Кызьы пусъёно Акашкаез карантин дыръя?

Но ӵапак та нуналъёслы (19 оштолэзе) православнойёслэн одӥгез тужгес бадӟым праздниксы тупа — Акашка. Кызьы бен пумитано Христослэсь улӟем нуналзэ, куке карантинэн сэрен адямиослы дорысь потаны уг яра?

ТР-ысь Кивалтэтлэн 2020-тӥ арын 13 оштолэзе кутэм 280 номеро постановлениезъя 14 оштолэзьысен санитарно-эпидемиологической югдур умоятозь гражданъёслы инмарлы вӧсяськон юртъёсы ветлыны, озьы ик сыӵе юртъёсын ортчытӥськись ужрадъёсы но вӧсьрадъёсы пыриськон алэмын, черкын служить карисьёслы, инмарлы вӧсяськон ужрадъёсты ортчытон но черкез ужатон понна кулэ луись адямиослы сяна.

Та постановлениен сэрен Татарстанысь митрополилэн информационно-просветительской сайтаз Казаньысь но Татарстанысь митрополитлэн, Феофанлэн, вазиськонэз потӥз. Вакчияк верано ке, митрополит Феофан адямиосты асьме шаерамы, республикаямы кылдэм югдурез валаны, постановлениез быдэстыны куре. Со оскытэ, Инмар адямиослэсь сюлмысь вӧсяськемзэс, осконзэс, яратонзэс шӧдэ шуыса. Та вазиськонэн пыр-поч тодматскыны быгатӥськоды tatmitropolia.ru сайтын (Татарстанысь митрополилэн официальной сайтэз).

Газет лыдӟисьёсты но районысь оскисьёсты тужгес сюлмаськытӥсь юан вылэ меӵак выжомы: Акашка пусйиськоз, праздник вӧсяськонъёс одно ик луозы. Но ортчозы соос ворсам амалэн. Мукет сямен вераса, отчы вӧсьчи но кырӟасьёс гинэ пыриськозы. Валано, та кулэ ужрадъёс луо. Вӧсьчиос но катъёсты утьыса ужаны кулэ. Россиын, со чотын Татарстанын но, коронавирусэн герӟаськем югдур тупатскытозь, асьмеос кышкыттэмлыкъя ужрадъёсты утьыны кулэ. Сыӵе распоряжение сётӥськем бере, сое кулэезъя быдэстоно. Черк ласянь кивалтӥсьёс ас черодазы республика кивалтэтлэсь куронъёссэ быдэсто ук. Таяз учыре ТР-ысь Премьер-министрлэсь, Алексей Песошинлэсь, распоряженизэ.

Кылдэм югдур ласянь но Акашкаез дорын пусъён сярысь кӧня ке Покчи Лӧзяысь Инмар Анайлэн Казанской иконаезлэн но дун-чылкыт Казанской Гурийлэн храмъёссылэн приходской Советсылэн председателез но настоятелез иерей Рафаил Фёдоров но вераз.

— Бен, Акашкаез асьмелы дорын пукыса пусъёно луоз. Асьме дорын пыртэмын самоизоляция режим, сое тӥясьёслы штраф кутӥське. Валамон, дорысь нокин потыны уз быгаты, кыӵе ке нимысьтыз учыръёс сяна. Со но отчы гинэ, кытчы потыны лэземын. Но ми, вӧсьчиос, быгатӥськомы висись яке оген улӥсь пересьёс доры мыныны, соосты праздникен ӟечкыланы но синпель кузьымъёс, сиён-юон сётыны, — шуэ отец Рафаил.

Озьы ик вӧсьчи вераз Акашкаез дорын кызьы пусйыны кулэ. Нырысь ик со ӧтиз оскись муртъёсты доразы вӧсяськыны — лыдӟыны нимысьтыз гожтэм «пасхальной канонэз». Но вунэтыны кулэ ӧвӧл: дорын вӧсяськон понна но дась луоно. Асьмеос тодын возьыны кулэ, котькуд чылкыт сюлмын верам вӧсяськеммы Инмар доры вуэ, Со сое кылэ шуыса. Нош вӧсьчиос, ас черодазы, озьы ик черкын вӧсяськозы. Евхаристия (ӟуч кылын вераса, «таинство», «священнодействие» — ред.) уг быры. Черкын озьы ик буялозы курегпузъёсты, вӧсялозы куличъёсты, но муртъёстэк, прихожанъёстэк. Тӥни сыӵе Акашкаез витиськомы туэ. Зэм, асьмеос сое син азямы мукетэнгес пуктӥськомы вал, дыр, но туала югдурын мукет сямен нокызьы уг луы. Туж потэ, черкъёсын служба мед мыноз шуыса, но кулэ луоз каньыл кариськыны но ӧжытак чиданы. «Валтӥсез, уг яра вунэтыны: шаерамы сыӵе югдур кылдӥз бере, асьмелы сое валано но тодын возёно, асьмелэн дорын вӧсяськеммы одно Инмар доры вуоз. Валамон, сюлэм висе, черкын адямиос уз луэ шуыса. Но ми оскиськомы, адямиос кылдэм югдур шоры валаса учкозы шуыса. Оскиськом, ӝоген нош черкъёсын тыр калык люкаськоз шуыса», — йылпумъяса вераз отец Рафаил.