«Номыр мултэсэз кулэ ӧвӧл, луэмезлы шумпотыса улӥськомы»

Витьтон арлэсь тросгес ӵош улӥсь кузпалъёс пӧлысь кин гинэ «Мон кузпалме али но туж яратӥсько» шуыса вераны быгатэ меда? Кин гинэ, сомында ар ӵоже валче улыса, нырысетӥ нуналаз кадь кузпалэз шоры яратӥсь синъёсын учкыны быгатэ меда? Вылын Ушма гуртын улӥсь кузпалъёс, Никодим но Галина Мироновъёс, та ласянь туж адӟем карымон кузпалъёс. Кыкназы ик соос гумырзы ӵоже асьсэды гурт удыслы сӥзем, вормонъёсы вутскем адямиос.

 Никодим Миронов: «Пичи дыръя милемлы вуэ пырыны но ӧз йӧты — нюлэскысь бертыса ӧм вуэ»

Никодим Иванович вордскемын Вылын Ушма гуртын 1941-тӥ арын. Семьяяз со витетӥ нылпи луэм: Никодим агайлэн ньыль агайёсыз но одӥг сузэрыз луэм на.

— Монэ та семьяе ож дыръя вордыны сётӥллям. Аслам вордэм анай-атаен ӧй буды мон. Со вал секыт сютэм аръёс. Жаляса, анай-атае монэ, одӥг но ӝыны аресъем пизэс, мукет семьялы вордыны оскем. Шонергес верано ке, мурт семьялы но ӧвӧл, асьмелэн ӵыжы-выжыосмылэн семьяязы ик, атайлэн сузэрезлэн семьяяз сётӥллям. Атайлэн сузэрез та юртэ картлы кошкыса улэм, соин аслам анай-атае кышкатэк сётӥллям монэ татчы. Анай-атае колхозын ужазы, мон соос вӧзын будӥ. Та юртэ монэ гинэ сётӥзы, родной агайёсы но сузэры анай-атаен улыны кылизы. Но озьы ке но, аслам вордэм анаелы но атаелы вожпотонэ ноку но ӧй вал. Мон соослы «бадӟым анай», «бадӟым атай» шуыса вазисько вал, ӵемысь соос дорын куноын луылӥ. Та юртысьёссэ анай но атай шуи. Кышнояськытозям но бадӟым анаен бадӟым атай доры ветлӥ. Соос но та гуртын ик улӥзы. Тӥни озьы, кык анаеным но кык атаеным ушъяськыны быгатӥсько, — тодаз вае Никодим агай. — Быдӟым атае 1-тӥ дунневыл оже пыриськыса бертӥз, со мӧйы вал ини, соин Быдӟым Атыкай оже сое ӧз ни басьтэ. Атае нош, Быдӟым тыложе пыриськыса, 1943-тӥ арын сӧсырмыса бертӥз.

Но мукет семьяе улыны сётэм бере, пичи Никодимлэн улонэз капчияз шуыса малпаны шонер уз луы. Аслаз агайёсыз, гуртысьтызы огъёзоосыз кадь ик, со но вань шуг-секытъёсты адӟе: та нылпи аслаз вордэм анай-атаез вӧзын уг буды шуыса, улон солы поблажкаос уг сёты...

— Милемыз пичи дырысен, дышетскон дыръя но ужато вал. Тодӥсько на, 9-тӥ классын дышетскыкумы, кукуруза кизьыны лэзизы. Со кукурузаез отраваен обработать кариллям вал, но ми, кӧтмы сюмамен, сое сузяса озьы ик сиимы. Школаысен ик етӥн ишкалляны ветлытӥзы: чабей, ӟег йыръёсты люкамы. Мазэ веранэз, пичи дыръя милемлы вуэ пырыны но ӧз йӧты — нюлэскысь бертыса но ӧм вуэ. Нюлэскысь пу нуллӥмы, турынлы ветлӥмы, нуналаз кык пол нюлэскы мынӥськомы вал, — веранзэ азьланьтэ Никодим Иванович.

