Хезмәт

Балтач районы

18+
2024 - Гаилә елы
Азьлане

Шудо но, шудтэм но (пумыз)

Та ожъёсы — Мурманскез утёнэ — пыриськемез понна Мария Кузьминичналы «За оборону Советского Заполярья» медаль сётӥзы.

— Фашистъёслэсь самолётъёссэс куаразыя тодманы дышим, ява, — ортчемзэ син азяз пуктыса маде Марья апай. — Соос, сьӧд кырныжъёс музэн, дасолэсь тросэн вуо вал. Гудыръясь сьӧд пилем но тӥни. Но зорлэсь ватскыны луэ, милям ке, котьма медло но, зениткаосмы бордысь ишкалскеммы уг лу. Ыбылӥськом, ыбылӥськом, ыбылӥськом. Вылад бомба я снаряд усёно ке но, шорад узвесь зор вадьсаськоно ке но. Ой-йы, кӧня эшъёсылэсь быремзэс адӟоно луиз, кӧня кирень куректон синкылиос бамъёсме ӵушкаллязы! Но сьӧд киросо самолётъёс йыр вадьсы матэктэмъя зениткаос выльысь ыбылыны кутско, инбамын акырзаман дыръя кадь тылгудыри шукыръяськыны ӧдъя. Самолёт ӝуаса ке усе, сое котькинлэсь азьло ыбылыны кутскем расчётлы гожто вал. Соин ик, дыр, зенитчицаослэн гадьпусъёссы-наградаоссы но, мукетъёсын ӵошатыса, ичигес.

Огшап вис карыса, Марья апай мадёнзэ азьланьтэ.

— Ой, снарядъёсты нуллыса-ӝутыса ик кӧня тазалыкмес быдтӥм. Снаряд одӥг пудъем — дас куать килограмм кыске вал. Кык ӵошен басьтӥськиськом но нуиськом. Пичи гинэ землянкаосын туж трос кузя улылӥм. Куасьтӥськыны но инты уг тырмы. Огвадес, кынмыны шедьыса, висьыны усьылӥ. Со куспын копак тэйӟиськем. Сюдыны но дырын-дырын туж урод сюдылӥзы. Кытӥяз — весяк кузьыт чорыген шыд лым но шыд лым. Со дырысен мынам чорыгез адӟеме но уг пот.

Та ожъёсы — Мурманскез утёнэ — пыриськемез понна Мария Кузьминичналы «За оборону Советского Заполярья» медаль сётӥзы.

Дыр ортчемъя асьме ожгарчиос немецъёсты весь кыдёкегес но кыдёкегес чигнатӥзы. Шаермес соослэсь чылкытатыса, ожъёс кунгож сьӧры выжизы. Нылъёсты но, мозмытэм Польша, Чехословакия пыр поттыса, 1945-тӥ аре южтолэзе Германие, Байцен каре, вуттӥзы. Татын туж кужмо ожмаськон мынэ на вал. Вормон Нуналэз матэктытон понна трос вир кисьтӥськиз ай. Сэзь, кышкатэк ожмаськем нылъёслы командирзы наградаосын пусйыны ӵектэмез сярысь ивортӥз. Нош… нылкышно ожгарчиос созэс гимнастёрка бордазы бырттыса ӧз вуттэ — шумпотымон иворез кылӥзы:

— Война йылпумъяськиз! Асьмеос вормим!

Мар гинэ ӧз дауртэ соку ожгарчиос! Кесясько, выллань ыбыло, кырӟало, бӧрдо, ог-огзэс ӟыгыръяло — ваньмыз ӝук кадь огазьын пӧзе.

Лек ож тыл лапказ, кысӥз ке но, дор палаз берытскон сярысь малпаськыны Тимофеевалы вазьгес на вылэм. Нырысь соосты Неси каре вуттӥзы, собере — Воленбурге. Таиз кар кужмо ожъёстэк киултэмын вал. Соин ик тросэз заводъёс, отысь станокъёс куашкатэк-тӥяськытэк кылизы. Нылъёсты со станокъёсты сэрттыны-ёзнаны косӥзы — ваньзэ тае асьме кунэ, пе, келялом. Таиз но ужзы капчиен ӧз сётскы. Но ма карод, ӝожтӥськонэз тодытэк, нылъёс со секыт макеосты вормыса но вормытэк ӝутъязы-нуллӥзы.

Вордскем Вуж Турья гуртаз Мария Тимофеева 1945-тӥ арын кызетӥ куарусёнэ бертӥз. Улэпен, тазаен берытскемезлы шумпотӥз ке но, дораз сое капчи улон-вылон ӧз пумита. Быдӟым ож бере аръёс туж секытэсь вал уго. Со вакытэз тодаз вайыса, Марья апай шуэ:

— Ӝӧк вылэ кӧттыр сиён туж шер шедьылӥз. Скал вордӥськиз ке но, йӧлыз-вӧйыз ваньмыз сямен государстволы кошкылӥз. Озьы ик ыж гон но, курегпуз но. Ярам ни, берлогес, юосты октэм-калтэм бере, пичильтык пызь люкылӥзы.

