Хезмәт

«Азьлане» газетэн кусып возьыны весь тырши

Вера Павловна Лобанова, Ципья школаез йылпумъямез бере, кыӵе специальность бырйыны но тодымтэ — гуртысь кошкемез потымтэ вылэм. Озьы, вошъяськись мылкыдын улыкуз, Кушкетысь Клавдия Павлова ас дораз типографие ужаны ӧтем.

Вера Павловна отчы шумпотыса мынэ, воксё тодмотэм уж борды басьтӥське. Клавдия ик сое линотипен но ужаны дышетэ. Кивалтӥсьсы Нигматзянов Барий Бикчантаевич но туж юрттэм. Со ӟеч тодэм вань типографской оборудованиез, ачиз ик тупатъям но. Соин Вера Павловна та адямиослы,  улоназ ужаны сюрес усьтэмзы понна, бадӟым таукаремзэ вуттэ. Куинь ар пала ужамез бере, солы акыльтэм сюрес вылын ветлыны, малпам, кошкоз кыдёкегес, оло, шергес сюрес вылын ветлоз. Можгаын ужам, собере Ижевске вуэм. Отын ӵапак КПСС-лэн обкомезлэн выль издательствоез усьтӥськем вылэм. ӵыж выль оборудованиос пуктылэмын луэм. Издательствоын Вера Павловнаез самой опытной ужасен лыдъяллям, солы сложной уравнениосын, иностранной текстъёсын ужъёсты оскиллям. Пӧртэм ӵошатсконъёсы но пыриськылэм, уно пол пӧртэм данъянъёс, дано нимъёс басьяллям. Собере ӧтиллям «Дась лу!» (туннэ нуналэ — «Ӟечбур!») газетлэн редакцияз технической редактор луыса ужаны, бератаз компьютерен газетэз верстать карыны дышем. Пенсие потытозяз та редакциын ужам.

— «Азьлане» газетэн кусып возьыны весь тырши. «Советской Удмуртия» газетлэн редакцияз ӵем пыралляй ёрос газетмес лыдӟыны, соос выписать каро вал. Берло дыре Интернетысь лыдӟылӥ. Табере, Вукогуртам улыны интыяськи бере, котькуд номерзэ лыдӟыны луонлык луоз, — шуэ Вера Павловна.

Югдытӥсь, визьмо адямиос тыршемен,

Печатласькид, дыр, «Азьлане», секытэн.

Тубато-тубато сюрестӥ азьлане вамыштӥд.

Юн сылӥд пыд йылад но зол возиськид.

Нырысь тодматскид туж мудрон кылъёсын:

Шпон, шпация, реглет, квадрат но марӟан,

Бабашка, гранка но касса шрифтъёсын.

Будэмъяд тодӥд на йӧспӧртэм кылъёсты:

Линотип, матрица, магазин, каретка, элеватор,

Свинец, олово, сурьма но гартоплавка.

Кылылӥд шрифтъёслэсь тузӥ нимъёссэс:

Бриллиант, нонпарель, петит, боргес,

Корпус, цицеро, миттель но мукет.

Югдурлэсь кыльытэк, азьлане дыртӥськод,

Чылкак выль амалэз табере тодӥськод.

Нош но нош выль кылъёс дуннее вӧлмизы,

Компьютер, сканер, принтер, монитор,

Интернет, сайт, пӧртэм пумо программаос:

Indesing, Photoshop, Corel Drav но Word.

Тырмиз ке но 85 аресэд — ваньзэ вормод,

ӝабрес мынод котьку азьлане, азьлане.

***

«Азьлане» газетмы иворъёсын тодматэ,

Уг сёты вунэтыны ортчемзэ, вашкалазэ.

Кенеш сётэ, дышетэ, визьнода но ушъя.

Лулӟытэ, кӧдэктытэ, пӧсь табае султытэ,

Ужбергатӥсьлы но рекламаен со юрттэ,

Газетэн эшъяськид ке, ӟечлы осконэд юнмалоз,

Дӥсьтонэд кыдалоз, мылкыдыд бурдъяськоз,

Котырмес гажаны, утьыны тон дышод.

Вера Лобанова

Реклама
Нравится
Поделиться:
Реклама
Комментарии (0)
Осталось символов: