Калык огазеяськон нунал-а яке 7 ноябрь-а?

Калык огазеяськон нунал — батырлыклэн но калыклэн юн огазеяськемезлэн праздникез.

Но нырысь та праздник ласянь калык пӧлын пӧртэм малпанъёс улӥзы, валамтэос но кылдӥзы. Тросэз, тужгес но шор но арлыдо поколениысь адямиос, та праздникез 7 ноябре пусйиськись праздникез быдтон поннна малпам праздник шуыса лыдъязы. Но дыр возьматӥз: Калык огазеяськон нунал — нимаз праздник, аслаз историеныз но аслаз традициосыныз. Но али ке но та юан ласянь котькуд адямилэн аслаз валэктонэз. Пӧртэм юалляськонъёсты эскерыса, кӧня ке валтӥсь малпанъёсты шараяны луэ. Ӵектӥськом тӥледлы но соосын тодматскыны.

Малпанъёс:

— Мынам малпамея, Калык огазеяськон нунал — туж кулэ но сӥлы праздник. Со тодэ вайытэ асьмелы, секыт дыръёсы асьме шаермес котьку калык уте шуыса, калык, кудӥз шаермылэн валтӥсь ожтӥрлыкез но пыкетэз луэ. Мон малпасько, Калык огазеяськон нунал пӧртэм адямиосты огазеяны, соослэн кужымзы но юнлыксы, дауръёс ӵоже люкаськем визьбурзы сярысь тодэ вайытыны кулэ. Малы ке шуоно секыт югдурын ӵапак сыӵе сямъёс юртто. Секыт дыръёсы асьме трос йӧслыко калыкмы огазеяськыса бадӟым кужым луыны быгатэ. Таин асьмеос висъяськиськом мукет шаеръёслэсь, та бордын асьмелэн кужыммы.

— Котькуд туала праздниклэн вань аслаз исторической азьвылчиез (предшественникез). Мон малпасько, Калык огазеяськон нунал — со Советской Союз кылдон нуналлэн (30 декабрь 1922 ар — ред.) аспӧртэмлыко азьвылчиез. Со нунал но ми понна калыкъёслэн огазеяськонзылэн символэз вал.

— Та праздник — тодэ вайытон, валче кариськыса асьмеос вань шуг-секытъёсты вормомы шуыса. Мон малпасько, Калык огазеяськон нунал туж кулэ праздник шуыса. Со возьматэ, Россиын пӧртэм калыкысь адямиос ог-огзэс гажаса но тупаса улыны быгато шуыса. Бен, асьмеос туж пӧртэмесь, но озьы ик асьмеос туж огкадесь. Асьмелэн огъя шумпотонъёсмы но куректонъёсмы, нош тужгес валтӥсез асьмеос ваньмы одӥг музъемын улӥськом — Россиын. 

— Мон понна 7 ноябрь бадӟым праздник луыса кыле, малы ке шуоно мон ХХ даурын вордскем адями. 7 ноябрез милям поколение Вормон нуналэз кадь паськыт масштабен пусъе вал. Тодам вайисько школаын дышетскон аръёсме, арлы быдэ школьной демонстрацие потто вал милемыз. Отын кивалтӥсьёс, директоръёс ми азьын выступать карылизы. Ми шумпотыса празднике пыриськиськомы вал. Али ке но тодӥсько чуръёсты: 
День Седьмого ноября — 
Красный день календаря. 
Погляди в своё окно —
Всё на улице красно!
7 ноябрез туала дыре уг пусъё ке но, со мынам малпанам кылемын. Та праздникез али тодӥсьёс трос на, соин ик вунэтымон нунал öвӧл со.

— Калык огазеяськон мон понна — туж кулэ праздник. Мон сое чик но 7 ноябрен ӧй герӟасал, малы ке шуоно 7 ноябрь ласянь мынам малпанъёсы огпӧртэм ӧвӧл. Одӥг ласянь гинэ учкыса дунъяны но секыт. Нырысетӥен, Октябрь революция миллионъёсын адямиослэсь улонзэс воштэм, одӥг даур ӵоже кыстӥськись вакытлы кутскон сётэм. Пӧртэм шаеръёс куспын пумитъяськонъёс, сюрсъёсын, миллионъёсын адямиослэн кулэмзы, сютэм улон, колхозъёслэн кылдонзы, репрессиос, Быдӟым ож... — та ваньмыз но талэн бервылыз. Ӟеч малпанэн кутскыса но, валаны луонтэм бадӟым шугадӟонъёс ваем. Адямиез шудо карыны турттыса но курадӟон ваем. Сюлмам ӧкынон, ӧпкелён мылкыд вань. Милям оскыса улэм идеалъёс вӧзын воксё мукет улон луэм ук шуыса валаськод. Инмар адямилы вераськыны луонлык сётэм, визь сётэм. Вань югдуръёсты валаса, каньыл гинэ сэрттыны-пертчыны луэ, дыр, шуыса малпасько. Сыӵе вамышлэн янгыш луэмез котькинлэн син азяз.