиз ке но, Люба апай пудоосын выремез сярысь шуныт кылъёсын гинэ тодаз вае, малы ке шуоно ужзэ со яратэм. Со ушъяськыны быгатэ ужаз вутскем азинсконъёсыныз но. Любовь Петровна республикаысь ленинской юбилейной «Трудовая слава» книгае пыртэмын, СССР-ысь калык возёсын азинлыко но бервыло ужамез понна туй медален пусъемын, Данъян грамотаосыз но Таукарон гожтэтъёсыз солэн лыдъяса быдтонтэм трос.

Анай луыны гинэ шудэз вылымтэ Люба апайлэн. Кузпалэныз Петыр агаен (жаляса верано, со 20 ар талэсь азьло кулэм ини) Сергей нимо пиез, Петыр агайлэсь племянниксэ, вордыны басьто. Любовь Петровна Сергей понна яратӥсь но яратымон анай луыны быгатэ.

— Туннэ мон асме туж шудо адями шуисько. Сергей пиеным, Наташа кенэным тупаса улӥськомы. Куинь внуке но вань — Марина Казаньын дышетске, Оля но Ваня — школаын али. Соос понна ик улӥсько ини мон. Улонын адӟымтэзэ адӟи ни ас дыраз. Со ваньмыз уг вуны ке но, кылемаз, ортчем вакытын гинэ мед кылёз. Али но улонъёсмы каньыл ӧвӧл, но со шоры учкытэк улонэз данэн азьланьтоно, уродэз сярысь малпаськоно ӧвӧл. Шунды нуналлы быдэ уг пишты, но асьмеос тодӥськом ук: со одно ик нош пиштоз, асьмеды нош шунтоз, — шуэ Люба апай.

Та нуналъёсы асьмеос ожысь но тылысь ветеранъёсты тодамы вайиськомы бере, ож дырысь нылпиен Любовь Петровнаен вераськонмы туж интыяз луиз. Ожысь ветеранъёс но чиньыен лыдъямон гинэ кылемын ини, тылысь ветеранъёслэн лыдзы но арысь аре кулэсмыса мынэ. Но котькудӥз соос пӧлысь — гажамон, синмаськымон, адӟем карымон адями. Югыт дуннеын улыны луонлык сётэмды понна тау, ожысь но тылысь ветеранъёс!

Наталья Андреева, кенэз: «Любовь Петровна — синмаськымон кышномурт. Кузпалэ Сергей понна со яратӥсь анай, нылпиосмы понна сюлмаськись песяй луыны быгатӥз. Вань сюлэм шунытсэ внукъёсызлы сётэ со. Бадӟым тау солы ваньмыз понна».