Нырысь ик со дышетӥсь вал

5-тӥ южтолэзе аспалмылэн, тодмо удмурт гожъяськисьлэн Григорий Сергеевич Медведевлэн вордскемез дырысен 119 ар тырме.
Григорий Медведев шуыку, нырысь ик син азе пуксе Покчи Лӧзя гурт но «Лӧзя бесмен» трилогия. (Ма, со валамон но: гожъяськись Покчи Лӧзяын вордскиз уга, тужгес бадӟым произведениез но «Лӧзя бесмен» луэ). Нош данъяськымон аспалмылэн нырысь ик дышетӥсь луэмез сярысь ӵемысь тодамы ум вайиське. 1925-тӥ арын, Можга педтехникумез йылпумъямез бере, Г.С. Медведевез Можга ёросысь Бадӟым Кибья школае дышетыны ысто. Отын 2 ар ужамез бере, 1927-тӥ арын сое Шарканысь ШКМ-е директоре юнмато. Отын ужакуз, егит директор трос сюлмаськем дышетӥсьёслэсь гурт калыкен кусыпъёссэс умоятон сярысь, егитъёсты пӧртэм самодеятельной кружокъёсы кыскылэм. Солэн тыршеменыз Шаркан черкогуртын нырысетӥез футбольной команда но кылдэм.
Григорий Сергеевичлэн кузпалэз но, Клавдия Кирилловна, дышетӥсь луэм. Эмилия нылзы но анай-атаезлэн пытьытӥзы кошкем: ӧнерезъя логопед луэм, Глазовысь педагогической институтын логопедияя лекциос лыдӟем. Нош кузпалэз, Виктор Евстафьев, со ик институтын ректор луыса ужам.
— Выжыязы дышетон удысын тыршемъёс шӧдскымон трос, — шуэ Наталия Антонова, Медведевъёслэсь выжы писпузэс рос-прос эскерон борды басьтӥськемзы сярысь вераса. Покчи Лӧзя школаын трос аръёс ӵоже ӟуч кылъя но литературая дышетэм Медведева Валентина Ивановна но та писпулэн одӥг ваез луэ (писательлэн Анастасия апаезлэн нылыз). Но туннэ нуналлы тужгес трос дышетӥсьёс Г.С. Медведевлэн Наталья апаезлэн выжыяз. Солэн Мария нылыз но, Кузьма пиез но улонзэс школалы сӥзем муртъёс вылӥллям. Кузьма Семёнович Ӟаны но Вуж Кушкет гуртъёсын ӟуч кылъя но литературая дышетэм. Солэсь сюрессэ Ираида нылыз азинтэ: дышетӥсь но луэ, визьнодан удысын но тырше.
Мария Семёновна гумыраз школа библиотекаын ужа. Кузпалэз историен дышетӥсь Иван Дмитриевич Гришкин 15 ар ӵоже Ӟаны школаен кивалтэ, гажано дышетӥсь луэ. Соослэсь ужзэс азинтэ покчи нылзы — Нелли Ивановна Понуркина. 35 ар луоз ини туэ солэн Ципья шоръёзо школаын ӟуч кылъя но литературая урокъёсты нуыны кутскемезлы. Со пӧлысь 14 арзэ дышетон ужпумъёсъя директорлэн воштӥсез но луэ. Анаезлэсь ӧнерзэ быръем Нелли Ивановналэн Дмитрий пиез но. Со но тани кыкетӥ арзэ ини Ципья шоръёзо школаын дышетэ. Шумпотымон, озьыен, Г.С. Медведев бордысен кутскем дышетӥсьёслэн выжызы азинске но пушъе, дышетӥсьлэн данэз уг ышы.
Ольга Плотникова