«Пересьмон даурам но, Инмарлы тау, улонэ каньыл но шудо», — шуэ песянай

Антонида Клеймёновалы — 90 арес

26-тӥ толшоре Вуж Кушкет гуртын улӥсь Клеймёнова Антонида Михайловна 90 аресъем юбилейзэ пусйиз. Юбилярез вордскем нуналэныз ӟечкыланы вуизы ёросысь но интыысь кивалтэтысь представительёс, куное бертӥллям вал песянайлэн нылпиосыз но.

Антонида апай вордскемезъя Сырья гуртысь луэ вылэм. Вань огъёзъёсызлэн кадь, солэн но улонэз капчи луымтэ. Та сярысь люкаськем куноослы юбиляр ачиз мадиз.

— Покчи классъёсын дышетскыкумы ик, милемлы туж трос ужаны тупаз — жугиськон дыръёс вал ук. Дышетскыны но пыр-поч ӧм быгатэ. Усыямы, гыримы, кизимы — вань ужъёс егитъёс но нылпиос вылын вал соку. Октон-калтон дыръя со ужъёсын выримы, собере — нюлэскын ужан. Ож бере улон ӧжыт воштӥськиз, капчияз ке но (кылсярысь, колхозъёсы комбайнъёс бертылыны кутскизы), трос ужаны тупаз киын но. Туж секыт вал, вераса быдтыны но уг луы сое ваньзэ, — тодаз вае Антонида Михайловна. 

Жугиськон бырыку, Антонида сизьыметӥ классэз йылпумъям. Дышетсконзэ азьланьтон сярысь малпанъёсыз луымтэзы ни — атаез но ожысь берытскымтэ, анайзы но туж кужмо висьылэм.

— Вить нылпи вал ми… Но ваньзы пӧлысь ми агаеным кыкнамы гинэ кылимы. Туж секыт вал ини, анай но, тазалыкез лябӟемен, кема улыны ӧз быгаты. Вазь ик сирота кыли мон.., — пичи дыръёссэ синкылиоссэ ватыны тыршыса тодаз вае Антонида апай. — Кинъёслэн атайёссы ожысь бертӥзы, кызьы ке но дышетсконзэс азьланьтыны быгатӥзы али, мон мыныны быгатытэк кыли ини. Ож бырем бере но капчи луиз шуыны шонер уз луы. Огъя вераса, гумырам секыт ужын тыршыны тупаз, пинал дырысен пенсие потытозь но.

Вуж Кушкетэ картлы кошкемез бере но, Антонида апай гуртысь колхозэ ужаны интыяське. Кытчы ужаны лэзё, мар карыны косо — ваньзэ быдэстэ. Пенсие фермаысен потэ.

Антонида Михайловналэн куинь нылпиосыз вань — Людмила, Ольга, Пётр. Куиньназы но соос туннэ нуналэ ас семьяосынызы Ижевскын уло. Ӵемысь анайзы доры куное бертыло. Анайзэс котырес лыдпусэнызы ӟечкыласа, ӝӧк куспы люкаськем нылпиосыз шуизы:

— Туннэ милям яратоно анаймылэн вордскем нуналэз. Ми вань сюлмысен анаймес юбилееныз ӟечкыласькомы но сӥзиськомы солы тазалык, шудбур но кема-кема улыны! Анаймы, ми котьку вӧзад луомы, тон милям самой яратоно адямимы, котьку шудо луы. Тон шудо мед луод шуыса, ми тыршомы. Тон доры ӵемгес куное бертылыны тыршомы. Туж бадӟым тау тыныд милемыз визьнодамед понна, ми тонэ туж яратӥськомы, гажаськомы, ваньмыз понна тау кариськомы. Тон котьку ми понна сюлмаськид, ачид сярысь малпаськытэк, туж трос ужад. Табере ми тон сярысь сюлмаськомы. 

Сыӵе кылъёсты кылэмез бере, Антонида апай мылкыдъёссэ ватыны ӧз быгаты ни. Шӧдске, со пиналъёсыныз туж данъяське. 

— Нылпиосы Ижкарын уло, монэ доразы ӧтё. Нош мынам кошкеме уг поты, гумыре ӵоже колхозын ужаса, гуртын улыса, пересьмон даурам городэ кошкеме уг поты. Яра али нылпиосы бертыло, монэ уг кельто, уг кушто, уг вунэто. Туж бадӟым тау шуэме потэ социальной ужасьлы Римма Павловалы. Нылпиосы котьку вӧзам ӧвӧл бере, юрттӥсьтэк куддыр уг луы. Римма котьку татын. Нуналаз олокӧня пол но лыктыны быгатэ. Кузпалэным но ӵош тупаса улӥмы, ньыль нылпи будэтӥмы, одӥг пимы кулӥз ини... Песяен бабаймы но вань вал, соосты но ути, кур ӧй кары, котьку огъя кыл шедьтыса, тупаса улӥмы. Тӥни озьы улӥ… Пересьмон даурам но, Инмарлы тау, улонэ каньыл но шудо. Котьку но озьы мед луысал, — шуэ Антонида апай.