Книга аслэсьтыз лыдӟисьсэ шедьтэ

22-тӥ оштолэзе Ижкарысь Йӧскалык библиотекаын Леонид Дмитриевич Сапожниковлэн «Удмурт шыкысысь ваньбуръëс» книгаеныз тодматскон ужрад ортчиз. 

Та нуналэ Леонид Сапожниковен артэ вал «Сырья зоутъёс» ансамбль, Балтась ёросысь исполнительной комитетлэн кивалтӥсезлэн воштӥсез Ильгам Фидаелевич Гайнутдинов но «Кенеш» НКА-лэн правлениезлэн тӧроез Ольга Мироновна Пчельникова. 

Ижкарын Балтасьёсты туж шуныт пумитазы. Ужрадэ пыриськизы тодосчиос, шаертодосчиос, лулчеберет удысын ужасьёс, фольклорез эскерисьёс, журналистъёс, Ижкарын улӥсь шошма удмуртъёс.

Вераны кулэ, пумиськон туж умой ортчиз, аспалмылэн кема аръёс ӵоже сюлмысь тыршемезлэн, пумтэм утчалляськонъёсызлэн емышез вылӥ дунъет басьтӥз но выль лыдӟисьёсты шедьтӥз.

Леонид Дмитриевичлы тау карыса но солэн ужезлы дунъет сётыса, ӟеч кылъёссэс но мылкыдъёссэс веразы Удмурт Элькунысь Йӧскалык библиотекалэн директорез Татьяна Тенсина, аспалмы, фольклор кырӟанъя но эктонъя «Айкай» кун театрлэн директорез Пётр Данилов, кылосбур тодосъя кандидатъёс, фольклористъёс Галина Шушакова, Ирина Пчеловодова но мукетъёс. 

Ужрадын чузъяськизы шошма удмуртъёслэн кырӟанъёссы, сюлме пыӵась кубыз но арган гуръёс. Йылпумъяськиз пумиськон шулдыр юмшанэн.

Малпанъёс но мылкыдъёс

Анна Павлова,
Ижкарысь ӟуч кылъя репетитор:

— 22-тӥ оштолэзе вань семьяеным ветлӥм Ижкарын ортчем Л. Д. Сапожниковлэн «Сокровища удмуртского фольклора: песни, танцы и игры шошминских удмуртов» сборникеныз тодматскон ужрадэ. Кема витем книга! Кыӵе мур пуштросэз, паймыса лыдӟиськод, ваньмыз вань кадь: гуртъёслэн нимъёссы но, адямиослэн нимтулъёссы но туспуктэмъёс, кырӟанъёс, эктонъёс, дӥськутъёс, сям-йылолъёс. Озьы ик тодмо адямиос сярысь очеркъёс. Зол!

Книга кык кылын гожтэмын. Данъяськыса киям кутӥсько. Нылы но паймыса учкиз, огшоры гинэ книга ӧвӧл, энциклопедия но ӧвӧл. Ваньмыз сярысь пыр-поч гожтэмын. Летопись! Нылы Кузебай Герд нимо гимназиын дышетске бере, пӧртэм ужрадъёсы пыриськиськом, шошма удмуртъёс сярысь эскерон ужъёс гожъяськом, валасько, та книга бадӟым юрттӥсь луоз. Тау, Леонид Дмитриевич!

Али Карлыган школа сярысь уж дасяськом, Кузьма Андреевич Андреев сярысь шедьтӥм тунсыко ивортодэт. Ачим дышетскыкум диплом ужме Николай Никифоров сярысь гожъяй. Со сярысь но выльзэ тодӥ. Котькуд пумысен кулэ луись книга. Апае но, книгаез кияз кутыса, паймыса вераз: «Та кырӟанэз милемлы песяй кырӟа вал ук!» Озьы. Луэ нылпи дырмес тодэ вайыны, куке песяй луло вал на, Шолдынер гуртмы но улэп вал. Табере ваньмыз гожтэмын, одӥг интыын люкамын.

Виктория Щербакова,
Ижкарысь Надежда Константиновна Крупская нимо библиотекаысь библиотекарь:

— Туж шумпотӥсько, мыным удалтӥз Леонид Дмитриевич Сапожниковлэн «Сокровища удмуртского фольклора: песни, танцы и игры шошминских удмуртов» бичетэзлэн презентацияз вуылыны. Мон малпамъя, со огшоры книга гинэ ӧвӧл, быдэс летопись! Шошма калыкмылэн историысьтыз 750 бам. Та книгаын ваньмыз ӧвӧл, но туж тросэз вань... 

Дасо аръёс ӵоже Леонид Дмитриевич рос-прос люка, уте но возьматэ шошма калыклэсь визьлыксэ но философизэ. 

