Наталья Шестакова: «Милям ужамы нокыӵе тодон-валан мултэс ӧвӧл»

Наталья Сергеевналэсь кӧня ке ар интервью басьтыны малпасько вал ини. Кык вылӥ, одӥг средне-специальной тодон-валанэн кышномурт нылпи садысь ужзэ но мыло-кыдо нуэ (та сярысь верало трос пӧртэм конкурсъёсы пыриськыса вормонъёсы вутскемез, анай-атайёслэн гажамзы), семьяезлы но дырзэ шедьтэ. Котьма ласянь адӟем карымон кышномуртэн Нылкышноослэн калыккуспо нуналзы азьын вераськимы.

— Наталья Сергеевна, Тӥледыз умой но опытэн визьнодасез кадь тодо. Нош тани Тӥляд куинь ӧнеръя тодон-валан басьтэмды сярысь тодӥсез ӧжыт, дыр.

— Дышетски музыкантлы, крезьгуръя дышетӥсьлы но, ӟуч кылъя дышетӥсьлы но, визьнодасьлы но (переквалификация ортчыса диплом басьтӥ).

Карлыган гуртысь 11 классэз йылпумъяме бере (мон отын вордски но будӥ), Йошкар-Олаысь МарГУ-э филологической факультетэ пыреме потэ вал. Но, отчы пырыны баллъёсы тырмымтэысь, монэ исторической факультетэ дышетскыны выжтӥзы. Нош отын дышетскеме мынам ӧз поты. Озьы урам кузя малпаськыса ветлыкум, Палантай нимо крезьгуръя училище синме йӧтӥз. Мон домра классъя крезьгуръя школаез йылпумъяськем вал, соин малпай: татчы дышетскыны пырыса утё. Мынам ваньмыз пӧрмиз, институтысь документъёсты басьтыса, училищее дышетскыны пыри. Озьы мон отын домра классъя ньыль ар ӵоже дышетски (1997-2001 аръёс). Калык оркестрлэн артистэзлэсь но крезьгуръя школаысь преподавательлэсь дипломлэ басьтӥ. Дышетсконме йылпумъяса, Карлыганэ бертӥ но крезьгуръя школаын домра классъя дышетыны кутски. Но филологической факультетэ пырон сярысь малпанъёсы ӧз вунэ, соин, заочно ке но, отчы но дышетскыны пыри. Куинетӥ курсын дышетскыкум, Карек-Серма гуртэ картлы кошки.

— Тодэмея, Ӟаны гуртысь нылпи садын Тӥ усьтӥськемез дырысен ужаськоды ини.

— Озьы. 2003-тӥ арын картлы кошки, Ӟаны гуртысь нылпи садын но мон со арын ик ужаны кутски. Ӵапак соку, 2003-тӥ арын, выль нылпи садэз усьтӥзы. Со ужлэн кутсконаз ми вал шуыны луэ — Ирина Вячеславовна Асанова, Лариса Петровна Самсонова, мон но кык нянечкаос. Татчы ужаны лыктыку ваньзэ выльысен кутскимы бере, ваньмылы секыт йӧтӥз. Нылпиос бӧрдо, ми бӧрдӥськом — сыӵе дыръёс но луизы. Туннэ нуналэ 5 визьнодась, кык нянечкаос, поваръёсмы вань. Ужаны кутскыкум, покчи группаын визьнодась луыса ужай, туннэ нуналэ школае дасяськись группаен (подготовительной) ужасько ини.

— Бадӟымгес нылпиосын ужаны капчигес-а?

— Котькыӵе группаын ужад ке но, котькудаз аслаз плюсъёсыз но, минусъёсыз но вань. Пичи нылпиослэн адаптацизы кема ортче, отын тросгес нылпиослэн психологиеныз ужано. Туала нылпиос мукет ведь. Соос ӝоггес садиклы дышо, малпасько, со туала улонэн герӟаськемын шуыса. Милемлы но асьмеды соосын мукет сяменгес возёно, огъя кыл шедьтоно. Дырен ӵош вамышъяны быгатыны но кулэ. Азьло дырен ӵошатоно ке, нылпиос али асьсэды бадӟым муртъёс кадь возё, азьло соосын пичиосын сямен, нуныяса вераськыны луэ вал, туала дыре уг лу ни. Самой валтӥсез — нылпиосты яратыны кулэ. Соосты яратӥд ке, уждэ но яратод. Мон аслэсьтым ужме яратӥсько. Анае, Валентина Тихоновна Семёнова, заведующий луыса 28 ар ӵоже ужаз Карлыган гуртысь садикын. Соин нылпи сад мон понна котьку матын потэ вал, пичи дырысен «мон но татын ужало» шуыса малпаськи. Анаймы туж чурыт куронъёсты пуктӥсь кышномурт вал. Вань нылпиос шоры огкадь учкиз.  Ми но солы садикын огпол но «анай» шуыса ӧм вазьылэ. Ачим но садикын ужаны кутскеме бере ас нылпиосыным, садике ветлыкузы, анае кадь асме вози.  Мон понна вань нылпиос огкадесь, ӧвӧл мынам яратоно яке яратонтэм нылпиосы. Тани 18 ар ужасько ини татын, асме аслам интыям кадь шӧдӥсько. Мукет интыын асме син азям пуктэме но уг луы. Но шонерзэ вераны кулэ: милям ужамы нокыӵе тодон-валан но мултэс ӧвӧл.