Школаын сизьым классэ йылпумъямез бере, Никодим агай нокытчы дышетскыны уг ни пыры. Кызьы со ачиз вера, со дыре туж шер кин ке дышетскон юртэ пырыны быгатэм, пе. Кылсярысь, солэн классысьтыз нокин но дышетскыны кошкымтэ. Школаысь дышетсконзэ йылпумъяменыз валче егит пияш гуртаз кутьы возьманы кутске, ӧжыт ке но уксё мед луоз шуыса. Собере кӧня ке дыр ӵоже колхозын тырше, берлогес Урняке шофёрлы дышетскыны мынэ. Дышетскыса бертэмез бере, со арын ик Покчи Лӧзяын трактористлы дышетске. Собере Ленин нимо колхозын (али «Сурнай» общество) ужаны кутске. «Беларус» тракторен ужа, сизьым ар ӵоже зурод люкан машинаен (стогометатель) тырше. Бусы ужез аслэсьтыз вить чиньызэ кадь умой тодэ Никодим агай. Дас ар со удысын ужамез бере, воргорон фермае ужаны выже. Отын пенсие потытозяз, 24 ар ӵоже, слесарь луыса тырше. Никодим Иванович, Ленин нимо колхозын вылӥ ужан показательёсы вутскемез понна, Почёт книгае пыртэмын. Ужзэ яратэм ке но, соин герӟаськем вутсконъёсыныз со ушъяськыны уг яраты.

— Аслэсьтым ужме мон яратӥ. Яратымтэ ужын сомында ар ӵоже кужым сётыса ужаны ӧй быгатысал, дыр. Куке уждэ яратӥськод, ваньмыз умойгес но пӧрме кадь, — шуэ Никодим агай. 

Галина Миронова: «Фермаын ужан характерам пытьызэ кельтӥз»

Миронова (Матвеева) Галина Васильевна 1943-тӥ арын Сизнер гуртын вордскемын.

— Нылпи дыре со дырысь пиналъёслэсь ӧз висъяськы. Анаймы колхозын ужаз. Со Вылын Ушма гуртысь вал. Атаймы, Сизнер гуртысь Василий Матвеев, 1938-тӥ арын Покчи Лӧзя гуртысь сельсоветын ужам. Отын ик анаен тодматскиллям но семья кылдытӥллям, Сизнере улыны выжиллям, — анай-атаез сярысь вера Галина Васильевна.

Сютэм но секыт ож бере аръёсы егит ныл Ципьяысь удмурт школаын 10 классэз йылпумъяны быгатэ. Со дыре школаын 10 ар дышетскемъёс трос ӧй вал бере, нимысьтыз дышетскемез ӧй вал ке но, Галина Васильевнаез Покчи Лӧзяысь школае ужаны лэзё.

— Школаын ужаны кутскеме бере нырысетӥ классэ мон доры 33 нылпи лыктӥз, али кадь тодӥсько. Дышетскисьёсы но ачим кадь етӥз, чырткем луизы, — серекъяса тодаз вае Галина Васильевна школаын ужам аръёссэ. — Али но со дышетскисьёсты нимъёссыя тодӥсько. Школаын куинь ар гинэ ужаны вутски ке но, та уж сюлмам шуныт тодэ ваёнъёс гинэ кельтӥз.

Куамын одӥг аресэн Галина Васильевнаез Вылын Ушма гуртысь фермае заведующий карыса ужаны тодмосто. Та уж борды тодытэк-валатэк, кышкаса ке но, Галя апай басьтӥське.