Вуоно араз, тулыс, Марья апайлы анай луыны шуд усиз — Герман пиез вордӥськиз. Таин валче лыдӟем книгаосты но кинофильмъёсты тодам вайыса юасько:

— Мария Кузьминична, ожмаськон вакытэ но чылкыт, лул-сюлмысь пуромем яратон кусыпъёс кылдылӥзы-а?

— Бен кызьы-о сотэк? — шуиз со. — Егитэсь вал ук ми. Вӧзамы — ӧрӟи выллем егит ожгарчи пиос, командиръёс. Синмаськон-яратон но пуромылӥз, асьсэ улонзэс пыраклы валче герӟасьёс но вал. Ма, ачим но тани…

Зэм, яратоно муртэныз огазеяськыны солы кылдымтэ. Кызьызэ-марзэ Марья апай ачиз но ӧз вера, мон но выжыятыса ӧй улы ни: бурмыса вуттэм сюлэм яраез мар юнме выльысь копышъялод? Валамон ини, сыӵе вакытэ кышномуртлы пизэ будэтыны капчи ӧй вал, дыр. Талэсь зэмос шӧмзэ ачиз веръям мурт гинэ умой тодэ-вала…

Аръёс ортчемъя алигес гинэ кадь кампет курыса бӧрдылэм Герман пиез, школаез йылпумъяса, Ижысь ремесленной училищее дышетскыны пыриз. Собере егит каменщикез армие басьтӥзы. Со асьмелэсь Китай шаерен кунгожмес возьмаз. Ӵапак соку та кунгож дорын огыр-бугыр вал. Анай сюлэмлы со выль сюлмаськон ватсаз. Ярам ини, пиез отысь сӧл-тазаен берытскиз.

1965-тӥ аре Марья апай вордскем палъёссэ кельтыса, Ижкаре вуиз но Тимофей выныз доры улыны интыяськиз. Солэн семьяез апайзэ ас анайзэс сямен шуныт пумитаз. Кышномурт подшипникъёс поттон заводын ужаны кутскиз.

Заводын Мария Кузьминична кызь куинь ар тыршиз. Асьме законмы палдуресэн колхозын ужам аръёссэ городэ выжемез бере санэ ӧз басьтэ но, кышномурт, арлыдыз тырмыса но, соку ик пенсия басьтыны ӧз быгаты ай…

— Мария Кузьминична, Ижын улон дыръяды тужгес вунонтэм нуналдэс тодады вайыны уд быгатэ-а? — юасько пукон сяменым.

Арлыдо кышномурт арессэ ик вунэтӥз кадь — синъёсаз шумпотон тылсиос югак чилектӥзы:

— Огнуналэ пие ужысь бертӥз но ӧсэтӥ пырыкуз ик ивортӥз: «Анай, мон кык шумпотон ивор ваи».

— Мар сыӵе?

— Квартира сёто, ордер басьтӥ. Собере… нылы вордӥськиз.

Пиме ӟыгыртӥ но шумпотон синкылиосме кутыны ӧй быгаты ни. Та ик самой вунонтэмез шумпотон нуналэ вал кадь.

… Шур ву сямен жильыраса бызе улон. Ву кадь пожаськылэ но, чылкытоме но. Азьпал нуналъёсы мар луонэз нокин тупен-тупен мадьыса уз сёты. Котьмае тодэмъяськись туно-пеллё но, инсьӧрысен ваньзэ синйылтӥсь Инмар но. Улон ӧрез чутырак воштӥськоз шуыса, Мария Кузьминична но ӧз малпалля. Уйвӧтъёсаз но сыӵе воштӥськон ӧз пыра. Но…

Огпол, улонтӥяз бертыкуз, со ӧс дорысьтыз тодмотэм воргоронэз адӟиз. «Кин утча меда?» — чилектӥз Марья апайлэн йыраз. Шораз учкиз, учкиз но чабкиськиз:

— Ма-а, Михаил Иванович, тӥ, лэся, ук?

— Бен, мон, Маруся. Тонэ витисько. Пырыны луоз-а?

— Ойдо, ойдо, куно луод, — сьӧраз ӧтиз кышномурт.

Та воргорон зэмзэ ик гажаса куное ӧтьымон вал. 1937-39-тӥ аръёсы со — Арысланов — Марья апайлэн вордӥськем гуртаз дышетӥсь луыса ужаз. Калык визьмо но сабырлы дышетӥсез лул-сюлмыныз гажаз. Со дырысен ньыльдон вить ар ортчиз. Тани табере улон сюрес соосты выльысь пумиськытӥз.

