“Азьлане” газетлы шумпотыса гожтӥсько”…

Почта, туала интернет азинскон дауре но, туж востребованной луэ. Адямиос, азьло сямен ик, гожтэтъёсты гожъяло, посылкаосты лэзьяло, газет-журналъёслы гожтӥсько… Россилэн почтаезлэн ӧнер праздникез гужем пусйиське бере, со вакытэ арысь аре газетмылэн бамъёсаз почта ёзэтъёслэн, почтальонъёслэн ужаменызы тӥледыз тодматыны тыршиськомы. Нош почтальонъёс гужем гинэ ӧвӧл – ар ӵоже, инкуазь шоры учкытэк, тыршо ук. Газетъёслэн, журналъёслэн, гожтэтъёслэн, посылкаослэн басьтӥсез доры дыраз вуэмез ӵапак почтальонлэн ужаменыз герӟаськемын.  Шубан почта ёзэтын сыӵе тыршись почтальонъёс ужало — газет-журналъёс но лыдӟисьёс доры дыраз вуо, гожтӥськон ласянь но шуг-секытъёссы уг кылдо.

…Ужзы соослэн, почтальонъёслэн, зэмзэ но, трос вылэм. Татын, Вылын Шубанэ интыяськем почта ёзэтын, корреспонденциез, газет-журналъёсты но келяно адресъёсъя люкыло. Шубанын но мукет матын интыяськем гуртъёсын улӥсьёс посылкаосты, бандерольёсты басьто, телефон, коммунальной услугаос понна счётъёсты тыро, газет-журналъёслы гожтӥсько но почтальонъёсын мукет пӧртэм возьматэм услугаосынызы пайдаясько. Со сяна, почта ёзэт пӧртэм продуктъёсты но, промышленной вузъёсты но ӵектэ али. Нош гуртъёсын ужась почтальон калыклы вузаны продукциез но нуллэ. Шубанысь почта ёзэтлэн пичи но эшлыко коллективаз ужась нылкышноос ваньмыз ласянь ог-огзылы юрттыны дась. Сюлмысь ужась почтальонъёслэн тыршеменызы ёзэтлэн доставкаосъя, вузанъёсъя, газет-журналъёслы гожтӥськемъя планзы но умой быдэстӥське.

Кыӵе почта ёзэтэз гинэ эн басьты, котькудаз валтӥсь ужасез почтальон луэ. Гуртысь почтальонлэн кулэлыкез шӧдскымон бадӟымгес но. Куддыръя гурт калыклэн куремезъя магазинысь но вуз басьтоно луэ почтальонлы.

Шубан почта ёзэтын кык почтальонъёс тыршо — Раушания Садикова (со ик кивалтӥсь, кема аръёс ӵоже почтаын ужа вылэм ини  — школазэ йылпумъямез дырысен) но Светлана Иванова. Соос вылын туж бадӟым кылкутон. Почтаез сортировать карем бере, сумкаосты пельпумъёсазы поныса, соос кошко гуртъёс кузя: Раушания Садикова — Вылын но Улын Шубанэ, Светлана Иванова — Ярак-Чурмае но Гондыргуртэ (соос та гуртъёс понна кыл куто). Мынон-ветлон — машинаен (Светлана Иванова ачиз руль сьӧрын ветлэ). Кӧня иськем со ортчем меда Светлана Витальевна дас ар ӵоже та сюрес кузя ветлыса? Лыдъяд ке, шӧдскымон трос люкаськоз.

Котькуд адями сюлмызъя уж шедьтыны уг быгаты, нош Светлана Витальевна Иванова ӵапак сыӵе адями, кудӥз ас интыяз шедем. Егит дыръяз со почтальон луыса ужалоз шуыса малпамтэ но. Вордскем Светлана Витальевна Вуж Кушкет гуртын. Шор Кушкет школаысь 11-тӥ классэз быдтыса, Казаньын вуриськисьлы дышетскем. Дышетсконзэ йылпумъямез бере, 2006-тӥ арын, Ярак-Чурма гуртэ картлы кошкем. 2007-тӥ арын нырысетӥ нылпиез вордскем, соин кӧня ке ар егит анай шутэтсконын луэ. 2010-тӥ арын почтае ужаны интыяське Светлана Витальевна. Вылын Шубан, Ярак-Чурма, Гондыргурт — ялан сыӵе маршрутэн ветлэ почтальон. Со котьку тодэ, кинлы пенсия нуоно, кинлэсь тыронъёссэ басьтоно, кинлы газет ваёно, кинэ гожтэтэн шумпоттоно… Бен, та уж капчи ӧвӧл ке но, куддыръя туж жадьытэ ке но нылкышноез, почтаын ужаны кутскемез сярысь, сомында ар отын ужамез сярысь уг жаля со.

— Ӝожтӥськеме ӧвӧл, муге но ӧвӧл кадь. Почтаын ужаны мыным кельше, адямиосмы, гурт калыке йӧно. Соосын огъя кыл шедьтӥськомы, милям ужамы со самой валтӥсез, дыр, — шуэ почтальон.

Ярак-Чурмаын но Гондыргуртын газет-журналъёслы гожтӥськон ласянь шуг-секытъёс уг кылдо вылэм. Мар шуид ке но, нокыӵе интернетысь источник печатной изданиез уз вошты. Таин соглаш луиз Светлана Витальевна но.

— Мынам гуртъёсын “Азьлане” газетлы шумпотыса гожтӥсько, - маде почтальон. — “Кызьы удмурт кылын потӥсь газетлы гожтӥськытэк кылёд” шуо. Али, шумпотымон, журналъёслы гожтӥськисьёс но вань. Соин гожтӥськон умой мынэ шуыны луысал.

Раушания Садикова но, почта ёзэтлэн кивалтӥсез, Шубанын гожтӥськон ласянь шӧдскымон шуг-секытъёс уг кылдо шуыса оскытӥз. 1987-тӥ арысен почтаын ужась нылкышно Светлана сярысь но опыто, тыршись но быгатӥсь ужась шуыса вераз.

— Пӧртэмез луэ ке но, гожтӥськон ласянь но, огъя ужамез ласянь но Светлана сярысь уродзэ вераны уг луы. Туж тыршись почтальон со, ужзэ сюлмысь быдэсъя, — пусйиз Раушания апай.