— Озьы шуиськоды бере, музыкант луэмды, дышетӥсь луэмды но тӥляд ужады юрттэ.

— Туж юрттэ. Садикын вань ӧнеръёсты тодыны кулэ. Татын музыкант но, филолог но луыны кулэ, трос мукет ӧнеръёсты но тодоно. Со сяна, дышетскемысь дугдоно ӧвӧл. Тани ми, туала визьнодасьёс, нылпиосын ӵош дышетскиськом. Психологиен тунсыкъяськисько, со но ужам юрттэ. Туала нылпиос чеберлыкез адӟыны уг быгато: шундыез но, инбамез но. Соослэн суредъёсазы тросгес пеймыт тусъёс, соослы капчигес кыӵе ке одӥг тусэн ваньзэ суреданы. Мон нылпиослы крезьгур, суредан ласянь дуннелэсь чеберлыксэ возьматыны тыршисько, соос сое мед адӟозы, мед валалозы шуыса сюлмаськисько. Жаляса верано, туала нылпиослы со тунсыко ӧвӧл: ветлӥськомы нюлэскы экскурсие — соос тылобурдолэсь чирдэмзэ но уг кыло, котькудӥз аслаз «тулкымаз». Шудонъёссы но соослэн туала. Соин мон пӧртэм калык шудонъёсты пыртыны тыршисько, ог-огенызы шудыны мед быгатозы, эшлыко мед луозы, коллективын асьсэды возьыны мед быгатозы шуыса. Соослы «ог-огдэс ӟыгыртэ» шуид ке но, соос паймыса «малы?» шуо. Котькуд урокез кутскисько «умой луон круг» (круг доброты) бордысен. Ог-огзылы ӟеч кылъёс вераны дышетӥсько.

— Туннэ нуналэ садикады кӧня нылпи лыдъяське?

— Куамын одӥг. Кык арлыдъем группаосмы вань — младшая средняя, старшая подготовительная группаос. Мынам группаям туэ 15 пинал лыдъяське. Нылпиос кулэсмо. Тодӥсько на, азьло 23 нылпиен группаын но ужаме вань. Гуртэ Ӟаныысь, Кутэшысь, Починкаысь, Кисальысь пиналъёс ветло. Тросэз нылпиос Кисаль гуртысь.

— Нылпиосты ваньзы удмурт гуртъёсысь лыкто бере, удмурт кылэз дышетон ласянь юатэк кыльыны уг быгатӥськы.

— Нылпиослэн 80 процентэз удмуртъёс, вань ӟучъёс, вань кӧня ке мукет калыкысь нылпиос но. Визьнодасьёс но тросэз удмуртъёс. Удмурт кылэз дышетон сярысь верано ке, та шуг-секыт кемалась кылдӥз ини. Программа кылдытон — туж секыт процесс. Но нылпиос понна удмурт кылын номыр ум ортчытӥське шуэм кыл ӧвӧл та, ми котькытын этнокультурной компонент пыртыны тыршиськомы. Котькуд занятиын пыртӥськом сое. Лыдъяськонэз но удмурт кылын дышетыны тыршиськомы. Удмурт кылын кырӟанъёсты дышетӥськомы, шудонъёсты. «Мудорвай» конкурсэ арлы быдэ пыриськиськомы, яра со вань али. Суреданъя занятиосын, кылсярысь, нылпиослэн удмурт костюмъёсты суредамзы вань.

Программамы ӟуч кылын. Но, мон малпасько, нылпи семьяяз удмурт кылын вераське ке, со анай кылзэ ноку уз вунэты шуыса. Али ведь тросэз ӟуч кылын верасько. Мон верасал, ваньмыз семья бордысен кутске шуыса. Анай-атай кулэ кариз ке, нылпиез удмурт кылэз тодоз. Ӟуч кылэз со ку тодыны кутске? Социуме лыктыкуз. Соин нылпи садын пиналъёсты луэ ке но удмурт кыл борды кыскыны, со секытгес сётске. Мон ачим Карлыганын будэм бере, тросгес ӟуч кылын вераськи, малы ке шуоно отын ӟучез но, бигерез но, порез но, удмуртэз но вань. Соин татчы картлы кошкеме бере, мыным нырысь туж секыт вал удмурт кыллы дышыны. Садикын нылпиос удмурт кылын верасько, мон — ӟучен. Мон, удмурт бере, соосты валасько, но пыр-поч удмурт кылын вераны, валэктыны уг быгатӥськы вал. Нош табере удмурт кылын малпаськыны кутски. Удмурт кылын, ӟуч кылын ӵошатыса, вераськыны но, малпаськыны но капчигес ини, малы ке шуоно мон самой удмуртъёс пӧлы картлы кошки, чылкак удмурт гуртэ.

