«Ог-огедлэсь кылзӥськыса улоно»

Шумпотымон, берло дыре шаерамы семьяослы, семья дунлыкъёслы бадӟым саклык висъяны кутскизы шуыса. Дырпусамы семьялы но солэн валтӥсь тодметъёсызлы – яратонлы но осконлыклы – сӥзем праздникмы но вань. Адӟем карымон семьяосты сӥлы карон понна нимысьтыз медаль но кылдытэмын.

Мазэ веранэз, лыдъяны кутскид ке, шаерамы данъямон семьяос трос потозы, ваньзылы медаль но уз тырмы, вылды. Но ужпум медаль бордын гинэ шат? Тужгес бадӟым данъет та кузпалъёс понна – ог-огзэс яратыса но гажаса улэм шудо аръёс, нылпиос но внукъёс, огъя вераса, семья.

Гондыргуртысь Зинаида но Александр Никифоровъёс но асьсэды шудо семья шуыны быгато: туэ соос ӵошен улыны кутскемзылы 50 ар тырмонэз пусъё, вӧзазы яратоно нылпиоссы, муспотон нунокъёссы.

Ма бордысен кутске семья? Нырысь ик егитъёс ог-огзылы синмасько.

– Тямысэтӥ классын дышетскыкум, Сандыр бызьылӥз ни мон сьӧры, – шуэ Зинаида Макаровна.

– Начальной школаын дышетскыкумы ик ини, Макаровна бере, «с макароном суп варили» шуыса исаса ветлӥсько вал мон сое, – серекъяса шонертон пыртэ Александр Владимирович.

Зинаида Макаровна вордске 1953-тӥ арын 26-тӥ южтолэзе Ярак-Чурма гуртын, нош Александр Владимирович вордске со ик арын 2-тӥ шуркынмонэ Гондыргуртын. Кузпалъёс ог-огзэс дышетскон аръёсысен тодо, малы ке шуоно одӥг школаын дышетско. Со аръёсы кык артысь гуртъёсысь пиналъёс Гондыргурт школаын тодон-валан басьтӥллям.

Аръёс ортчо, нылпиос быдэ вуо, яратон кусыпъёссы юнмало, 1973-тӥ арын егитъёс кузпалъясько.

–1973-тӥ арын кышнояськимы. Удмуртъёслэн обычайзы сыӵе ук — лушкаса ваёно. Валэ пуктыса, Выль ар дыръя вайи, – маде Александр Владимирович.

– Выль арез пумитаськеммы вал. Мон библиотекаын ужасько вал али соку. Юлтошъёсыз келяса, пе, кельтом но, собере мон тонэ обратно, пе, васькытӥсько. Васькытоз на ни! Кенешиллям ини соос азьвыл, – кузпалэз шоры мусо учкыса вера Зинаида Макаровна.

– Удмурт сюан каримы. Ми бере сыӵе сюан карись ӧз луы ини. Выль ар дыръя пыртӥзы монэ, 8 мартэ сюан каримы, 1 сентябре сельсоветэ мыныса гожтӥськимы, – азинтэ веранзэ Зина апай.

Дыр ортче, семья бадӟыма, корказэс шулдыртыса нылпиоссы вордско.

– Ньыль нылпимы милям — Галя, Лена, Наташа но Эдик. Кык нылъёсмы, Галя но Лена, асьме гуртамы, асьсэ семьяосынызы уло. Наташа нылмы Соснаын улэ, бигерлы картлы кошкиз. Туж умой, тупаса уло. Эмеспиосмы но, Николай, Василий но Ильдус, ушъямонэсь, котьку юртто милемлы. Огазе улӥськом, ӵош. Эдик пимы, Лариса кенмы но соослэн куинь нылпиоссы (ныл но кык пи) вӧзамы. Инмарлы тау шуыса улоно. Туннэ нуналэ 6 внукмы, 7 внучкамы, 2 правнучкамы, 1 правнукмы но вань ини, – шумпотэмзэ ватытэк вера Зинаида Макаровна.

Ужан сюрессэс но кузпалъёс ӵош кутскиллям, 1970-тӥ арын. Александр Владимирович ветврач луыса, нош Зинаида Макаровна гуртысьтызы библиотекаын ужаны кутскем.

