«Огазе уломе та шулдыр дуннеын!» (3 люкет)

Адями — дуннелэн валтӥсь тодметэз но валтӥсь дунлыкез. Кызьы адями та улонэз капчиятэ, озьы адями ик сое сӧрыны но быгатэ. Туала дуннеын кылдэм югдурлы та юн зэматон (доказательство) луэ.

Спорт

Спорт — улонын эшшо одӥгез кулэ луись удыс. Адямилэн тазалыкез, мугор кыдамез но юнмамез нырысь ик адямилэн кема улонэныз герӟаське. Спортэн тунсыкъяськон со мугор кыдатон уж гинэ ӧвӧл, со — мылкыд ӝутон но, эшъяськон но.

Туала егитъёс пӧлын валтӥсь луэ кельшись спортэн тунсыкъяськон. Таза улон сям — егитъёс понна нырысетӥ интыын луыны кутскиз. Шаерамы нуналысен нуналэ выль спорт ӧръёс кылдо. Егитъёс сяна, арлыдэ вуэмъёс но мылысь-кыдысь пырисько, егитъёслэсь палэнэ уг кылё. 
Кылсярысь, ог 3 ар пала ёросамы туж дано луиз выль ӧр — Jumping (Джампинг) — батут вылын тэтчан. Мугорзылы саклык висъясь нылкышноос понна кылдытэм кардиотренировкаос весэз куштыны юртто, мугор люкетъёсыз юнмато, кужымез будэто. Ёросамы та спортэз азинтӥсьёслэн одӥгез — Рания Коробицкая. Солэн площадкаосыз Покчи Лӧзя, Ципья гуртъёсын, озьы ик Арча карын интыяськемын. Пыриськисьёсыз трос, вормонъёссы но ӧжыт ӧвӧл.

Ма веранэз, Рания озьы ик эшлыко улэ семья пушказ но. Кузпалэз — ӟуч пияш, Александр. Осконъёссы пӧртэм шуыса сюлмаськонъёссы но керетонъёссы уг кылдо, вань ужъёсын ог-огзылы юн пыкет но юрттӥсь луо. Праздникъёсты но огазе ортчыто. Адӟем карымон семьялэн азьланяз но сыӵе ик юн герӟетсы мед луоз!

Данъяськымон адямиосын тырмемын ёросмы! Соос мылысь-кыдысь пырисько котькуд спорт ужрадъёсы, ӵошатсконъёсын призо интыос басьто, вормись луо. Ёрослэн вутсконъёсыз элькунын но, быдэс шаерамы но данэн тодмостӥсько.

Нылпиос понна но выль спортивной площадкаос лэсьтӥсько, арысен аре выль пӧртэм секциос усьтӥсько. Туж шумпотымон, котькуд площадкаын гужембыт кылӥсько куараос. Нылпиослэн спортэн тунсыкъяськемзы юн герӟет кылдытэ азьланяз тазалыкез утёнэн. Соос асьсэос валало — таза улон сям трос улон аръёс сётэ.

Данъяськымон, вожвылъяськонъёсы пӧртэм гуртъёсысь, пӧртэм кылын вераськисьёс пырисько. Эшшо одӥг юнматон: вормонъёсы но пӧртэм кылын вераськись спортсменъёс вутскыны быгато.

Дышетскон

Дышетскон удысын арысен аре куронъёс чурытгес луо. Гурт нылпиос карысь нылпиос радэ султэмын ни, кытынын одӥг ке азьпала но кошкемын. Нылпиослэн лыдзы трос ӧвӧл ке но, дышетӥсьёс нуналысь нуналэ тыршо нылпиосты зэмос улонлы дасяны но вань юанъёсты зэмос улонысь учыръёсын юнматыны.

Школаос но туннэ нуналэ одӥг калыкъем нылпиосын тырмемын шуыны уг луы. Вордскем кыл дышетон улсын, программае пыртӥсько на мукет калыкъёслэн лулчеберетсы, фольклорзы.
Котькуд дышетӥсь вала — нылпилэн азьлань сюресэз одӥг кыл вылэ гинэ пыкиськыны уг быгаты. Макем трос кылъёсты тодӥськод, сокем сюресэд паськыта. Нош мукет калыклэсь сям-йылолъёссэ тодӥд ке, тон трослы гажамон адями луиськод. 

Туэ понна визьнодан но тодон-валан сётон сӧзнэтын нылпиослэсь йӧскалык асваланзэс ӝутэмзы но вордскем кылэз яратон мылкыд пыӵатэмзы понна «Анай кылъёсты, лулчеберетъёсты, сям-йылолъёсты утем но азинтэм понна» гадьпусэн пусъемын вал О.Н. Исаев нимо Шор Кушкет шоръёзо школалэн директорез Константин Грахов, Улисьял покчиёзо школа-нылпи садысь покчи классъёсты дышетӥсь Ольга Иванова но Сосна валтӥсь школаысь вордскем (бигер) кылъя но литературая дышетӥсь Гузалия Валиева. Нимысьтыз гадьпус зэмзэ ик калыкъёсты огазеясь но ӝутӥсь мылкыдын ужасьёслы сётэмын вал.

Огъя вераса — калыклэн огазеяськонэз, тупаса улэмез — туала улонлэн валтӥсь тодметэз. Адями пӧртэм луиз ке но, осконъёс котькуд калыклы одӥг. Котькуд оскон дышетэ гажаны, яратыны, тупаса улыны, юрттыны, вордскем шаерез данъяны но утьыны. Бигер-а тон, удмурт-а, пор-а яке ӟуч-а — пӧртэмез ӧвӧл, валтӥсез — улонын зэмос адями луон но шаермылы пайда карон! Ӵошен огкылысь улыса гинэ дуннеысь котькуд адями шудо но эрико улыны быгатоз!