Бускельёс дорын куноын

Али кемалась ӧвӧл гинэ Вятской Полянаын ортчем «Аран быдтон» улосвылкуспо фестивале пыриськемзы сярысь ивортӥськеммы вал. Табере тани Киров улосвылысь Малмыж городын куноын луиллям ни соос.

20 коньывуонэ Малмыж городын Киров улосысь йӧскалык лулчеберетъёсъя «Вятка твоя и моя» шуыса нимаськись фестивален валче Удмурт культуралэн нуналыз ортчиз. Ӵапак отчы куное ӧтиллям турьяосты. Ужрадэ пыриськизы Киров улосвылысь удмурт ансамбльёс, кырӟасьёс-эктӥсьёс. Кылсярысь, Полянаысь, Порезысь, Китякысь, Шабанкаысь (Большая Шабанка), Камдор-Омгаысь (Дым-Дым-Омга), Кильмезьысь но куд-ог мукет гуртъёсысь коллективъёс. Татын но ужаз сиён-юонъёсын адӟытон, озьы ик киужъёс но ӵектэмын вал.

Тани мар вера Малмыже ветлэмзы сярысь «Вуюись» ансамбльлэн кивалтӥсез Ирина Исьмекова: «Малмыже милемыз куно карыса ӧтизы. Нош куноын кызьы уз кельшы, туж кельшиз, шуныт пумитазы, куно каризы. Мукет ёросъёсы, улосъёсы, огъя вераса, палэнэ потан — со туж пайдаё ук. Малы ке шуоно луонлык кылдэ астэ, аслэсьтыд быгатонлыкъёстэ но возьматыны, мукетъёслэн но творчествоенызы тодматскыны, соослэсь но марлы ке но дышетскыны. Мон сямен, со туж умой. Кылсярысь, Малмыжын ортчем фестивальын милемыз туж паймытӥзы Кильмезьысь удмуртъёс. Соос нуны сюан обряд возьматӥзы. Туж чебер йылол. Уг тодӥськы, асьмелэн сыӵе йылол вал-а, ӧй вал-а, нош соослэн со вашкала дырысен утиськем. Со сяна, туж тунсыко потӥзы мастер-классъёс. Кылсярысь, одӥг песяй мунё вурыны дышетӥз, мукетыз черсон устолыксэ возьматӥз. Ведь быгатон одӥгез но мултэс уг луы. Тужгес но со туж шер пумиськись быгатон ке. Учырен пайдаяськыса, нош ик аслэсьтым коллективме, мызганчимес ушъяме потэ, туж устоесь соос мынам».

Пусйыны кулэ, «Вятка твоя и моя» фестиваль вылӥ уровеньын ортче шуыса. Радъя но ортчытэ сое Киров улосвылысь Лулчеберетъя министерство но Калык творчествоя юрт, Киров улосвылысь йӧскалык лулчеберетъёсты утён но азинтон ужпумен. Фестиваль ортче 2 этапен: бырйыса басьтон но финал люкет, кудаз пырисько ни пӧртэм йӧскалыкысь самой-самой усто творческой коллективъёс.