Семык шулдыръяськон

Семык праздник асьме калыклэн улоназ нимысьтыз инты басьтэ шуыса верай ке, янгыш уз луы, дыр. Асьмеос туж яратӥськом но сӥлы кариськом Семыкез. Кулэм ӵыжы-выжыосты буре ваён нунал луэмез сяна, со эшшо матысь ӵыжыосын но кемалась адскымтэ эшъёсын, гуртоосын пумиськыса сюлмысь вераськыны, тодэ ваёнъёсты выльдыны луонлык кылдытэменыз но дуно луэ.

Нош берло аръёсы Семык праздникез витён понна эшшо одӥг муг кылдӥз — со Гуртлэн нуналэз. Угось ӵапак Семык нуналэ — гуртоос, бертэм куноос огазе люкаськыку — тыршо та выль малпам шулдыръяськонэз ортчытыны. Выль малпам шуиськом ке но, пуштросэзъя со Гырон быдтонлы но кельше, песянай-песятайёсмылэсь Семык возьвылзэс но тодэ вайытэ. Гуртлэн нуналэз шуыку, одно ик Кушкет гурт йыре лыктэ. Угось ӵапак та гуртын нырысетӥзэ клубен кивалтӥсьсылэн Щербакова Светлана Петровналэн но гуртысь азьветлӥсьёслэн тыршемзылы луыса радъямын вал таӵе шулдыр ужрад.

Туэ но туж шулдыр ортчем Семык шумот Кушкет гуртын. Люкаськиллям вань гуртооссы, бертэм кунооссы: пиналэз но, егитэз но, арлыдоез но. Палэнысь гуртъёсысь но гажаса лыктӥллям. Янгулъёсын эшлыко кусып возё бере, со гуртысь но лыктэмъёс трос луиллям. Ваньзэсты сюлмысь гажаса пумиталлям ческыт нянен но удмурт аракен. Рос-прос дасяськиллям кушкетъёс. Чебер инкуазь сэрегын ӝук пӧзьтыса, табань пыжыса, кырӟаса-эктыса, пӧртэм шудонъёсы, конкурсъёсы пыриськыса шулдыръяськиллям гурт калык но лыктэм куноос.

 «Ваньмыз вал татын: ческыт ӝук, плов, табань, пайдаё турын-куаръёсын чай, шулдыр концерт. Концерт бере тунсыко шудонъёс ортчизы: куинь кузя султыса куасэн бызьылӥзы, пуйыен бызьылӥзы, пу вандӥзы... Одӥгез тужгес тунсыкоез конкурс сюлоен конкурс вал. Со тросэзлы кельшиз. Сюлоен нимысьтыз шуккем ӵог бордысь арбериез уськытыны кулэ вал. Котьку сямен, парсьпи кутӥзы. «Яна тормыш» общество та ужрадлы кык парсьпи висъям. Атас кутӥзы. Пичиос но мӧзмыса ӧз пуке, соос понна но тунсыко шудонъёс радъямын вал», — шуо Кушкет гуртысь шулдыръяськонэ пыриськем адямиос.

Котьку сямен, гуртысь тужгес мӧйы адямиосты но пусйиллям. Берло вордскем нылпиос сярысь но, выпускникъёсты но вунэтӥллямтэ. Тужгес егит семья пусйиськем, валче кема улэм паръёсты данъяллям... Огъя вераса, нокинэ но кур кариллямтэ.

Та ужрадлэсь вылӥ уровеньын ортчемзэ сӥё-дано куноослэн пыриськемзы но юнматэ. Асьсэлэсь гажамзэс возьматыса, ужрадэ пыриськизы «Яна тормыш» обществолэн директорез Магсумзян Равилевич Сайфутдинов, Янгул гурт поселенилэн тӧроез Габдрахманов Раниль Фаритович, Балтасьысь клубъёслэн огъям сӧзнэтсылэн кивалтӥсез Раиль Рафисович Садыков, дано гуртозы Пётр Павлович Данилов, гажано аспалмы Геннадий Васильевич Кузнецов.

Валамон, таӵе ужрадэз радъяны-ортчытыны дасяськыку, нырысь ик коньдон ужпум сярысь малпаськоно луэ. Юрттӥсьёстэк таӵе учыре нокызьы но уг луы. «Туж бадӟым тау «Яна тормыш» обществолэн директорезлы Магсумзян Равилевичлы. Со кык парсьпи сётӥз, сӥлен но юрттӥз. Нимаз ик бадӟым тау кылъёс верасько Янгул гурт поселенилэн тӧроезлы Раниль Фаритовичлы. Со шулдыръяськонэз ортчытон понна сюлмаськиз, коньдонэн юрттэт сётӥсьёсты утчаз, шедьтӥз. Солэн тыршеменыз шедьтэм одӥгез спонсормы луиз Казаньын улӥсь Янгул гуртысь воргорон Шакиров Ильнур Ильсурович. Чик тодмотэм адями 5000 манет коньдон сетӥз ук праздникмес ортчытыны!» — сюлмысьтыз тау каре Кушкет клублэн кивалтӥсез Светлана Петровна Щербакова.

«Но котьма ке но тужгес бадӟым таукаронэ гурт калыкелы. Туж мыло-кыдо пыриськизы та праздникез ортчытонэ, коньдон но люказы. Нимаз ик пусйысал Евдокимов Александрез, 5000 манет сётӥз со праздникез ортчытон понна. Исаев Сергей, ачиз куриськыса, плов пӧзьтӥз. Раимова Людмила, Кидалашева Клавдия, Самсонова Антонида, Мария Демьянова (Ципьяысь) но Павлов Алексейлэн семьяез. Алексей мызганчимес но солэсь семьязэ нимысьтыз пусъеме потэ. Соос но «Чибори» коллективе — таӵе ужрадъёсты ортчытонын мынам валтӥсь юрттӥсьёсы. Бригадир Раимов Иванлы но бадӟым тау. Ӓтассэ ӧз жаля Соловьёв Виталий , солы но тау. Калыкез шулдыртэмез понна пумтэм тау дуно куномылы Геннадий Кузнецовлы но вань артистъёслы, мызганчиослы. Калыкез шулдыртыны, капчи мылкыд кузьманы быгатӥзы», — ватсаз на Светапай.

«Праздникмы туж шулдыр ортчиз. Ваньзылы кельшиз шуыса малпасько. Бертэм куноослэн тау каремзы сюлэмез ик небӟытӥз, соослэн верам кылзы туж дуно», — мылкыдзэ усьтӥз Светлана Петровна.

Фото: Светлана Щербакова