«Скалъёсты аппаратэн ӧвӧл, киын кыскыны яратӥ»

Улын Ушма гуртын улӥсь Лидия Евдокимова — гурт удысысь дано ужасьёс пӧлысь луэ шуыса гожтӥ ке, уг янгыша, дыр. Туннэ нуналэ со пенсиын ини, гурт удысын тыршемез вераса быдтонтэм бадӟым. Ужлэсь кышкасьтэм, валче ужано адямиосызлы котьку юрттыны дась луись — матынгес тодматскытозямы ик сыӵеен син азям пуктӥськем вал сое. Зэмзэ но со сыӵе вылэм.

Аппарат луэм ке но, скалэз киын кыскыны яратэм

Лидия Петровна 1953-тӥ арын Вылын Ушма гуртын вордскем. Будэм со песяй-бабаеныз, соин ныллы, матысьёсызлы ӧжыт ке но юрттон понна, вазь ик ужаны интыяськыны тупам.

— 8-тӥ классэз йылпумъяса, Ушмаысь кирпич заводэ ужаны пыри. Соин егит дырысеным уксёлэсь кадырзэ валаса будӥ. Вечерней школае дышетскыны ӧтё вал, но мон отын дышетскыны ӧй быгаты ни — дорын ӵукна ик султыса скал кысконо, пудоосты утёно вал, — шуэ Лидия Петровна.

Кирпич заводын куинь ар ужамез бере, егит нылаш Вылын Ушма гуртысь фермае ужаны выже. Соку солы 19 арес луэ.

— Ужаны кутскемен валче 16 йыр скалъёсты оскизы. Ма, дорамы но пудо вордӥмы бере, соосты кызьы утьыны, мон умой тодӥсько вал, — азьланьтэ веранзэ кышномурт. — Соку, мазэ веранэз ини, скал кыскисьёслэн ужзы, али дырен ӵошатыса, трослы секытгес вал. Вань секыт уж киын быдэстӥськиз, сое но ваньзэ нылкышноос быдэсъязы. Тракторен сиён, пызь пыртонэз но ӧм адӟе. Ӵукна куинь часлы ужаны мыныса, нырысь скалъёслы сиён тыриськомы, соосты миськиськомы, собере гинэ кыскыны кутскиськомы вал. Нуналаз куинь пол кыскылӥмы. Скалъёсты киын кыскиськомы вал, гужем соосты Лӧзяе келякузы, ми но отчы ужаны ветлылӥмы. Толалтэ берен татын, гуртысьтымы фермаямы ужмес азьланьтӥськомы вал. Асьмеос ик кӧжы силос поттамы, сое весаосы тырылӥмы (мертаса гинэ пудолы сётылӥмы, мултэссэ сётыны уг яра вал)…

Лидия Петровна ужам дыръёссэ тодаз вайыны кутскиз. Скалъёсты киын кысконлэсь вань секытсэ ас вылаз шӧдэм со, но озьы ке но, аппаратэн кысконэн ӵошатыса, киын кысконэз матынгес карем. Аппаратъёсын ужаны кутскемзы бере но дышемезъя киын кыскем — озьы, пе, скалъёс тросгес йӧл сётӥзы.

— «Нош киын кыскиськод-а ини?» шуисьёс но луизы. Ма, кыски. Мар бен? Мон но аппаратлы дышемын ӧй вал, скалъёс но аппаратэн кыскыны кутскеме бере трос йӧл сётэмысь дугдӥзы — котьмалы дышыны кулэ ук, адямилы но, пудолы но, — валэктэ Лидия Петровна.

Лидия Петровна — азьмынӥсьёс пӧлын луэм скал кыскись

Нырысетӥ басьтэм уждунэзлы — со 45 манет луэм — Лидия, Балтасе эшъёсыныз мыныса, аслыз куртка басьтэм. Соку шумпотэмез сярысь со али но вунэтымтэ. Тӥни сыӵе шумпотонъёс понна ик секыт ужлэсь кышкатэк тыршем со фермаын.

