Лидия Губановаез буре вайыса (2-тӥ люкет)

БЕРТЫНЫ ДАСЯСЬКОН
Куазед ӝыт луэ, шундыед пуксе,
Кышкаськом ятлэн музъемаз. 
Ятлэн музъемаз ышомы ке но, 
Милемыз утчасез кин луоз.

Сезьы но куро, сизьым но ёзо, 
Ойдо вандыса утёме. 
Ӵукна куазьёсыд ӝыт луиз, лэся,
Ойдо бертыса утёме.

Лысву уз усьы, пужмер уз йӧты,
Вадесаз турнам турынлы. 
Кыл но ум кылэ, тыш но ум сие,
Вадесаз бертыса вуим ке.

Ӧй ӵуж полуштоп, 
вож ик полуштоп,
Ми ке но юимы, буш кылёз. 
Ми ик бен татысь кошкем но бере,
Тӥляд кӧтъёсты ӝож кылёз.

Лымыед усёз, со но шуналоз,
Ваёбыж лыктоз кырӟаса. 
Ваёбыж лыктоз арлы но быдэ, 
Ми ум лыктэлэ чаль гинэ.

НЫЛ КУРОН 
НО КУДО-ТУКЛЯЧИОСЫН ЛЮКИСЬКОН
Вае но вае сяськамес, 
Сяськамы сяна ум бертэ. 
Сяськамы сяна бертомы ке но, 
Милемыз Петыр мар шуоз.

Милям йырсимы вуиз, пе, лэся, 
Пукон вылысен сынаны. 
Милемлы вырема вуиз, пе, лэся,
Атыкай юртӥсь кошкыны.

Одӥг бен юс пыл, кык юс пыл, 
Кылёз ук изён интыед. 
Изён интыед кылиз ке, кылёз, 
Кылёз ук анаед бӧрдыса.

Васькод ук али, васькод ук али, 
Ӵукна султыса вуэдлы. 
Малпалод али, малпалод али, 
Атыкай юртад улэмдэ.

Сьӧд нюлэс сьӧрад мар ик но öвӧл,
Шунаса быдмонтэм йӧос вань. 
Ят анай дорын мар кыл но ӧвӧл,
Бодылэсь чурыт кылъёс вань.

Кызлэн бен йылыз мар кадь ик, 
Йылсаса понэм йыл кадь ик. 
Милям сяськамы мар кадь ик, 
Сюсьтаса понэм сюсь кадь ик.

Милям сяськалэн сандыкез бадӟым,
Тэкшыром али пушъёссэ. 
Милям сяськалэн тусыз туж чебер,
Тэкшыром али визьёссэ.

Укно выжыяд изьыны выдӥ, 
Кынмисько, анае, пасьтэ вай. 
Атыкай юртӥсьтым 
потыса кошкисько,
Ӟеч лу, анае, кидэ вай.

ЭМЕСПИ ДОРЫ БЕРТЭМ БЕРЕ
Анае гурзэ эстэм, дыр, 
Муръётӥз ӵыныз потэ, дыр. 
Нуныкае бертоз шуыса, 
Капка выжыяз вите, дыр.

Семон кудолэсь гидкуазьзэ, 
Йӧвалег карыса ми кельтӥм.
Семон кудолэсь нылзэ, 
Мак сяська карыса ми ваим.

Тӧдьы Кам вылад вож ӵӧжпи лэзим,
Быгатоз медам уяны, 
Эш-дярдэ куштыса ят доры потӥд, 
Быгатод медам улыны.

АСЬКИСЬЁСТЫ ПУМИТАН
Таӵе гöпо куазьёсын,
Кызьы лыктыса вуиды. 
Пумитад потыса ӧм ке басьтысалмы, 
Али ветлысалды урамын.

Валэн лыктӥды-а тӥ татчы, 
Пудэн лыктӥды-а тӥ татчы. 
Асьтэос гажаса лыктӥды-а, 
Милесьтым гажаммес тодӥды-а?

Толон но адӟим тӥледыз, 
Туннэ нош адӟим тӥледыз. 
Туж уно калык пушкысен, 
Туж мусо адӟим тӥледыз.

Вылады дӥсям дӥсьёсты, 
Гожминяк адске син азям. 
Тӥ адскиськоды милям син азе, 
Ӵукна бен ӝужась шунды кадь.

Йырады изьям такъядэс, 
Тӧл медаз басьты, кышкаськом. 
Татчы бен лыктэм аськисьёс, 
Син медаз усьы, кышкаськом. 

СЮАН ДУГДОН
Огмы ӟуч мунё, огмы куар мунё,
Кызьы люкиськом асьмеос. 
Огмы кошкомы, огмы кылёмы, 
Озьы люкиськом асьмеос.

Дас кык кортӵого катамес, 
Кыклы люкытозь лёгалом. 
Дас кык команда ми ик люкаським,
Кыклы кыльытозь тэтчалом.

Лэсьтонзэ лэсьтӥм такъямес, 
Сэрттонзэ кызьы сэрттомы, 
Кутсконзэ кутским сюанмес, 
Дугдонзэ кызьы дугдомы. 

Вуын чорыгед уя, дыр, 
Кожысен коже тэтчаса. 
Тӥляд аркаяд ми ик ветлӥмы, 
Тӧрысен тöре пуксьыса.

Лидия ГУБАНОВА, 
Кургем гурт.
(Азьлане, 1991 ар, № 125)