Котьку мед луоз кубыз!

Михаил Ефимович вордске 1941-тӥ арын Улын Ушма гуртын. Михаиллы кык толэзь луыкуз атаез жугиськонэ кошке, отысь уг ни берты. Со пичи дырысеныз ик атайтэк кылем, улонын шуг-секытъёс пыр потэм, трос ыштонъёсты адӟем. Но кызьы со ачиз ватытэк вера, кубыз пичи дырысеныз солэн матысь юлтошез луэм, секыт улонзэ ӧжытак ке но югытгес карыны юрттэм.

Озьыен, Михаил пинал дырысеныз ик кубызэн шудыны дышетскем. Нырысьсэ кубызэз кияз кутыкуз солы куать арес гинэ луэм. Нош тямыс аресэн со ини шудыны кутскем.

— Нырысьсэ атайлэн кылем кубызэныз шудӥ. Киям кутӥ, бергатӥ, эскери нырысь. Туж со мыным кельшиз, туж мынам соин шудыны дышетскеме потӥз. Милям вань вал Микаль агай нимо бускельмы. Со туж умой  шудӥз кубызэн, аслаз инструментэз но вал. Самой со Микаль агай мынам нырысетӥ но, одӥг гинэ дышетӥсе но луиз. Кубызэн шудэме потэ шуыса вераны но возьдаськи, шып гинэ учкисько вал Микаль агайлэсь шудэмзэ. Азьло кыӵе ке праздникъёс дыръя но одӥг коркаысен мукет коркае ветло вал шудыса, али ке но тодам вайисько, кызьы мон но соку кубызэн шудэмзэ учкыса ветлӥ. Ини ачим шудыны дышетскыкум туж тырши но туж курадӟи, шудэмме нокин медаз адӟы шуыса — возьдаськи. Тӥни озьы, бускель агайлэсь Акашка но Семык выллем бадӟым праздникъёсы кубызэн шудэмзэ учкыса, ачим но шудыны дышетски. Аръёс ортчыса киме волятӥ, умойгес шудыны дышетски.

Атаезлэсь кылем инструментэныз шудыны дышетскем Михаиллэн кубызэз вужмыса тӥяськем бере, пияшлы бускелезлэсь инструментсэ кузьмаллям. Егит Михаил будэмъяз пӧртэм зоутъёсты шудыны дышетске: нырысь ик асьме ёросысь удмуртъёслэсь ӝӧк сьӧрын кырӟан гурзэс, апай эктон зоутсэс но пӧртэм мукет крезьгуръёсты.

— Ог 16 аресам нырысетӥзэ сюанэ кубызэн шудыны мынӥ (со вал двоюродной агаелэн сюанэз). Ми егит вакытэ одӥн сюан но ведь кубызтэк ӧз ортчы. Али со — компьютерысен кырӟан лэзё но — соин быриз. Ма, вань на сюанъёс, кытын мызганэн, баянэн юмшало. Но со ини мукет... Азьло ведь кубызтэк ортчем сюанэз «пуны сюан» гинэ шуо вал. Асьтэос малпалэ ни табере, макем дуно но дано луэм кубыз, макем удмурт калык сое яратэм. 

Та сюан нуналысен Михаил кубызэн шудонэз эшшо но золгес яратыны кутске. Бен, Михаил Ефимович 1960-тӥ арын шофёрлы дышетскыса потэ но машинаос бордын ужаны кутске — кыӵе гинэ ужъёс борды уг басьтӥськы со, но кубыз солэн гумырез ӵоже хоббиез луыса кыле. Михаил Ефимович куинь ар ӵоже Прибалтикаын служить карыса бертэ но 1970-тӥ арын Казане улыны выже (туннэ нуналэ но кузпалэныз Антонинаен городын уло). Татын соослэн куинь нылъёссы вордско — Лариса, Людмила но Елена. Но кытчы гинэ сое улон уг вутты ке но, Михаил Ефимович ноку кубызэныз уг люкиськы. Ини Казаньын улыны кутскем бераз со аслыз выль инструмент но басьтэ — азьвыл кубызэз вужме. Бадӟым городын но Михаил Романов гажамон, адӟем карымон адями но яратоно, уникальной кубызчи луыны быгатэ. Казаньын улӥсь тросэз удмуртъёс пӧлын туннэ нуналэ Михаил Ефимович тодмо адями. Сотэк уг ортчо нокыӵе удмуртлыкен герӟаськем праздникъёс, люкаськонъёс. Михаил Ефимович сыӵе ужрадъёсын дуно куно луэ. Со котькытчы кубызэныз лыктэ но люкаськем куноослы кырӟанъёссэ кузьма.

— Мон трос ветлӥсько Калыкъёслэн Эшъяськон юртазы но, мукет интыосы но котьку кубызэн мынӥсько. Туж шумпотӥсько, монэ ӟеч пумитало но шудыкум кизэс чабо шуыса, — пальпотэ Михаил Ефимович. — Зэмзэ ке верано, пересьмем бере туж ик ветлэм уг поты трос адями люкаськоно интыосы, но гажаса ӧтё бере, шумпотыса мынӥсько. Инмарлы тау, кубызэн но шудыны быгатӥсько али.

Михаил Ефимович Казаньын гинэ ӧвӧл, республикалэн палэназ но тодмо кубызчи. Кылем арын Ижкарын ортчем «Кубыз фестивальын» но со самой витем куно луиз. Малы ке шуоно туннэ нуналэ ваньзы вашкала сямъя шудӥсь кубызчиос та дуннеысь кошкемын ини, кылемын Михаил Ефимович гинэ (шумпотымон, туннэ нуналэ та крезьгуро инструментэн шудыны дышетскись кӧня ке егит воргоронъёс вань). Солэн шудэмез аутентичной, соин но туж тунсыко.

— Мон шумпотӥсько, кубыз сярысь берпуметӥ аръёсы нош ик вераськыны кутскизы шуыса. Бырем инструментэз выльдыны, выльысь ӝутыны туж секыт ук. Соин али ӧжыт ке но кубызэн шудыны быгатӥсьёс, шудыны дышетскисьёс вань бере, сюлмы каньыл, — малпанъёссэ вера кубызчи.

Михаил Ефимовичлэн кубызэн шудон опытэз туж бадӟым, соин репертуарез но узыр. Со огкадь усто быдэсъя кызьы удмурт, озьы ик ӟуч, бигер кырӟанъёсты но. Со сяна, ачиз кылбуръёс но гожъя, кубызэн гуръёс малпаса шудэ. Аслаз мылкыдэз луыса шудыны дышетскем Михаил Ефимович тыршеменыз тодмо кубызчи луыны быгатӥз. Соин но егитъёслы солэн таӵе ӵектонэз вань: тыршид ке, ваньмыз но пӧрме. Самой валтӥсез — ма борды басьтӥськид ке но, сюлэмдэ сётыса тыршоно. Тае Михаил Ефимович аслаз примереныз юнматӥз

Тунсыко: Михаил Ефимовичлэн, кубызэн шудонэз сяна, вань нош одӥг хоббиез. Со – куды керттон.Таиз яратоно «ужез» но Михаил Ефимовичлэн пичи дырысеныз кылдэм. Нырысь куды керттон шоры со огшоры гинэ учкем, дырыз луыку ӟазегпиосызлы кудыос керттэм. Нош ини пенсие потэм бераз та уж борды рос-прос басьтӥськем: ачиз ньылда, ачиз керттэ, собаре корзинаосты вуза. Та быгатонлыкъёсызлы (кубызэн шудонлы но, куды керттонлы но) мастерлэн вуоно поколениез дышетэмез потэ.