«Со котьку сюлмаськиз лыдӟисез понна»

Гуртысьтыз покчиёзо школаез йылпумъяса, Шор Кушкетысь тямыс классъем школае выжиз. Азьпал дышетсконзэ Савалиысь сельхозтехникумын азьланьтӥз, зоотехниклэсь ӧнерзэ басьтӥз. Уно аръёс ӵоже та ӧнерезъя ужаз.

Гожъяськыны пинал дыръяз кутскиз, кылбуръёс бордысен. Нырысетӥ «Ӟольгыри» кылбурез «Дась лу!» газетын печатласькыса потӥз. Собере ассэ прозаын но эскерыны малпаз, берлогес быдэсак та ӧре выжиз. Лыдӟисьёс доры кылбуръёсыныз таӵе бичетъёс вуизы: «Йыр вадьсын инбам» (1984 ар), «Выжыос-сяськаос» (1990 ар), «Погыли» (1996 ар). 1983 арын потэм «Чипы лым» сборниклэн ньыль авторез пӧлын одӥгез со луэ. Озьы ик печатласькиз Удмуртиын поттӥськись «Удмурт дунне» газетын, «Кенеш» но «Инвожо» журналъёсын. Пӧртэм юморескаос, серемес мадёсъёс но сценкаос гожъяны солы ас дыраз гуртысь художественной самодеятельносте, спектакльёсы пыриськемез мылкыд сётӥз. Кужымзэ пьеса гожтонын но эскериз. Куинезъя Удмурт радио постановкаос но дасяз.

Семьяеныз, кузпалэныз, кык пиосынызы но нылынызы, Киров улосысь Кильмезь ёросысь Бураши ӟуч гуртын улӥзы. Кузпалыз Екатерина Алексеевна — выжыезъя Киров улосысь Малмыж ёросысь Китяк гуртысь удмурт кышномурт. Гожъямъёссэ, удмурт изданиосы сяна, ӟуч кылэ берыктыса, улоно ёросазы потӥсь газетъёсы но келялляз. Но котьку но со тужгес юн кусып возӥз Балтась ёросын потӥсь «Азьлане» газетэн.

«Со котьку сюлмаськиз лыдӟисез понна»

Николай Михайлович сярысь трос но кема гожъяны луэ. Трос улыны кылдымтэ ке но, со та дуннее кельтэм аслэсьтыз вунэтонтэм пытьызэ. Нокыӵе секыт ужъёслэсь но со кышкамтэ, творчествоен вырыны но дыр шедьтэм, кузпалэн нылпиосыз сярысь но ноку вунэтымтэ (писателез ас дыраз Ижкаре ужаны ӧтиллям, но, семьязэ кельтонтэм, Николай Михайлович, Ижкарын улон сярысь малпанъёсыныз люкиськыса, городэ мыноно уг кары). Сыӵе атаен но кузпалэн тодаз кылем со семьяезлы.

Екатерина Алексеевна пальпотыса тодаз вае вуоно кузпалэныз тодматскемез сярысь: «Со вал выжыкылын кадь». Син азяды гинэ пуктэ ай. Киров улосысь егит ныл, Марий Эл республикае сюанэ мыныкуз, асьме ёросэ шеде. Николай но со сюанын луэ. Со нуналэ егитъёс, сюанын сяна, клубын пумисько. Та уйе ик Николай Екатеринаез лушка — эн оскы табере яратонлы! Нылаш мазэ-созэ валаса но уг вутты — кышно луэ. Трос пол собере Николай кузпалэзлы серекъяса вералоз на: «Куинь районтӥ потыса, одӥг уйе кузпал но шедьтӥд».

