Георгий Гришкинэн, бадӟым опытэн пожарноен, тодматскон

Али дыре пенсиын ке но ини (2012-тӥ арысен), Георгий Иванович туннэ но аслэсьтыз ужзэ, трос аръёс ӵоже ог-огзылы юрттыса ӵош ужам эшъёссэ шуныт кылъёсын гинэ тодаз вае. Трос ёросъёсын ужам, пӧртэм адямиосын тодматскем, бадӟым но номаин воштонтэм опыт люкам — та ваньмыз Георгий Гришкин сярысь. Опытной пожарникен матысенгес тодматскомы.

...Ваньмыз кутске кыдёкысь 1983-тӥ арын. Соку героймылы 24 арес луэ — Георгий Иванович та вакытэ Ӟаны школаын 10 классэз йылпумъяса, кык ар ӵоже (1977-1979-тӥ аръёсы) Германиын служить карыса, Казаньысь сельхозинститутын дышетске. Но озьы кылдэм, вылды, 3-тӥ курсын дышетскыкуз, 1983-тӥ арын, дышетсконзэ йылпумъятэк (факультетсы борӟаськемен сэрен) Георгий Иванович Казаньысь самостоятельной военизированной пожарной часте (СВПЧ-1) огшоры тылпу кысӥсь луыса ужаны интыяське.

— Школаез йылпумъяме бере, мынам военной луыны мылкыды вань вал. Но нырысь армиын служить карыса берто но собере ас поннам ваньзэ малпало шуыса йылпумъян лэсьтӥ, — тодаз вае Георгий Иванович. — Озьыен, улон ачиз ваньзэ радъяз — мон пожарной луи.

Та частьын Георгий Иванович кема уг ужа — одӥг ар гинэ. 1984-тӥ арын ужысеныз сое Ивановоысь пожарно-технической училищее (ИПТУ МВД СССР) дышетскыны лэзё. Дышетскыны капчи луымтэ, дыр: казарма улон, боевой дасьлык, аспӧртэмлыко традициос... Но ини кык арскын дышетсконзэ йылпумъяса но лейтенант званиез басьтыса, Георгий Гришкин направлениея Аксубай ёросэ ужаны кошке. Отын со  государственной пожарной надзоръя инспекциын тырше, частьлэн кивалтӥсез но луэ. Куинь арлэсь тросгес дырез солэн татын ортче. Нош пожарнойлэн вордскем палъёсаз бертыса, Балтась районын ужамез потэм. Пусйыны кулэ, татчы ужаны со бертэ ик — но нырысь ӧжытак мукет районъёсын ужано луэ солы. Аксубай бере, 1990-тӥ арын, Саба ёросэ выжтӥське. Татын кык ар ӵоже Георгий Иванович пожарной частьлэн кивалтӥсезлэн воштӥсез луыса ужа. Собере егит ӧнерчилы Тюлячи яке Атня ёросын ужаны ӵекто — Георгий Иванович Атняе выжоно каре, Балтась ёрослы матын луэмысьтыз. Татын но со кивалтӥсьлэн воштӥсез луэ. Нош ини 1993-тӥ арысен кутскыса  дано шутэтсконэ потытозяз Балтасьын тырше. Ужзэ кутске озьы ик частьлэн кивалтӥсезлэн воштӥсез луыса, собере Балтась районысь государственной пожарной надзорлэн ёзэтэзлэн кивалтӥсез луэ.

Георгий Ивановичлэн ужамезлэн емышез — трос тодон-валанъёсыз, быгатонлыкъёсыз. Сомында аръёс ӵоже огшоры пожарной но, кивалтӥсь но луыса ужам бере, та ӧнерлэсь вань чыры-пырыоссэ, шуг-секытъёссэ умой тодэ со. Ас дыраз сое Балтасьысь военкоматэ но ужаны ӧтиллям, но Георгий Иванович яратоно ужысьтыз кошкымтэ. Дано шутэтсконэ но Георгий Иванович бадӟым званиен — подполковник луыса — потэ. Дано аспалмес гуртоосыз но, ёрос калык но тодэ но гажа, соин данъяське.

— Аслэсьтым ужме мон туж яратӥ. Зэм, нырысь секыт вал гурт интыын — ӧнерчиос уг тырмо, техника ӧвӧл. Но каллен-каллен ваньмыз радызъя луиз, — валэктэ Георгий Иванович.

Бен, вераны гинэ капчи. Нош ма гинэ луымтэ меда ужан аръёсыз ӵоже? Кышкыт тылпуос, адями кулонъёс... Сыӵе учыръёс но луиллям. Вылаз ик тылпу кысӥсьёслы ӵем-ӵем дышетсконо луэм — квалификацизэс ӝутоно ук. Нырысетӥ выездэ (пожаре) потэмзэ али но тодаз возе Георгий Иванович — со луэм Казаньын ужакуз. Егит специалист соку кӧня ке нунал гинэ ужа вылэм али. Караулын луыкуз, диспетчерское жингырто — тылпу потэм. Ӝуам центрын интыяськем зданилэн липетэз. Та Георгий Иванович понна нырысетӥ тылпуэз луиз, кудаз со «боевой крещение» басьтӥз. 

Адямиосты ӝуась квартираосысь поттон, ӝуась зданиосты кысылон — та ваньмыз, валамон, котькуд тылпу кысӥсьлэн улоназ аслэсьтыз пытьыоссэ кельтэ. Соин та удысын юн мылкыдо, дӥсьтӥсь, кышкасьтэм воргоронъёс гинэ ужаны быгато. Веранэз ӧвӧл, Георгий Иванович сыӵеос пӧлысь. Вуоно ужзэ бырйыкуз, анай-атайёсыз пизы понна сюлмаськиллям, но Георгий ас кыл вылаз сылэм. Дано шутэтсконэ потытозяз но матысьёсыз солы юн пыкет луиллям. Туннэ нуналэ Георгий Иванович вордскем гуртаз, Пор-Кутешын, улэ. Кузпалыз Елена Александровна Сырьяысь школа-нылпи садэн кивалтэ. Нылпиоссы, Яков но Яна, школаын дышетско али.  

Тямысэтӥ арзэ дано шутэтсконын луэ ке но ини, Георгий Иванович ӵош ужам эшъёсыныз но юн кусып возе — ӵемысь соос ог-огзылы юрттыло, визь-кенеш сёто, куддыръя, бадӟым праздникъёсы, пумиськыло но.

— Туэ, 30-тӥ апреле, пожарной охраналэн кылдэмез дырысен 371 ар луоз. Таин валче мынам аслэсьтым коллегаосме, али та удысын ужась ӧнерчиосты, ветеранъёсты — ваньзэсыз — ӟечкыламе потэ та праздникен. Ачим кема аръёс ӵоже та удысын ужай бере, тодӥсько, пожарной луон капчи ужъёс пӧлысь ӧвӧл шуыса. Куддыръя сутка ӵоже изьыны ӧм быгатэ. Но мар карод — ужмы тае куре вал. Соин мынам коллегаосылы, та удысын ужасьёслы сӥземе потэ тазалык, шудо-буро улон, ужазы азинсконъёс, каньыллык но чиданлык.

Ми но та ӟечкыланэ итӥськыса, тылпулэсь утён удысын тыршисьёсты сюлмысен ӧнер праздникенызы ӟечкыласькомы. Сыӵе кышкыт, но кулэ луись удысын ужамды понна тӥ азьын йыбырттӥськомы.