Муса Джалиль — удмурт сямен

Карек-Серма гуртысь Василий Никитинлэн удмурт кылэ берыктэм кылбуръёсыз ӵемысь газет бамъёсамы пото. Туннэ ӵектӥськом Муса Джалильлэсь бигер но ӟуч кылъёсысь удмурт кылэ берыктэм кылбуръёссэ дунъяны.

Муса Джалиль — тодмо бигер кылбурчи, журналист, ожгар корреспондент, Советской Союзлэн Героез. 

НЫЛЛЭН КЫРӞАНЭЗ

Мон келяй ук сое ожлудэ —
Сюлэмлэсь кысонтэм шундызэ.
Мон келяй ук сое ожлудэ —
Яратон мед луоз сюресчи.

Вал секыт гажанэн люкиськон,
Котьма шу, войнае келяськон.
Вал секыт гажанэн люкиськон,
Ӟеч медло бертыса пумиськон!

Котькыӵе кузьымлэсь но бадӟым —
Со мынам мӧзмыса яратэм.
Котькыӵе кузьымлэсь но бадӟым —
Вормыса изъянтэк бертэмез. 

ЭН ОСКЫ! 

Тыныд мон сярысь ке ивор вайизы,
«Жадьыса, со пограз но кылиз», — шуозы.
Эн Оскы солы, мусое! Та кылэз
Вералоз-а кин ке, со гажа ке монэ.

ЗнамЯ выламы кылсётон гожтэмын,
Виреным гожтэмын, со ӧте весь азьлань.
Ӧвӧл ук мынам эрикрад ӵемтыны,
Жадьыса, пограса эшъёслэсь кыльыны.

Тыныд мон сярысь ке ивор вайизы,
«Со вузаз вордӥськем шаерзэ», — шуозы.
Эн Оскы солы, мусое! Та кылэз
Вералоз-а кин ке, со гажа ке монэ.

Кошки шаерме но тонэ утьыны,
Автомат ошыса воргорон пельпумам.
Вордскем шаерме но тонэ вузаса,
Ма кыле на мынам та вордскем музъемам?

Тыныд мон сярысь ке ивор вайизы,
«Мусады кемалась ни кулӥз», — шуозы.
Эн Оскы солы, мусое! Та кылэз
Вералоз-а кин ке, со гажа ке тонэ.

Кезьыт мугорме шобыртоз музъеме,
Но уз лу согыны пӧсь-ӟырдыт кырӟанме.
«Кулӥз», — шуыны, шат кин ке но дӥсьтоз —
Шуозы: кышкатэк нюръяськиз но вормиз!