Егитъёслэн улонзы капчи луымтэ. Кузпалъёс кыкназы ик ужаллям фермаын. Тужгес секыт луэм, дыр, Николай Михайловичлы. Ӵукнаысен  ӝытозь ужано, дорысь пудоез но утёно, анаез но висьыса улэм, соин творчествоен вырон понна солэн уйин гинэ дырез луэм.  Ма, покчи пиезлэн, Александрлэн верамезъя, атаезлы уйин гожъяськыны капчигес но луэм. Семьяез изьыны выдэ — Николай Михайлович кияз кагаз кутэ. Кышноезлы но со ватытэк верам: уйин солы гожъяны капчигес. Куддыръя изён куспетӥз султыса но гожъяськем — йыраз лыктэм малпанъёссэ ӵукнаозь вунэтыны кышкам. Пинал дырысен кылбуръёс гожъяны кутскем пиосмуртлэн одӥг малпанзэ но кагазэ гожтытэк кельтэмез потымтэ. Гожъяса быдтэм произведениоссэ со шумпотыса семьяезлы лыдӟем — соослэн дунъямзы туж кулэ луэм гожъяськисьлы. «Тужгес Коля яратӥз нылпиослы сӥзем кылбуръёсты гожъяны. Но вань вал солэн мыным сӥзем кылбуръёсыз но. Кылсярысь, «Катялы» шуэм кылбурез», — вера Екатерина Алексеевна.

1987-тӥ арын кузпалъёс Киров улосэ улыны кошко (Николай Михайловичлэн анаез кулэмын, коркаез начар югдурын луэм ини — огъя вераса, та гуртын семьяез номыр но возьымтэ ни. Вылаз ик Киров улосысь председатель соослэн гуртазы аслыз ужасьёс утчаса лыктэм). Татын но секыт ужлэсь кышкатэк фермаын ужаны кутско кузпалъёс. Николай Михайлович, зэмос гожъяськись луэменыз, татын но уг куштӥськы яратоно ужез бордысь — кутьы возьмакуз ке но кагазэн ручка поттыса гожъяськем. Ваньмыз солэн умой пӧрмем — прозаез но, поэзиез но. Юнме гинэ солэсь гожъямъёссэ «Инвожо», «Кенеш», «Кизили» выллем журналъёсын печатламтэзы, вылды.

— Нылпи тематика туж матын вал Колялы, — тодаз вае Екатерина Алексеевна. — Яратылӥз гожъяны нылпиос понна кылбуръёс, веросъёс, повестьёс. Туж трос лыдӟылӥз, пӧртэм газет-журналъёслы гожтӥськылӥз. Ачиз но газетъёсы гожъялляз. «Азьлане» газетын гинэ но солэн кӧня материалъёсыз печатласькизы. «Турин» псевдонимен но потылӥзы статьяосыз. Солэн вань мылкыдъёсыз гожъяськон сярысь вал, ватытэк верасько. Аслаз печатать карон машинкаез но вань вал. Кытчы ке мыныку, одно ик машинкаяз лента но кагаз вайыса бертыны куре вал.

Николай Михайлович ачиз удмурт кылын гинэ гожъям ке но, солэсь трос произведениоссэ ӟуч кылэ берыктӥллям. Нош кӧня солэн лыдӟисьёс доры вуымтэ гожъямъёсыз! Соос пӧлысь тросэз семьяын утисько.

— Жаляса верано, Киров улосын дышетскимы бере, удмурт кылын лыдӟиськыны ум тодӥське. Одӥгзэ гинэ вераны быгатӥсько: атаймы литературно гожъяз произведениоссэ, котькытын улӥсь удмурт калык но лыдӟыны мед быгатоз шуыса. Со котьку сюлмаськиз лыдӟисез понна», — шуо Николай Михайловичлэн пиосыз.

Синмаськымон чебер, пальпотӥсь но ужась, возьдаськисьтэм, котькинэн кыл шедьтыны быгатӥсь — сыӵеен тодазы вайизы матысьёсыз Николай Михайловичез. Малы ке но сыӵеен ик син азям пуксем вал со мыным но... Николай Никифоров кемалась асьме пӧламы ӧвӧл ни. Но со аслаз творчествоеныз пыраклы улонэ пытьызэ кельтӥз. Улонэз кузь ӧз луы ке но, удмурт калык понна кельтэм ваньбурез — вераса быдтонтэм бадӟым.

Наталья Жукова