— Визьнодасьлэн ужаз мар самой секытэз?

— Кагаз ужъёсты лыдэ басьтытэк верано ке, мон шуысал анай-атайёсын куддыръя огъя кыл шедьтыны секыт луэ шуыса. Али анай-атайёс егитэсь. Кемалась ӧвӧл статистика каримы. Солэн йылпумъянъёсызъя, нылпи садысьтымы самой «мӧйыезлы» анайлы 36 арес. Мукетъёсыз — солэсь покчигес. Малпаськытӥсь лыдпус, озьы ведь? Психологиын вань сыӵе термин — «тиктоковская память». Нылпиос туннэ мае кыло, ӵуказе вунэто ини. Соос сюжетсэ уг тодо, кадръёсыз гинэ йырсазязы кылё. Со амалъёс, кудъёсыз вал 10 ар талэсь азьло, уг ужало ни. Соин милемлы, визьнодасьёслы, котьку вылезлы кыстӥськоно, выль амалъёсты ужын кутоно. Нылпиосты пӧяны уг яра. Соосын огъя кыл шедьтыса вераськыны кулэ. Тани 23 тулыспаллы утренник возьматон понна кылбуръёссэс дышетскымтэзы вал. Кырӟанъёссэс но уг тодо. Ярам, шуисько, тӥ асьтэос бадӟым адямиос ни. Дышетскемды уг поты бере — праздник ум ортчытэ, анай-атайёстэс ум ӧте. Тӥ асьтэос решать каре. Малпаськемды бере, мыным ответтэс вералоды, шуи. Ӧжыт малпаськыса, одӥгез нылпи шуэ: «Ма, кызьы папаосты ум ӧте», кыкетӥез вера: «Ма, кызьы уд дышетскы ини, ойдо дышетскомы». Тӥни озьы куспазы кенешыса дышетскыны вераськизы. Мукет нуналаз ужрадмы луиз, нылпиос ваньзы кылбуръёссэс но тодо вал, кырӟанъёсэс но.

— Асьтэ нылпиостэс визьноданын но сыӵе принципез кутӥськоды-а?

— Кутӥсько. Котьку соосын вераськисько, кылын ваньзэ валэктыны тыршисько, примерен. Нылпиос визьтэмъёс ӧвӧл, соослы ваньзэ валэктыны гинэ кулэ.

— Тӥ ведь гурттылэн улоназ но мыло-кыдо пыриськиськоды… Гурттылэн нуналаз, «Мудорвай» конкурслэн Ӟаны зонаын ортчем этапаз ужрадэз нуись луиды. Кызьы ваньзэ вутскиськоды, Наталья Сергеевна?

— Починка гуртлэн улоназ мыло-кыдо пыриськон картлы кошкеме бере ик кутскиз, малы ке шуоно анайзые клублэн заведующиез вал. Мон солы юрттӥ. Василий Петрович Никитинэн эшъяськимы, со трос юрттӥз. Тыршисько ини. Садикын но семинаръёсы, мастер-классъёсы пыриськиськомы. Дорын но ваньзэ вутскыны тыршоно. Пие Виталий 11-тӥ классын дышетске, Амалия нылы 4-тӥ классын. Кузпалы Алексей МДСУ-ын ужа.  Улӥськомы Карек-Серма гуртын атайзыен Вячеслав Григорьевичен но анайзыен Галина Николаевнаен. Котьку выльзэ утчаны тыршисько. Кылсярысь, мыным киын ужан кельше — нетрадиционная техника рисования, нылпиосын тыршиськомы пӧртэм сямен суредаськыны. Шуом, пинь сузян щёткаен, ватной палочкаосын, губкаен. Соослы озьы тунсыко. Огшоры кисточкаен пукемзы соослэн уг поты. Группаез чеберъяны яратӥсько. Котькуд сезонлы интерьерез ӧжыт выльдӥськом. Тӥни озьы, ваньмызлы дыр висъяны тыршисько. Котьку уг пӧрмы, куддыръя жадиськод, но, кулэ карид ке, ваньмызлы дыр шедьтыны луэ.

— Наталья Сергеевна, вераськемды понна бадӟым тау. Тӥледыз матынъяськись праздникен — Нылкышноослэн калыккуспо нуналэнызы — ӟечкыласькомы но сӥзиськомы ужады азинсконъёс, семьяяды каньыл улон.