Хезмәт

«Ог-огмытэк улыны ум быгатӥське…»

Вуж Кушкет гуртысь Клеймёновъёслэн эшлыко но адӟем карымон семьяенызы тодматскимы.

Гуртын котькуд семья — син азьын. Ваньзы шуымон гуртын улӥсьёс ог-огзы сярысь троссэ тодо: кин ку кышнояськем но картлы кошкем, кинлэн кӧня нылпиоссы, кызьы соос дышетско, кин — ужась, кин — азьтэм… Ваньзэ тодо, вакчияк вераса.

Вуж Кушкет гуртысь Клеймёновъёсты гуртазы ваньзы гажало вылэм.  Ужась, тыршись, юрттыны дась луись — огъя вераса, ваньмыз ласянь адӟем карымон семья. Семьялэн главаез — Виталий Аркадьевич — “Яна тормышын” тырше, Кушкет гуртысь амбарын машинист луыса ужа. Кышноез Татьяна Михайловна туннэ нуналэ Шор Кушкет  гуртысь нылпи садын сиён пӧзьтӥсьлэн юрттӥсез луэ, со сяна, Вуж Кушкетын почтальон луыса но ужа. Но со дырозь трос интыужъёсын ассэ утёно луэ егит нылкышнолы. Вераськонмес со бордысен ик кутскимы.

Татьяна Михайловна Вылын Ушма гуртын вордскем. Казаньысь связья электротехникумын дышетскыса, со вордскем гуртаз бертэм но Покчи Лӧзяысь почта ёзэтын кӧня ке дыр ӵоже ужам. Собере огдырлы Ӟаны гуртысь почтае ужаны интыяськем. Татын ужакуз, вуоно кузпалэныз но тодматскем. Егитъёс 2001-тӥ арын кузпалъяськиллям. Нялтас вераса, кӧня ке толэзьскын Клеймёновъёслэн семья кылдытэмзылы 20 ар но луоз. Татьяна Михайловна картлы кошкемез бере кытын но ужамтэ: амбарын но, столовойын но, Ӟаны школаын выж миськись но луэм. 

— 2003-тӥ арозь пӧртэм интыосын ужай, собере декретэ потӥ, Кирилл пимы вордскиз. 2006-тӥ арын Ӟаны гуртысь садикын покчи воспитатель луыса ужай, пиме но сьӧрам ветлытӥ нылпи садэ. Али дыре почтаын но нылпи садын ужасько, — вера Татьяна.

Реклама

Кирилл пизылы 17 арес ини. Жаляса верано, висёнэз луэмысь, со али дыре уг ветлы. Но со шоры учкытэк, Кирилл — визьмо но тыршись пияш. Кӧня ке ар талэсь азьло со боччаен вырыны кутскем. Пияшлэсь быгатонлыкъёссэ нырысь тренер Фагиль Гайнутдинов синйылтэм но анай-атаезлы та сярысь верам. Кириллэн нырысь тунсыкъяськонэз луымтэ ке но, со каллен боччае кыстӥськыны кутскем. “Бочча мыным кельшыны кутске ини. Куке ӵошатсконъёсын вормиськод, мылкыд карон, кулэ карон, тунсыкъяськон кылдыны кутске. Аслыд оскон, со сяна, анай-атайлэн юрттэмез, тренерезлэн оскемез ӵошатсконъёсын вылӥ вормонъёсы вутскыны юртто”, — шуэ Кирилл. Со али кемалась ӧвӧл гинэ боччаен шудэ ке но, солэн вормонъёсыз шумпотто ини. Туэ октябрь толэзе боччая ТР-лэн первенствояз Кирилл 2-тӥ инты басьтӥз, табере со дасяськоз Россилэн первенствояз мыныны — вожвылъяськон вуоно арын ортчыны кулэ. Егит пи мыло-кыдо пыриське боччая ёросын, ёрослэн палэназ ортчись ӵошатсконъёсы но. Туннэ нуналэ Кирилл Сабаысь аграрной колледжын бухгалтерлы дышетске. Со яратэ пуэз сутыса чеберманы (выжигать карыны), кино учкыны но, музыка кылзӥськыны но кельше солы. Огъя вераса, огъёзоосызлэсь Кирилл номаин уг висъяськы, быгатонлыкъёсыныз гинэ ке. Анай-атаез, соосын ӵош улӥсь песяез Антонина Валентиновна (туннэ нуналэ нылкышно пенсиын ини, кема аръёс ӵоже колхозын  осеменатор луыса ужам) — Кириллэн самой матысь адямиосыз, солэн эшъёсыз. Семьяез Кириллы ваньмыз ласянь юрттыны, пыкет луыны тырше.

— Ми Кириллэн висись, мукет нылпиослэсь маин ке но висъяськись нылпиен кадь ум вераськиське. Со милям яратоно одӥг гинэ пимы. Солэн вормонъёсыз, шумпотонъёсыз ми понна куинь полэс шумпотон ваё, — шуо анаен атай.

Куашкам мылкыдзэс, сюлмаськон-куректонъёссэс нокыӵе анай-атайлэн но нылпиезлы возьматэмез уг поты. Клеймёновъёслэн но озьы ик. Ӝожтӥськыны но соос уг ярато. «Ог-огмытэк улыны ум быгатӥське, котьку ӵош луыны, ог-огмылы ваньмыз ласянь оскон но пыкет луыны тыршиськомы», — шуэ Татьяна.

Матын каро Клеймёновъёс спорт улонэз но. Татьяна Михайловна но, Виталий Аркадьевич но куасэн ветлыны ярато. Кириллэз но спортэ кыскемзы потэ соослэн. Шумпотымон, та соослэн пӧрме но — Кирилл боччаен мылыз потыса выре. Кин тодэ, Кириллэн вормонъёсыз сярысь газет бамъёсамы, оло, трос пол гожъяломы, дыр, али…

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: