Кушкет гуртлы кубыз кузьмазы

Выль чебер кубыз Кушкет клубын возиськоз но вуонояз, оскем потэ, кулэ уже кутӥськоз. Та малпанэн соглаш луэ Кушкет гуртысь клублэн кивалтӥсез Светлана Щербакова но.

Кубызэз кузьмась Николай Иванович Кумаев выжыезъя Кушкетысь луэ. Сизьымдонзэ ортчем пиосмурт (Николай Иванович 1948-тӥ арын вордскем) туннэ нуналэ Ижевскын улэ, али но Ижкарысь Кузебай Герд нимо йӧскалык музейын художник-оформитель луыса ужа. Со туж усто лэсьтэ вылэм пулэсь пӧртэм арбериосты. Ӵапак та кубызэз но ачиз ик лэсьтэм. Кибашлы воргорон вордскем гуртэз понна сюлмаськись адями. Туэ тани Николай Ивановичлэсь та крезьгуро кузьымзэ Елена сузэрез  кушкетъёслы кузьмаз. Николай Ивановичлэн оскемез потэ: Кушкет гурт котьку сяськаяськоз, таланто адямиосыныз дано луоз. Кузьым гуртысь клубын возиське.

— Сыӵе дуно кузьым кузьмамзылы ми туж шумпотӥмы. Но табере мон азьын, клублэн кивалтӥсез луисько бере, таӵе ужпум кылдӥз: кубызэн кинэ ке но шудыны дышетоно, со огшоры, кулэтэм луыса медаз кылльы шуыса. Оло, одӥг ке но кубызэн шудыны быгатӥсь адями луысал ке, со мукетъёсты но дышетысал. Оло, клуб бордын ужась нимысьтыз кружок луысал. Вуонолы сыӵе малпанъёсмы но вань.

P. S. Жаляса верано, туала дыре кубызэн шудон вунэтэмын. Та крезьгуро инструментэн ӧжыт гинэ адямиос шудыны быгато. Та ласянь асьмеос, шошма удмуртъёс, али шумпотыны но данъяськыны быгатӥськомы: кубызэн шудон сям шошма удмуртъёслэн ӵошатымон умой возиськем. Туннэ нуналэ но кубызэн шудыны быгатӥсь аспалмы вань. Со — Сырьяысь Николай Плотников.