Ӟуч культураын вань валтӥсь фигура — Владимир Иванович Даль. Вань улонзэ Владимир Иванович сӥзиз аслаз ӟуч калыкезлы, со ӟуч культураез зэмос яратӥсь мурт вал. Нош асьмелэн удмурт шошма культураямы сыӵе адями — Леонид Дмитриевич Сапожников. Леонид Дмитриевич но, Даль сямен ик, калык культурамылэсь узырлыксэ пусйыны тыршыса, вань улонзэ сӥзиз шошма калыкезлы. Та книга луыны кулэ котькуд шошма удмуртъёслэн семьяязы, уката ик егит поколениын, ас калыкедлэсь ортчемзэ эскерон, солэсь историзэ умойгес валан, лулчеберет кылёсбурзэ тодон но тодын возён понна.

Лариса Дмитриева, 
Удмурт Элькунысь Йӧскалык библиотекаысь ӧнерчи, филология наукаосъя кандидат:

— Удмурт Элькунысь Йӧскалык библиотекаын «Шошма удмуртъёслэн кырӟанъёссы, эктонъёссы но шудон-шулдыръяськонъёссы = Сокровища удмуртского фольклора. Песни, танцы и игры шошминских удмуртов» (Чебоксары: Новое время, 2025) книгаен тодматскон ӝытэ солэн авторез-люкасез Леонид Сапожников сярысь удмурт фольклорист, филология наукаосъя кандидат Галина Николаевна Шушакова ӟырдыт, лулысь-сюлмысь вераськиз. «Кызьы уд дырекъя таӵе адямиен артэ сылыны?! — шуиз со, — Леонид Дмитриевичез оградэ пуктыны луоз бадӟым тодосчиосын. Кыӵе шумпотысалзы Иван Васильевич Тараканов, Валей Кельмакович Кельмаков профессоръёс, Татарстанын вордскем адямиос, та книгаез адӟыса-кылзыса! Валей Кельмакович вера вал: шошма но кукмор удмуртъёслэсь кырӟанъёссэс частушка шуоно ӧвӧл — соосыз нимано ньыль чуръем кырӟанъёсын. Малы ке шуоно та ньыльчуръёсын возьматэмын удмурт калыклэн улон шоры учкемез, котырысь дуннеез валамез». Калык кырӟанъёс — ньыльчуръёс Леонид Сапожниковлэн книгаяз туж трос — соин но со туж дуно, туж узыр пуштросо пӧрмем. 

«Леонид Дмитриевичлы бадӟым тау карисько, — шуэ Галина Николаевна, — сыӵе ужамез понна. Учке, кыӵе со интеллигентной адями, макем ӝикыт уж со дасям: котьмае но котькинэ син азяз возе — книгаын одӥг фамилия но инициалтэк кельтэмын ӧвӧл, одӥг информант но вунэтэмын ӧвӧл». Г. Н. Шушакова вераз книгалэн алфавитной указателез сярысь но. Со книгаез зэмос научной ужъёс радэ ӝутэ. Указатель возьматэ кыӵе страницаосысь шедьтыны луоз фамилиосыз, интынимъёсыз, терминъёсыз. 

Г. Н. Шушакова шуэ: книгаын шӧдӥське Леонид Сапожниковлэн бадӟым яратонэз — со аслэсьтыз калыксэ яратэ кырӟан пыр, со кылэз яратэ. Со ведь филолог ӧвӧл, нош быдэс улонзэ тодосчи-филологлэсь ужзэ быдэстэ. 

— Дышетскемезъя Леонид Дмитриевич математикая но физикая дышетӥсь, ужаз культура удысын, но зэмос филологической уж лэсьтӥз, туж солидной уж. Со ачиз писатель но, удмурт фольклорез но усто тодӥсь информант но, тодосчи но. Куамын ар ӵоже дасям сборнике пӧртэм пумо материал пыртэмын — историко-филологической, музыкально-этнографической, — таӵе вылӥ дунъет сётӥз книгалы Галина Николаевна. 

Г. Н. Шушакова ӧз вунэты Леонид Сапожниковлэсь оскымон юрттӥсьсэ — Галина Александровна Сапожникова кузпалзэ. Ведь научной ужъёсын вырон понна кулэ вӧзад мурт, кудӥз тон гожъяськон ӝӧк сьӧрын уин-нуналэн пукыку, юрт котырысь ужъёстэ лэсьтоз. Соин, тау карыса но гажамзэ вераса, Г. Н. Шушакова Галина Александровналы чебер сяськаос кузьмаз. 

— Тау тӥледлы, шуиз Галина Шушакова, шошма удмуртъёс, творчестводы понна, таӵе узыр культурадэс — асьмелэсь удмурт культурамес — возьматэмды но утемды понна. Нош Л. Д. Сапожниковлы со тазалык но кужым сӥзиз кутскем ужзэ азьланьтыны — шошма удмуртъёс сярысь выль книга поттыны.

Туспуктэм: Удмурт Элькунысь Йӧскалык библиотека, Борис Горбунов