Эн жалялэ нылкышноослы шуныт кылъёстэс

Нылкышноослэн праздниксы азьын ӵектӥсько лыдӟисьёслы кӧня ке кылбуръёсме дунъяны. 

Анай! Анай сюлэм! Анайлэн яратонэз! Та кылъёсты кылӥськом но шӧдӥськом вордӥськем дырысен. Анай ке вань, коркан шунды пиштэм кадь югыт но шуныт. Солэн эркиямез, мусоямез котькуд адямилэн вань улытозяз тодаз улэ, ноку уг вуны.

АНАЙ КОТЬКУ СЮЛМАМ

Мусо анайлэсь тусбуйзэ
Весь син азям возисько.
Солэсь небыт куаразэ
Али но кадь кылӥсько.

Сизьым нылпизэ киосыз вешазы.
Уйёссэ изьытэк но потэм со, луоз.
Нокудмес люкытэк, мусояз, яратӥз.
Аслэсьтыз люкетсэ но куддыр люкылӥз.

Тон, милям анаймы,
Весь сюлмам улӥськод.
Визь-кенеш сётэмед но
Али пель сьӧрам.

Анайлэсь мусоез дуннеын ӧвӧл, дыр,
Мӧзмытэ со монэ али но куддыр.
Витисько мон али но мусо вешамзэ,
Кылӥсько кадь али но солэсь кенешсэ.

Малы тон, улон,
Вакчи дыр сетӥськод?
Шулдыр улонлэсь,
Анайлэсь люкиськод?

Со пичи дырысен шуг-секыт адӟылэм.
Анайтэк-атайтэк мурт дорын со будэм.
Бӧрдыса вералоз вал: ужысь бертыса,
Нош уже кошкылӥ, ву гинэ юыса.

Сютэмез но ортчем, курадӟон но адӟем.
Э, Инмаре, нош малы меда со
Туж вазь ми пӧлысь кошкем?
Шонер ӧвӧл ук со!!!

НЫЛКЫШНО ШУД

Вань меда улонын нылкышно шуд?
Адӟыны сое кинлы усёз шуд?
Пичи дыръяз со шудо вал.
Анаез-атаез сое вешало вал.

Шудо пичи ныл шумпотӥз
Чебер дэремлы, ческыт сиёнлы.
Чагыр инбаме шунды ке ӝутскиз,
Нылашлэн мылкыдыз бурдъяськиз лобаны.

Кузпалзэ яратэ ке, нылпизы ке вордске, 
Яратон пӧлы ачиз но вые.
Сяськая, чеберске ук шудо нылкышно.
Яратӥсь мурт вӧзын кышкыт ӧвӧл номыр но.

Нылпи ке шудо — анай но шудо!
Соослэн улонзы аслэсьтыз но дуно.
Внукъёссэ яратэ, вешаса мусоя.
Сюлэмыз небӟыса, соосты куноя.

ТУЛЫС ПРАЗДНИКМЫ

Малы меда тулыс куазез
Вите мылкыд шумпотыса?
Оло акыль потӥм толлэсь,
Оло тулысэз витиськом ни мӧзмыса?

Нылкышноос понна эшшо муг вань.
8- тӥ южтолэзез ми витиськом.
Сяська кузьмасез ке соослы вань.
Вань мылкыдмес ми усьтӥськом.

Соку котыр дунне но воштӥське.
Шудо пальпотонэн сюлэм тырме.
Вань яратонлы, мусоянлы
Эрик сётоз кышномурт та нуналэ.

Трос-а кулэ нылкышнолы шудо луыны?
Матысь муртъёсызлэн яратонзы,
Котькуд нунал мусо кылъёс ке кылӥмы,
Со-а уз лу «чеберинаослэн» шудзы? 

Гажано воргоронъёс но пиос, котькуд нунал мусо кылъёстэс вералэ анайдылы, кузпалдылы. Улон одӥг пол гинэ сётӥське асьмелы. Котькуд минутсэ дунъяны быгатэ. Эн жалялэ сюлмысь потэм кылъёстэс. Нунал потэм сяська пӧлын мед луоз яратоно кышномуртъёсты.

Екатерина Иванова,
Вылын Ушма гурт