«Фермаысь пудоез аслэсьтым пудоме кадь яратӥсько»

2021-тӥ арлэн йылпумъянъёсызъя Азьмынӥсьёслэн слётазы пусъем аспалъёсынымы тодматонмес азьланьтӥськомы. Таяз учыре Гондыргуртын улӥсь Надежда Васильеваен тодматскомы.

Надежда Анатольевна Васильева — «Алга» обществоысь скал кыскись. Таиз Азьмынӥсьёслэн слётсы Надежда Анатольевна понна нырысетӥез гинэ луэм ке но али, возёсазы азьмынӥсь скал кыскисез та дырозь но пусйылӥллям ини — кылсярысь, кӧня ке ар талэсь азьло Шубан гуртын ортчись Сабантуй праздникын, сцена вылэ ӧтьыса, ӟечкылаллям. Ачиз но кышномурт та сярысь шумпотыса, ватытэк вера, ужзэ адӟо но дунъяны быгато шуыса.  

Ужан сюресэз мех фабрикаын кутске

Надежда Анатольевна Васильева (Байгельдина) вордскем 1979-тӥ арын Вуж Кушкет гуртын. Надялы куать арес тырмем бере, семья Балтасе улыны выжем.

— Балтасе одӥг ар ӵоже нылпи садэ но ветлӥ али, школаын но отын дышетски. Соин бигер кылэз но пичи дырысен умой тодӥсько, — шуэ Надежда Анатольевна. — Школаез йылпумъяммы бере, выльысь Кушкетэ улыны бертӥмы, малы ке шуоно отын улӥсь песяен бабаймы пересьмизы, висьыны кутскизы.

1997-тӥ арын, школазэ йылпумъямез бере, Надежда Анатольевна Малмыжысь 44-тӥ номеро профессиональной училищее дышетскыны пыре но кык ар ӵоже отын дышетскыса вуриськисьлэсь ӧнерзэ басьтэ. 1999-тӥ арын ӧнерезъя Балтасьысь мех фабрикае ужаны интыяське. Тыршись, аслэсьтыз ужзэ валась Надеждаез коллективын умой пумитало, фабрикаын со ӝог ваньзэсын огъя кыл шедьтэ. Ужзэ яратэмысьтыз, Надежда Анатольевна Гондыргуртэ картлы кошкемез бере но (2001-тӥ ар), Балтась фабрикаын ужамысь уг дугды. 

— 2008-тӥ арозь ужай али фабрикаын, ужасал но, дыр. Ӵош ужаны ветлэм кышномуртъёс пенсие потӥзы но, мон огнам ветлыны кыли. Соин мукет уж утчаны малпай, — валэктэ Надежда Анатольевна.

«Котькуд скаллы нимыныз вазисько»

Гуртын быръён туж бадӟым ӧвӧл бере, нылкышно «Алга» обществое ужаны интыяське. Нырысь пӧртэм ужъёсты быдэсъя, нош 2011-тӥ арысен скал кыскыны кутске.

— Гуртысьтымы куинь ӵошен — Лариса Борисова, Елена Никифорова но мон — Вылын Шубан гуртысь фермаын скал кыскисьёс луыса ужаны кутскимы. Туннэ нуналэ но ваньмы та ужын ик тыршиськомы. Яра али огнам ӧвӧл шуыса шумпотӥсько. Елена Фоминаен но Гульназ Гильметдиноваен валче кенешыса, огкылысь ужаськомы. Ярак-Чурмаысен, Елена Фомина сяна, Матвеева Юлия но Фомина Катя ужаны ветло. Шумпотӥськомы, автобус ветлытэ шуыса. Водительмы Тахир абый но туж умой воргорон. Кылем арын колхозмы 200 ветыл басьтэм вал. Со ветылъёслэсь 100-зэ милемлы оскизы. Ми (Елена Фомина, Гульназ Гильметдинова но мон) соосты дышетӥмы, группа кылдытӥмы. Ветылъёс пӧлын но пӧртэмъёсыз вань ук, соин капчи ӧй вал. Но уждэ пыр-поч быдэстыны тыршид ке, ваньмыз пӧрме, — шуэ скал кыскись.

Туала дыре но скал кыскон уж капчи ужъёс пӧлысь ӧвӧл. Кызьы вера ачиз Надежда Васильева, та ужын ассэ утьымтэ адями солэсь секытсэ уз вала. Но зэмзэ верано ке, уж тыршон бордын гинэ уг луы вылэм. Пудоез ӧд ке яраты, сое кулэезъя ӧд ке утьы, ужедлы сюлэмдэ сётыса ӧд ке тыршы, ваньмыз сокем умой пӧрмысал меда? Уз, дыр. Надежда Анатольевна та ласянь но ушъямон ужась. Фермаысь пудоез со аслэсьтыз пудозэ кадь яратӥсько, пе.

— Котькуд скаллэн кушемнимыз вань бере, мон соослы котькудӥзлы нимыныз вазиськисько. Кыскыку но, прогулкае поттыку но, огшоры вераськыку но. Соос ведь ваньзэ валало, кыло, шӧдо. Пудоез яратыны кулэ. Ма, кызьы бен соосты уд яраты? — вера Надежда Анатольевна.

Васильевъёс — эшлыко семья

Надежда Анатольевналэн кузпалэз Николай Александрович но «Алга» обществоын кема аръёс ӵоже механизатор луыса ужа. Туннэ нуналэ ремонт ужъёсын выре вылэм. Кузпалэз — солэн валтӥсь юрттӥсез, визь-кенеш сётӥсез.

— Дорын но пудо вордӥськомы. Кунянъёсмы вань, одӥг скал (мукет гуртэ ужаса ветлыку, трос скал вордыны уг луы — вазь ӵукна кошконо ук). Яра али кузпалы юрттэ. Куинь нылпиосмы вань — Аня, Даниил но Серёжа. Аня Балтасьысь магазинын ужа, Даниил студент, нош Серёжа — школьник. Атайзые Александр Алексеевич милемын ӵош улэ. Ми уже кошкыку, со нылпиосты школае келя. Огъя вераса, семьямы эшлыко, ог-огмылы котьку юрттыны дась. Туж шумпотӥсько, сыӵе тупаса улӥськомы шуыса. Дорын но, ужын но ваньмыз каньыл но радызъя луиз ке, туж умой ук. Котьку озьы мед луысал.