— Монэ, егит кышномуртэз, фермаен кивалтыны пуктӥзы. Ужаны мылкыды вань вал, но кышканэ но луиз. Вылаз ик ят гурт мон понна, адями монэ уг тоды, мон адямиосты уг тодӥськы шуыны луэ… Куке мон фермае ужаны пыри, отын вал 720 йыр пудо. 180 кысконо скалъёс трос йӧл сётӥзы. Со туж трос вал. 1980-тӥ арын фермалы выль корпус лэсьтӥзы. Пудо йырлэн лыдыз 1245 луиз… Малпаса утьы. Уж секыт, ваньзэ киын быдэстоно вал. Мон дорын гинэ но 45 мурт ужаз. Котькудӥныз огъя кыл шедьтыса, тупаса ужаны тырши. Куддыръя небытгес, куддыръя кужмогес вазьыны но тупаз. Мон ужан дыръя Хакимулла Сибагатуллин «Сурнай» обществолэн кивалтӥсез вал.  Со туж кылкутӥсь, вань кужымзэ сётыса ужаны быгатӥсь кивалтӥсь вал. Хакимулла Сибагатуллович кивалтон вакытэ милям гуртысь фермамы котьку азьмынӥсьёслэн радазы вал. «Татарстан» нырысетӥ луэ вал, нош ми — кыкетӥ. Та туж шумпотымон вал. Берло ужам аръёсы (пенсие мон 1998-тӥ арын потӥ) мӧйыос ужысь кошкылӥзы, соос интые егитъёс лыктыны кутскизы, — фермаен кивалтэм аръёсыз сярысь тодаз вае Галина Васильевна. 

Паймымон но синмаськымон: егит нылкышно ужез шоры сокем кылкутыса учкем, кивалтэтэз но сое гажам. Шаплы кышномурт 1980-тӥ арын Буинскысь ветеринарной техникумез но йылпумъям. Галя апай Азьмынӥсьёслэн слётысьтызы но ноку кыльымтэ. Ужзэ пыр-поч быдэсъясь фермалэсь заведующийзэ ёрос кивалтэт но умой тодэм, ӵемысь сое примере пуктылэм. Фермаын сомында ар ӵоже азинлыко ужамез бере, Галина Васильевналэн со аръёсы басьтэм трос грамотаосыз но вань. Соосты Галя апай утьыса возе. Галина Васильевна — Ужысь ветеран, Татарстанысь сӥё-дано пудо-живот вордӥсь. Но кызьы со ачиз ватытэк вера, сыӵе вормонъёсы вутскон солы капчиен сётскымтэ.

— Туж секыт вал. Ас дыраз вань кужмез ужлы сётыны тупаз. Фермаын ужан характерам но аслэсьтыз пытьызэ кельтӥз — сямы чурытгес луиз, — шуэ Галина Васильевна.

Ваче ки кутӥськыса

Никодим агай но Галя апай 1965-тӥ арын семья кылдыто. Галя апайлэн анаез Вылын Ушмаысь луэм бере, со егит дырысеныз та гуртэ куное вуылэм. Озьы ик тодматскиллям.

— Галя Покчи Лӧзяын ужакуз Улын Ушмаын квартираын улэ вал. Мон кема ӧй малпаськы, сое кураны мынӥ. Мон сое яратыса кышно басьтӥ, али но туж яратӥсько, — пальпотыса вераськонамы итӥське Никодим агай.

Сыӵе кылъёсты кылэмез бере, Галя апай но пальпотыса серекъяз. Шӧдске: со но кузпалзэ туж яратэ.

Мироновъёслэн кык нылпизы вань — Вячеслав но Наталья. Туннэ нуналэ пизы анай-атаеныз одӥг юртын улэ, Наталья — аслаз семьяеныз Сырьяын.

— Туннэ нуналэ тани тазьы улӥськомы ини, — шуэ Галя апай. — Ас даурамы кыкнамы но трос ужамы, трос аръёсмес гурт удыслы сӥзимы. Табере — дано шутэтсконын. Пудо но ум вордӥське ни. Номыр мултэсэз кулэ ӧвӧл, луэмезлы шумпотыса улӥськомы. Тазьы улӥмы ке, Инмарлы тау, — шуэ Галина Васильевна.

Туннэ нуналэ кузпалъёс зэмзэ но улонзылы шумпотыса улыны быгато. Пизы вӧзазы, нылзы но куное бертылэ, внукъёссы но, правнукъёссы но соос доры вуыло.  Соослэн яратэмзы, гажамзы Мироновъёс понна валтӥсь шумпотон луэ.