Кык полэс шумпотонэн бертӥзы

Элькун олимпиада котькуд дышетскись но дышетӥсь понна зэмос эскерон луэ. Тодон-валанъёстэ возьматэм сяна, татын чиданы но дышетсконо, пӧртэм стрессовой ситуациосысь но потыны тыршоно, ас вылад кылкутон но басьтоно. Нош быдэс ёрослэсь данзэ утён — со зэмзэ ик бадӟым кылкутонэз кулэ карись ужпум. Малпасько, быдэ вуымтэ нылпи понна та кулэ луись эскерон, улонысь пӧртэм мугъёслы дасясь вакыт но кылдэм шуг-секытъёс азьын зӥбыт сылон.

Олимпиадае пыриськисьёс теоретической турысь заданиосты гожъязы, практической тураз топографической картаосын ужазы но тестовой турысь юанъёслы валэктонъёс сётӥзы.

Ваньзэ элькун олимпиадае 153 дышетскись пыриськиз. Соос пӧлысь 18 дышетскись вормись луиз, нош 58-эз призо интыосты басьтӥз. Туж шумпотымон, асьмелэн вормисьмы но, призёрмы но вань. 
Покчи Лӧзя шоръёзо школаысь 10-тӥ классын дышетскись Евгений Никитин (дышетӥсез — Вероника Егорова) призёр луиз. Пияш мукет предметъёсын но тунсыкъяське, спортэн эшъяське. Нош Ӟаны шоръёзо школаысь 9-тӥ классын дышетскись Константин Исаев (дышетӥсез — Валерий Иванов) вормисе потӥз. Со сяна, Костя юн спортэн эшъяське, тужгес ик волейболэн шудыны яратэ, озьы ик мукет предметъёсъя олимпиадаосы но пыриське. 
Шумпотымон, кыкез но пиос — удмуртъёс. Ёросмес данъяса, удмурт калыклэсь усто но визьмо палъёссэ элькун уровеньын зэматыны быгатӥзы. Оскиськом, удмурт кыл соослы могӟет ӧз кылдыты, пайдалы гинэ луиз шуыса.
ТР-ысь дышетонъя но наукая министерстволэн грамотаеныз 52 географиен дышетӥсьёс пусйиськизы. Нылпиослэн вормонэ вуэмзы трослы соосын герӟаськемын луэ: трос дышетскисьёс пӧлысь самой устозэ висъяно но дасяно, тодон-валан песьтэрзэ тырмытоно.
Ӟечкыласьком дышетскисьёсты но дышетӥсьёсты азинсконъёсынызы! Оскиськом, выль вормонъёссылы но табере сюрес усьтӥськемын ни шуыса. Тодон-валанъёсты пӧртэм удысын мед йылозы, соосын валче шумпотон иворъёсты но тросгес мед луозы!