Уженыз герӟаськем шумпотонъёсыз солэн ӧжыт луымтэзы али. Лидия Петровна трос пол азьмынӥсь скал кыскисьёслэн радазы луэм, куинь пол Сабантуе флаг ӝутыны но мынэм кышномурт.

— Нырысетӥзэ мыныкум, 100 манет сётӥзы, кыкетӥяз — чайной сервис, нош куинетӥяз — «Ока» мисьтаськон машина, — пальпотыса тодаз вае со. — Данъян грамотаосын но, Таукарон гожтэтъёсын но пусйизы. Огъя вераса, ужаммес дунъязы.

Скал кыскисьлэн ужез капчи вылымтэ ке но, Лидия Петровналы со сюлэмезъя луэм. Малы ке шуоно со пудоосты котьку яратэм. Пенсие потытозяз но, 2008-тӥ арозь, фермаын ужам. Азинлыко ужам, пӧяськытэк, тыршыса. Со понна сое коллективазы но гажаллям. Солэн кузпалэз но, Пётр Александрович Евдокимов, гумырзэ колхозын ортчытэм адями — шонергес вераса, 38 арзэ.

Пётр Евдокимов — 38 ар стажен механизатор

 Пётр Александрович но гуртысь огшоры воргорон. Матысь гуртъёсын гинэ улӥллям ке но (Лидия Петровна Вылын Ушмаын, нош Пётр Александрович — Улын Ушмаын), егитъёс тодмо луымтэзы: Лидия фермаысь жадьыса бертылэм но солэн егитъёсын ӵош нокытчы потыны мылкыдыз луымтэ ини. Но Пётр сое синйылтэм, атаез доры нылэз кураны мынэм. Но атаезлэсь отказ басьтэм.

— Кема малпаськыса пукымтэ, мукет нуналаз монэ лушказ ини, — серекъяса тодаз вае Лидия Петровна. — Фермаын ужан куспетӥ ик кык ӵошен лыктӥзы но нуизы. Соку ини атай но пумит ӧз луы. Озьы тӥни 1975-тӥ арын мон Улын Ушмае кен луыса лыктӥ.

Егитъёс выль семья кылдытыса эшлыко улыны кутско. Пудо вордо, кыкназы но колхозын тыршо. Пётр Александрович Ленин нимо колхозын (али со «Сурнай» нимез нуллэ) гумырез ӵоже механизатор луыса ужам. Нырысь Т-25 тракторен, собере — ДТ-75-ен. Кыед куян, куро сюрон выллем ужъёслэсь со кыльымтэ. 2009-тӥ арын пенсие потытозяз но ужзэ рос-прос быдэстэм, кивалтэтэз но валче ужано адямиосыз пӧлын бадӟым гажанэ вутскем.

Лидия Петровна кузпалэзлы куинь нылпиосты кузьмам — Василиез, Андреез но Людмилаез. Туннэ нуналэ семьяязы соос сизьым кузя уло — Лидия Петровна но Пётр Александрович, Василий пизы, Андрей пизы Екатерина кышноеныз но кык нылпиосыныз. Людмила нылзы Бадӟым Лӧзялэн 2-тӥ люкетаз аслаз семьяеныз улэ. Туннэ нуналэ Лидия но Пётр Евдокимовъёслэн вить внуксы но вань ини.

Жаляса вераны кулэ, 2021-тӥ арын Пётр Александровичлы инсульт луэ. Со дырысен со валес вылын ини.

— Егит дырысеным улон мыным курадӟонъёс сётэ ке но, мон уг ӝожтӥськиськы. Кузпалме утисько, яра али юрттӥсьёсы вӧзам — пиосы но кенэ, — маде кышномурт. — Кылем арняе гинэ 70 аресъем юбилейзэ пусйимы. Сое ӟечкыланы матысь адямиосыз, тодмоосыз лыктӥллям вал, шумпотымон.Улонысь шуг-секытъёслы сётскытэк, ваньзэ чидаса, матысьёсыз вылэ пыкъяськыса ас кужыменыз улыны дышем Лидия Петровна. Со бордын ик солэн кужымез но чеберез луэ, дыр.