Клавдия Зубинова: «Мон шудо адями»

Ципья гуртысь одӥгез сыӵе нылкышно — Клавдия Петровна Зубинова. Котькыӵе юанэн вазиськизы ке но, со одно ик ваньзылы юрттыны тыршоз — визьмо кенешеныз но, небыт кылыныз но.

Клавдия Петровна 1941-тӥ арын Ципья черкогуртын вордскем. Гумырыз ӵоже татын, вордскем гуртаз, улэ. Соин солы тросэз гуртоосыз, кемалась тодэмысьтызы, матын карыса, Клавапай шуыса вазисько. Озьы аслыз но, пе, кельше.

— Зэмзэ ке верано, мынам улонэ тросэз война аръёсы вордскем но будэм нылпиослэн кадь ортчиз. Пичи дыры секыт жугиськон но жугиськон бере аръёслы тупаз. Ваньмы но троссэ адӟимы... Милям анаймы ньыль нылпиен огназ кылем — атаймы жугиськонын кулэмын, нылпиосыз огелэсь мукетыз пичи. Анаймылы секыт кылиз — нылпиоссэ сюдыны-вордыны кулэ ук. Колхозын но уксё уно уг тыро вал. Соин ми пичиысен ик ужаса будӥмы, — тодаз вае Клавдия Петровна.

Шуг-секытъёс шоры учкытэк, Клавдия Петровна школаез 10 классэн йылпумъяны быгатэм. Солэн верамезъя, Ципьяын азьло кык школа луэм — удмурт кылын дышетӥсь но ӟуч-бигер кылын дышетӥсь школаос. Клава апай кыказ ик дышетскем. 10 классэз йылпумъямез бере егит ныл нокытчы дышетскыны уг кошкы — 1961-тӥ арын Вуж Турья гуртысь изба-читальняе ужаны интыяське. «Яра али квартира сёто вал, нуналлы быдэ пыдын доре бертылыса ветлоно ӧз луы», — шуэ Клавдия Петровна. Но татын со кема уг ужа — кык арскын Можгаысь педучилищее дышетскыны кошке. Анаезлэсь мӧзмыса дышетсконзэ куштыса бертэ. Бертэм бераз Ципьяысь мех фабрикаын ужаны кутске. Нош ӝыны арскын Клавдияез Покчи Лӧзя школае пионервожатой луыса ужаны басьто (та луэ 1964-тӥ арын). Тодо ук — Клавдия котькинэн огъя кыл шедьтыны быгатэ — бадӟымъёсын но, пичиосын но. Но жаляса верано, Покчи Лӧзя школаын со кык ар гинэ ужаны вутске — кулэстонэ сюре. 1967-тӥ арын ини Клавдия Петровна ужан сюрессэ редакциын азьланьтэ.

— Редакциын бигеръёсын ӵош, огинэ ужамы. Коллектив но туж ӟеч вал. Николай Григорьевич Борисовлэн кивалтэмез улсын азинлыко ужамы, — тодаз вае со редакциын ужам аръёсыз сярысь.

Ӵапак редакциын ик ужакуз Ципья гуртысь клубын художественной руководительлэн должностез буша. Татчы ӧтё Клавдия Петровнаез. Нылкышно соглаш луэ но, кызьы со пальпотыса вера, огпол но уг ӧкыны.

— Мыным клубын ужаны туж кельшиз, — шуэ со. — Ужез капчи ӧвӧл, секыт. Адямиосты ас бордад кыскыны быгатыны кулэ вал. Но зэмзэ ке верано, азьло адями активногес клубе ветлыса гуртлэн улоназ пыриське вал. Ми ас дырамы кытчы гинэ концертъёсын но ӧм вуылэ. Коллективысь кинлэн ке но вордскем нуналыз тупаз ке, одно ик кузьымъёс кузьмаса коллективен ӝӧк дасяськом вал. Соос мыным аслам семьяе выллем матын луо вал. Соос но монэ яратӥзы —  асьсэос ик куриськыса репетициосы ветлӥзы. Клубмы ноку но буш ӧз улы. Котьку пӧртэм ужрадъёс ортчытӥськизы, библиотекаосын ӵош тыршыса ужамы. Огъя вераса, уж котьку но уно вал. Нылпиос понна, бадӟымъёс понна нимаз кружокъёс вал. Аэробика орчытӥськомы вал клубын. «Поле чудес» выллем шудонъёсты но ортчытъямы. Яра али, сельсоветысен финанс ласянь юрттӥзы, — пальпотыса тодаз вае Клавдия Петровна.

Но ужез сюлмаз кельшем ке но, Клава апайлэн та берпуметӥ ужан интыез ӧвӧл али. 1992-тӥ арын Ципья школалэн директорез (соку со вал Василий Фёдорович Трофимов) Клавдия Петровнаез школае лаборант луыса ужаны ӧте. Со соглаш луэ. Татысен ини Клавдия Петровна, сизьым ар ужаса, дано шутэтсконэ но потэ.

— Улонды ӵоже тӥ кӧня пӧртэм ужъёсты вошъяды. Валамон, котькуд ужлэн аслаз шуг-секытъёсыз но, шумпотонъёсыз но луо. Нош кудӥз ужды тӥледлы тужгес но сюлмады кылиз? — юасько.

— Клубын ужам аръёсы. Бен, монэ ужан сюресэ кытчы гинэ ӧз вутты, кыӵе гинэ рольын асме ӧй утьы. Котькуд ужам инты номаин воштонтэм опыт, тодон-валан сётэ. Но клубын ужамме номаин но ӵошатыны уг луы. Кезьыт клубын ужаса но, асьмеос ваньзэ быдэстӥмы, — ответ сётэ Клавдия Петровна. — Вань сюлэмме поныса ужай. 

Зэмзэ но, Клавдия Петровна кадь ужзылы сюлэмзэс сётыса тыршисьёс туж трос ӧвӧл. Кытын гинэ ӧз ужа со, кыӵе уж борды гинэ ӧз басьтӥськы — ваньмыз солэн умой пӧрмем.

Туннэ нуналэ Клавдия Петровна Андрей племянникезлэн семьяеныз улэ.

— Мон шудо адями, — пальпотэ Клавдия Петровна. Котькуд ортчем нуналэ, умойтэм нунал луиз ке но, та улонын мон кинлы ке но кулэ шуыса возьматӥз. Шумпотӥсько, гуртоосы но ярато, гажало, юанъёсын вазисько шуыса. Тужгес шумпотӥсько, соослы юрттыны быгатӥ ке. Ачим семья ӧй кылдыты ке но, шудо улӥсько Андрей племянникелэн семьяяз. Соос монэ ярато, утё. Та шуд ӧвӧл шат? Мукетыз мыным кулэ но ӧвӧл.

Оло, та кылъёсын ик шудо улонлэн секретэз но луэ?