Шуныт мылкыдын тодам вайисько

Автор, 1 сентябрь 2018 - 11:11

1851

Осконтэм кадь, но школаез пырпотэммы дырысен тырме ини 50 ар. Аръёс ортчо, нуналъёс бызё, соин вылды ӵем но ӵем йырын бергало школаын дышетскем аръёс но дышетӥсьёс сярысь тодэ ваёнъёс. Синмаськымон шулдыр но сюлэмшугъяськонтэм егит аръёс вал со.

Нырысетӥ классэ мынӥ мон Вукогуртысь начальной школае. Пичи гинэ, гурез пуэн эстӥськись школаын соку ог дыре дышетскизы кык сменаен ньыль классъёс: 1 но 3 классъёс дышетскизы нырысетӥ сменаын, 2-тӥ но 4-тӥ классъёс — кыкетӥ сменаын. Нырысетӥ дышетӥсьмы вал Мария Тихоновна Коркова, со бере дышетӥзы Пётр Васильевич Байтуганов но Надежда Дмитрьевна Халтурина. Секыт ик вал, дыр, соослы ог дыре кык классъёсты дышетыны. Озьы ке но, тыршемзы буш ӧз луы, начальной тодон-валан но усто визьнод сётӥзы. Дышетскем сяна, тыршимы на школа бакчаямы, будэтэм кешырмес, сутэрмес, мукет емышъёсмес дышетӥсьёсмы асьмелы ик сӥзьыл люкылӥзы. Али кадь ик тодам возисько фермаысьтымы вайылэм йӧлэн няньлэсь шӧмзэ.

5-тӥ классэ мынӥмы ми Ципья школае. 5-тӥ «Б» классэ люкаськизы Ципья котырысь вань удмурт гуртъёсысь нылпиос: Вукогуртысь, Сырьяысь, Сизнерысь, Тагашурысь, Кургемысь, Дургаысь но Янгурчиысь. Татын вал ини ваньмыз выль сямен: бадӟым школа, выль эшъёс, котькуд предметэз нуизы нимысьтыз дышетӥсьёс. Классной руководительмы луиз визьмо, туж мыло-кыдо, нылпиос сярысь зол сюлмаськись Вера Петровна Афанасьева. Со дышетӥз ӟуч кыл но литература, нош математика урокъёсты нуиз ӟуч класслэн руководителез Роза Харисовна Сафина. Паймоно кадь, соос егитэсь ке но, мур тодон-валанъёсын но ас ужзэс ӟеч тодӥсь бадӟым авторитетэн дышетӥсьёс вал. Бадӟым перемена дыръя мылкыдэз бурдъясь шудонъёс радъяллязы. Нош кыӵе шулдыр ортчо вал Фарт Галиевич Гильмановлэн кивалтэмез улсын пионерской слётъёс. Отчы лыкто вал Мари Турек но Малмыж котырысь пиналъёс. Химиез яратоно мылкыд пыӵатӥз мыным Дина Галиевна Гильманова, кудӥз мылысь-кыдысь тыршиз ас тодон-валанзэ дышетскисьёслы сётыны. Ми дышетскон аръёсы ини Гарифзян Галиевич Галиев кутскон сётӥз краеведческой музеез кылдытонлы, ваньместы кыскиз экспонатъёс люкан уж борды. Аслэсьтыз история уроксэ туж умой нуэмен валче дышетӥз вордскем палмылэсь историзэ тодыны но соин данъяськыны. Дышетӥзы на мукетъёсыз гажамон, визьмо дышетӥсьёс, кудъёсызлэсь ми котыр ласянь адӟем каримы, соос пӧлын Василий Антонович Петров, Галина

Николаевна Семовская, Павел Григорьевич Григорьев, Григорий Семёнович Халтурин, Семён Иванович Лобанов, Константин Федотович Тихонов, Габдулхак Исхакович Исхаков. Та дышетӥсьёсын сётэм тодон-валанъёс юрттӥзы мыным дышетсконме азьланьтыны, ужын но улонын шонер сюрес шедьтыны. Ваньмыз сямен дышетӥсьёсмы Быдӟым ож тылпу пыр потӥзы, трос боевой наградаосын пусъемын вал. Улонысь кошкемын ке но, ми соосты данъяськыса но умоен гинэ буре вайиськом.

9-тӥ классэ потэммы бере (тросэз ӵош дышетскем эшъёсмы 8-тӥ классэз йылпумъяса кошкизы), милемыз огазеязы Ӟаныысь 8 классъем школаын дышетскисьёсын. Нош ик пӧламы ватсаськизы выль эшъёс, чебер нылъёс-спортсменкаос. Та дыре физикаен дышетӥз Гарифзян Садыкович Мухамметшин. Нырысетӥ тодматскон уроказ ик со паймытӥз — кызьы луэ вылэм сыӵе паймымон физика сярысь вераны.

Шуныт мылкыдын тодам вайисько удмурт, бигер, пор нылпиосын огазе дышетскем аръёсме. Одӥг пол но мон ӧй шӧды дышетӥсьёс яке дышетскисьёс соиз яке таиз нацием нылпиосты ултӥямзы сярысь, одӥг семьяысь пиналъёс кадь эшъяськыса будӥмы. Ма, малпасько, али но озьы ик, дыр, шуыса...

Ђоген вуоз ни 1-тӥ куарусён, нылпиос нош ик пумиськозы эшъёсынызы, пырозы ас классъёсазы. Ѓечкыласько тӥледыз, Ципья школаын дышетскисьёс, Тодон-валанлэн нуналэныз, азьпал улонды шудо-буро мед улоз, визьнод песьтэрды мед луоз пачыл. Мед удалтоз тӥледлы но милемлы кадь ик сабырлы, визьмо, ас ужзэс яратӥсь дышетӥсьёсын.

Озьы ик ӟечкыласько Ципья школаысь дышетӥсьёсты Дышетӥсьлэн вуоно праздникеныз. Та секыт но дано ужады сӥзисько азинлык, тыршемды удалтэм емыш мед сётоз, дышетскисьёсты тӥлесьтыд визьнод сётэмдэс мед дунъялозы но данъялозы.