– 9-тӥ классэ мынӥ вал мон Балтасе. Но семейной положение но сыӵегес луиз ини. Секыт вал ук соку, уксё ӧй вал. Собере колхоз направлениен Елабугае дышетскыны лэзиз. Отчы мынӥ, отын ветфельдшерлы дышетскыса бертӥ. 1970-тӥ арын ужаны кутски. Колхозын соку огнам ветврач вал али. Быдэс колхоз кузя валэн ветлӥ. Укмыс ар ужай ветврачын. Собере Ярак-Чурмаысь парсь фермае завферма каризы ини. Отын 20 ар ужай. Берло эшшо со ик фермаын ветфельдшер луыса ужай. Нош отысен ини, чассэ-минутсэ тырмытыса, пенсие потӥ. Быдэс гумырлы шуэм сямен огпол отпуск басьтӥ но октябрь толэзе. Ӧтё вал ке но али, ужа шуыса, ӧй мыны ини. Тӥни озьы гумыры фермаын ортчиз. Огъя 43 ар ужам стаж мынам, – ужан сюресэныз тодматэ Александр Владимирович.

– Мон но 1970-тӥ арын ужаны кутски. Со (Александр Владимирович – ред.) дышетскыса бертыса пыриз ини, мон дасэз быдтэм бере. Монэ сельсовет пыртӥз. Отын ужаку заочно дышетскыны пыри культпросвет училищее. Сое заочно быдтыса, 23 ар ужай библиотекаын. Собере, ньылетӥ нылпимы вордскем бере, отчы мынэме ӧз поты ни, ӝыт но ветлоно ук отчы. Фермае интыяськи, отын ужай эшшо 15 ар, ошъёсты сюдӥ. Отысен пенсие потӥ, – шуэ Зинаида Макаровна.

Туннэ нуналэ Никифоровъёслэн юртазы куинь поколение тупаса улэ. Трос пудо вордо, скалъёссы, кунянъёссы, валзы гинэ но вань вылэм.

– Кызьы ужаны кутски, со дырысен валэн мон. Бакчаос начаресь милям, тракторен ветлымон ӧвӧл, гожтыны но валтэк уг луы. Гопъёс, шуръёс вань ук милям… Лапасысь пырыса ум вуиське, турын дасян времяе турын турнаськом, та ужъёсын дорамы улӥсь Валентин выны но юрттэ, – шуэ Сандыр агай. Самой покчи внуксы гинэ но юрттӥське вылэм ини: бабаез сьӧрын ветлэ, ӵукна куать часэн ик чипы сюдыны потэ, пе. Туж шумпотымон, куке покчиос арлыдоослы юртто. Эсьма, асьсэос но ужаны дышо, семья кусыпъёс но юнмало.

Валче кема улӥсь кузпалъёслы котьку сямен таӵе юан сётӥськом: шудо семья луон понна ма кулэ но туала егит семьяослы семьязэс утён понна кыӵе кенеш сётысалды?

Валэктонзэс кема витёно ӧз луы.

– Ог-огедлэсь кылзиськыса улоно, ваче пумит сылоно ӧвӧл, яратыса улоно, ог-огедлы уступать кароно. Тани, кылсярысь, Сандыр чурытгес вазиз ке, мон ӧжыт лябӟисько ини. Ми котькытчы кыкнамы ӵошен ветлӥськомы, одӥг празднике но огназ ӧз ветлы со, котьку ӵош, вань ужъёсты но ӵошен ужаськомы. Туннэ нуналэ, Инмарлы тау, шудо улӥськомы шуыса шумпотӥсько. Азьланяз но озьы медло вал, – кузпалэз шоры таукарись синъёсын учкыса вера Зина апай. Шӧдске, кузпалъёс ог-огзэс пал кылысен валало.

– Луо котькуд семьяын кадь милям но пичи керетонъёс. Вазем уг поты ни отӥ-татӥ. Ну татэк (кузпалэзтэк – ред.) улэме уг луы ини мынам, уг луы, – мылкыдъёссэ шара усьтэ Зинаида Макаровна.

Зэм, юн семьялэн инъетэз – яратон. Яратон – со ог-огед сярысь сюлмаськон но, ог-огдэ утён но, валан но, жалян но, гажан но. Никифоровъёслэн семьяязы соиз но, таиз но, куинетӥез но вань шуыса шӧдӥське. Дауръёс ортчыса но медаз быры семьялэн кулэлыкез но дунлыкез.