Хезмәт

Балтач районы

18+
2024 - Гаилә елы
Азьлане

Сидорова Елена Игоревна

Елена Игоревнаез гуртоосыз тодо тыршись, киужъёслы усто луись, трос нылпиё анаез кадь. Елена Игоревна — городын вордскем но будэм адями.

Анаез Ципьяысь луэ ке но, Казане картлы кошке. Соин Лена вордске Казаньын. Но Ципьяын ӵужанаез, ӵужапаез улэмысь, со татчы ӵем куное вуылэм, гужем каникулъёссэ но Ципьяын ортчытэм. Озьы ик вуоно кузпалэныз, Сергеен, тодматскем.

Сергеен ми школа скамьяысен тодмо. Та милям нырысетӥ яратонмы луиз. Котькуд егитъёслэн кадь, милям но пӧртэм дыръёсмы луизы, но ми яратонмес утьыны быгатӥмы, валче луимы, — шуэ Елена Игоревна.

Елена 20 аресэн Сергейлы картлы кошке. Соку со Казаньын психологлы дышетске, швейной фабрикаын но ужа. Казаньын будэм егит нылэз гуртэ улыны бертон уг кышкаты (татчы куное вуылыкуз Лена гурт ужъёсты ужаны яратэм, вылаз ик со ноку но ужтэк пукыны быгатымтэ) — шумпоттэм гинэ. Ципьяын улыны кутскыса но со Казаньын кадь ик ужа фабрикаын — нырысь мех фабрикаын, ПМКаын но швейной фабрикаын ужаны вутске. Аслаз верамезъя, егит дырысеныз ик Еленалэн мылкыдыз луэм закройщиклы дышетскыны, но, жаляса верано, мылкыдыз мылкыдэн ик кыле (ма, дышетскыны ноку но бер ӧвӧл). 2014-тӥ арлэн пумаз егит нылкышно Ципьяысь «Наз» центре психолог луыса ужаны интыяське (ужез кельше ке но, характерезъя эмоциональной луэм адямилы та ужын капчи уг луы — инвалид адямиосын ужаны быгатон понна бадӟым чиданлык кулэ ук). Та ужан интыысьтыз ик со ньылетӥ нылпиеныз декрет отпуске потэ, туннэ нуналэ но шутэтсконын.

— Секыт-а трос нылпиё анай луыны? — юасько, артэн комнатаысь нылпи куараосты кылыса. 

— Зэмзэ ке верано, сомында пичи нылпиосын капчи ӧвӧл. Ваньзэсты утёно, ваньзэсты учконо. Кыксэ школае дасяно, куинетӥзэ — садике, ньылетӥез со дыре сьӧрам ветлэ... Но нылпиостэк улонмы сыӵе шулдыр ӧй луысал. Огвыллем улон куддыръя акыльтэ, ваньмызлэсь кытчы ке пегӟем потэ. Нош нылпиостэк кӧня ке час улӥд ке, соослэн куараоссылэсь мӧзмыны кутскиськод ини, ӝоггес доре бертэм потэ, — валэктэ Елена.

Анай мурт ватытэк вера: нылпиосыныз тросгес со выре — урокъёссэс но дасяны юрттэ, ужаны но дышетэ, соин ӵем жадьылэ. Но жадёнэз шоры учкытэк, ачиз но оломаръёс карыны вутске трос нылпиё анай: толалтэлы быдэ, лымылэсь чебер фигуркаос  лэсьтыса, конкурсъёсы пыриське, призо интыос но басьтылэ; быгатыса вуриське, керттӥське; кылем материалъёслэсь ӝӧкъёс, табуретъёс, тумбочкаос но лэсьтэ. Кузпалэз, кышноезлэсь сыӵе аспӧртэмлыко хоббизэ тодыса, инструментъёссэ кыдёке уг окты: тодэ, соос Леналы кулэ на.

Елена ассэ идеальной уг шуы. Бен, соиз валамон но – куддыръя нылпиосты тышкаськыны но тупа, дыр.

Та семьяын нылпиос пичиысен ужаны дышетскыса будо. Елена тодэ: нылпиосты пичиысен ужаны ӧд дышеты ке, соос азьтэмлы дышыса будозы. Нылъёсыз дорысь ужъёссэс валче ужало: утялско но, сиён пӧзьтыны но дышетско, куддыръя анаезлы пудо сюдыны но юртто. 

— Даша (2008-тӥ арын вордскемын), Маша (2010-тӥ арын), Ксюша (2013-тӥ арын) но Андрей (2017-тӥ арын) валче луизы ке, куспазы пуныен коӵышъёс кадь, — серекъя Елена Игоревна. — Нош люкиськизы ке кӧня ке дырлы, мӧзмыны кутско ни. Сыӵе соос ог-огзэс ярато. Нош ми макем соосты яратӥськомы! — пальпотэ Елена. 

Учкисько но та егит нылкышно шоры — паймисько: кыӵе со чебер, визьмо, кыӵе егит, но со дыре ик кыӵе опытной. Та нылкышноосын вераськыса эшшо но юнгес валай: анай сюлэмлэсь пуштроссэ анай луымтэ адями ноку но уз тоды. Анай луон — со туж бадӟым шумпотон, но со вакытэ ик со бадӟым кылкутон но. Нылкышно вылын, анай вылын быдэс семья, быдэс улон возиське. Тау тӥледлы, анайёс! 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: анайлэн нуналыз