Бигер шаерысь Кукмор ёросэ пырись Кумор гуртысь пияш пичиысен ик дышетӥсь луыны малпаз. Со тодмо удмурт югдытӥсьлэн, трос книгаослэн авторзылэн Иван Степанович Михеевлэн дышетскем Оштормо-Юмья школаяз дышетскиз. Бератаз Арскысь педтехникумез йылпумъяз но, сое Ципья ёросысь Вуж Турья гуртэ ужаны ыстӥзы. Та удмурт гуртын со диплом басьтэм нырысетӥез дышетӥсь вал. Нуназе урокъёс нуэм сяна, ӝытъёсы мӧйыосты ликбезын дышетӥз на. Арысланов Турьяын культураез ӝутонэ, калыклы лулпуш чеберлык ватсанэ но трос кужымзэ понӥз. Но улон бугырес вал. Иворъёсын Халхин-Гол, Польша, Финляндия кунъёслэн нимъёссы ӵемысь чузъяськылӥзы. Михаил Ивановичез ӝоген Монголие ысто. Отысен 1942-тӥ аре гужем со Кавказэ вуэ. (Туж жаль, олокӧня пол пумиськылыса, ваче син вераськыса но, Михаил Ивановичлэсь ортчем ож сюресъёсыз, наградаосыз сярысь ӧй юалляськылы. Ма шуод, азьпалэз сярысь ӵем дыръя уд малпаськиськы уго. Пинал мылкыд — юмал йӧлпыд, шуо. Мария Кузьминичналэсь юалляськыкум но Арысланов кылзӥсь интыын гинэ пукылӥз. Гырпум матын ке но, уд куртчы вылэм. Со пумиськонъёсмес тодам вайыса, мур лулӟонэз гинэ кылиз на).

… Секыт сӧсырмем офицерез Читаысь госпитале эмъяськыны келяло. Татын Кезысь удмурт ныл ужа вылэм. Озьы 1945-тӥ арын, Вормон Нуналэ, выль семья кылдэ. Политрук Арысланов капитан армиысь 1955-тӥ аре гинэ бертэ. Витьтон арес тырмыса шутэтскыны потэ ке но, сюлэмыз тэк пукыны чидамтэен, шофёр дасян курсъёсы дышетскыны пыре. Озьы куать нылпиослэн атайзы дас куинь ар ӵоже машина руль сьӧрын пумтэм-йылтэм сюресъёсты котыръя на.

Нылпиосыз быдэ вуыса, асьсэос семья кылдытӥзы. Ул но ул вылэм шумпотыса. Нош малпамъя, мылкыд каремъя гинэ уг лу — ӧсазы бадӟым кайгу йыгаське: секыт висьыса кузпалыз кулэ.

Удмурт калыклэн таӵе кырӟанэз вань:

Оген улон — улон ӧвӧл,

Улон парен луэ со.

Шонер верамын ӧвӧл шат? Кема малпаськемез бере та кырӟанысь кылъёс ик, оло, сое Марья апай доры вуттӥзы.

Кема пукизы соос вераськыса. Ортчем аръёсты тодазы ваизы, азьпалзэ но син азязы пуктыны тыршизы. Аръёс ортчо ук, нокызьы но ӝегатыны уд быгаты. Нош мӧйы муртлы огназ улыны капчи-а? Висьыса валес вылын кыллён вакыт куд-огезлэн ымтыр ву сётӥсез гинэ но уг лу. Тае малпасагес ик Мария Кузьминичнаен Михаил Иванович улонзэс герӟазы. Ог-огзылы юрттыса, ог-огзэс гажаса, соос дасо ар валче улӥзы. Но собере висён чер Арыслановез сопал дуннее келяз. Марья апай выльысь огназ кылиз.

Огпол дораз пыри но, Марья апай сокугес гинэ черкысь бертэм вылэм. Вӧсь юртэ ветлэм мугзэ со вакчияк тазьы валэктӥз:

— Мынам вӧсяськонэ весь огкадьгес: Михаил Ивановичлэн лулыз узьмаге, пӧй, мед шедёз. Со сяна, ноку медаз пуромылэ ни сыӵе лек ож тылӝуос, нокин медаз адӟы сютэм улонэз.

… Котькуд Вормон Нуналэ Мария Кузьминична ожмаськонэ ветлэмъёсын пумиськонъёсы дыртэ. Нош огаз аре та нуналэ сое малпамтэ шорысь военкоматэ ӧтизы. Кышномурт отчы паймыса мынӥз.

— Ӟечкыласьком, Мария Кузьминична, — военком пальпотыса кизэ кутылӥз. — Таиз наградады — «За отвагу» медаль — ньыльдон вить ар йыромыса ветлэм но тани табере ас кузёзэ шедьтӥз.

Николай Никифоров,

(«Азьлане», 2005 ар, №39, №40)

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: николай никифоров Мария Тимофеева