Юртлэн шунытэз но шулдырез — тон бордын, анай!

Россиын трос пӧртэм пусйиськись праздникъёс пӧлын вань одӥгез тужгес шунытэз но тужгес витёноез, кезьыт сӥзьыл куазез чебертӥсь праздник — Анайлэн нуналыз. 1998-тӥ арысен гинэ пусйиське ке но, та праздник шаерамы нимысьтыз инты басьтэ. Та нуналэ вань анайёсты — мӧйыоссэ но егитъёссэ, оген но тросэн нылпи будэтӥсьёссэ — огъя вераса, ваньзэсты ӟечкылало.

Ваньзылэн анайёслэн одӥг бадӟым ужпумзы вань — нылпиосты вордон но будэтон, соосты пӧртэм шуг-секытъёслэсь но висёнъёслэсь утён, пыд йылазы султытон но бадӟым улонэ лэзён.

Но таиз статьямылэн героиняезлы нылпиоссэ бадӟым улонэ лэзён сярысь малпаськыны вазьгес на — солэн нылпиосыз школаын дышетско али. Вераськон мынэ Ципья гуртысь трос нылпиё анай Ольга Овчинникова сярысь.

Ольгалы вить арес луыку, со дырозь Мари-Турек ёросысь Кисаль гуртын улэм Степановъёслэн семьязы Ципья гуртэ улыны выже. Соин Ольгалэн нылпи но егит дырыз Ципьяын ортче шуыны луэ.

— 1998-тӥ арын Ципья гуртысь шоръёзо школаез йылпумъяй, — веранзэ кутске Ольга Павловна. — Дышетсконме нокытын ӧй азьланьты — ужаны кутскеме потӥз. Озьы тӥни гуртысьтымы одӥгаз магазинэ вузкарись луыса ужаны интыяськи.

Магазинын ужакуз, Ольга 2005-тӥ арын Ципья гуртысь Алексей нимо пилы картлы кошке. Картэз но, ачиз Ольга кадь ик, ужез яратӥсь адями (трос аръёс ӵоже «Труд» обществоын механизатор луыса ужам воргорон кемалась ӧвӧл «Дуслык» обществое ужаны выжем). 2007-тӥ арын Овчинниковъёслэн нырысетӥ нылпизы, Валерия нылзы, вордске. Нош 2010- тӥ арын — кыктооссы Никита но Кирилл.

Кышномуртлэн верамезъя, куинь нылпиослэн анайзы луон — капчи ужпумъёс пӧлысь ӧвӧл. Котькуд нылпиезлы нимысьтыз дыр, саклык висъяны, яратонзэ кузьманы кулэ. Тужгес секыт луэм кыктоосыз вордскем бере — кык пичи нылпиосын капчи ӧвӧл уга. Но Ольга Павловна ӝожтӥськисьёс пӧлысь ӧвӧл. Нылпиоссэ вордон но будэтон солы шумпотон гинэ вае.

Кыктоосыз вордскем бере, кышномурт магазинысь кошке но гуртысь мех фабрикае вуриськись луыса ужаны интыяське. Отын 2017-тӥ арозь тыршыса, 2018-тӥ арысен Ципьяысь социальной реабилитацияя «Наз» центрын нянечка луыса ужаны кутске.

— Ужлэсь кышкаса ӧй улы ноку но, куддыръя секыт йӧтылӥз ке но. Али ужано интыям капчигес потэ. Влажной уборкаен вырисько: выжъёсты миськисько, тузон ӵушылӥсько. Кык нунал ужасько, кыксэ шутэтскисько. Тазьы умой. Кык нуналзэ дорын, семьяен ортчытыны луэ.

Туэ гужем Ольга Павловнаез кема но азинлыко ужамез понна Данъян грамотаен пусйизы. Озьыен, со яратӥсь кузпал но анай гинэ ӧвӧл, адӟем карымон ужась но.

— Ваньмыз ласянь асме шудо шуыны быгатӥсько. Кузпалэным тупаса улӥськомы, нылпиосы но шумпотто. Соосын тросгес дырме ортчытыны тыршисько. Пиосмы школаын ужась волейболъя но баскетболъя кружокъёсы ветло. Шумпотӥсько, спортэн тунсыкъясько шуыса. Ачим сяськаосын вырыны яратӥсько. Бен, котьку дыр уг луы ни, но котькуд нылкышнолэн но со озьы, дыр, — шуэ кышномурт. — Валтӥсез: нылпиосмы сӧл-таза мед луозы, милемыз мед шумпоттозы, нош ми со понна ваньзэ лэсьтыны тыршомы.

Туннэ нуналэ вить ӵошен улӥсь Овчинниковъёслэн семьязы гуртысь адӟем карымон семьяос пӧлысь луэ. Асьсэ кужмынызы улыны тыршо, нылпиоссылы умой визьнод сёто. Та, валамон, нырысь ик Ольга Павловналэн тыршемез бордын луэ. Юнме гинэ уг верало, анай-кышномурт семьялэсь шунытсэ уте шуыса.

Учырен пайдаяськыса, Ольга Павловнаез но вань анайёсты Анайлэн нуналэныз ӟечкыласько. Тазалык, чидан но кужым сӥзисько. Нылпиостылэсь ӟечсэ гинэ адӟыса улыны мед кылдоз!