Сырья гуртысь Аграфина Чернова 90 аресъем юбилейзэ пусйиз

Кемалась ӧвӧл, шонергес ке верано 15-тӥ толсуре, Сырья гуртысь гажамон песянай Аграфина Петровна Чернова 90 аресъем юбилейзэ пусйиз. Юбиляр сюлмысь шумпотӥз, мӧйыосты ёросысь но интыысь кивалтэтын ужась адямиос гажаса, бадӟым карыса дано юбилейёсынызы ӟечкыланы уг вунэто шуыса.

Куноос юбилярлы РФ-лэн Президентэзлэсь ӟечкылан открытказэ, ёрос главалэсь Таукарон гожтэтсэ, сяська керттэт но мукет кузьымъёсты кузьмазы. Кивалтэт но усто вераськись песянаен тодматскемезлы шумпотӥз: арлыдэз шоры учкытэк, мылкыдыз солэн задор но егит ук. Аграфина апай куноослы, ёрос газетын но радиоын ужась представительёслы улон-вылонэз, шумпотонъёсыз но кайгу-куректонъёсыз сярысь мадиз. 

— Туж начар улӥмы ми, туж начар, — нылпи дыраз берытскыса, веранзэ кутскиз песянай. — Семьяямы тямыс кузя нылпиос луимы, кык нылъёс но куать пиос. Атаймы оже кошкем бере, анаймы огназ милемыз вордыны кылиз. Вань нылпиос дорын, сиыны сиён ӧвӧл, дӥсяны — дӥськут. Номыр но ӧй вал.

Та кылъёсыз бере песянай синкылиоссэ ӧз вормы ни.

Дургаын вордскем Аграфина апай тодаз вайиз пичи дыръёссэ но, егит вакытъёссэ но.

— Тӥ, егитъёс, милесьтым улонмес уд тодӥське ини, медад но тодэ. Улон-вылонмес вераны кутскимы ке, ваньзэ тодамы уськытыса, номае но ватытэк верамы ке, ваньмыз со вераса но быдтонтэм. Сютэм улэмъёсмы, кужыммы луытэк ужамъёсмы… Тодэ уськытыны но вӧсь. Гуртысьтымы фермаын ужай пичи дырысен. Пыдкутчан ӧвӧл, фермае вуытозь мынон сюрес но матын ӧй вал, колхозысен но пыдкутчан ӧз сётэ, аслам басьтыны но уксёе ӧй вал… Колхоз галош сётӥз ик собере, но ведь соин толалтэ ветлыны уг луы — вольыт, кезьыт. Колхозлэн тӧроез но, фермалэн кивалтӥсез но бигеръёс вал. Кусыпъёсмы соосын туж умой луизы. Шумпотымон, адямиосын мон огъя кыл шедьтыны котьку быгатӥ.

Собере Аграфина Петровна тодаз вайиз фермаын секыт ужам аръёссэ. Чырткем нылмурт, аслэсьтыз ужзэ быдэстыса, эшезлы но юрттыны вутскем.

— Аслэсьтым ужме йылпумъяса, дырызлэсь вазьгес бертыса кошки огпол. Кошкеме бере, фермаен кивалтӥсь лыктыса вуэм. Солы вераллям, мон ужме йылпумъяса бертыса кошки ини шуыса. Мукет нуналаз кивалтӥсь шонерен мон доры лыктӥз. «Мон тынад сыӵе чырткем ужамедлы туж пайми. Скалъёсты кыскыса быдтытэк, бертыса кошкем ини та шуыса малпай», — шуиз. Тӥни сыӵе чырткем ужай мон ас дырам. Нялтас вераса, со фермаен кивалтӥсьмы туж йӧно адями вал, анаеныз гинэ улэ вал со. Соос урод ӧз улэ. Со мынэсьтым начар улэмме но сютэмен ветлэмме туж умой тодэ но адӟе вал. Монэ дораз нуыса сюдылӥз. Мыныны ӧй ке быгаты, кивалтӥсьлэн анаез монэ но, сое но тышкаське вал. «Дыры ӧвӧл, уже трос» шуи ке, фермае сиён лэзё вал. Тӥни сыӵе сюлмаськизы мон понна соос.

Аграфина апай со жалясь сюлэмо фермаен кивалтӥсьсэ но солэсь анайзэ тодаз вайыкуз но синкылиоссэ ватыны ӧз быгаты. Сое буйгатыны тыршыса, Сырьяе кызьы улыны вуиз меда шуыса юамы.

Синкылиоссэ ӵушыса, юбиляр мадьыны кутскиз:

— Мон туж чебер луиськем. Чеберзэ котькинлэн синмыз адӟе ук, мон но сое адӟисько (серекъя). Шушсэ но адӟисько. Вуоно кузпалме, Кузьмаез, милям гуртэ ужаны лэзиллям вал. Со тракторен колхозын ужаз. Озьы ик тодматскимы соин. Бигеръёслэн вань таӵе веранзы: «Бер курудэ гашыйк булдым». Вот мынам ӵапак озьы луиз. Кузьмалы соку ик синмаськи. Татчы, Сырьяе, улыны лыктэме бере, мыным аслым но вераз: «Та нылэз ыштӥ ке, мыным со уз йӧты ни шуыса малпай». Али улыса-улыса но оскымтэ, валче луимы шуыса: монэ ыштыны кышкаса улэм вылэм. 

Куспазы кузпалъёс тупаса улӥллям. Кузьма агайлэн (жаляса вераны кулэ, со кулэмын ини) анайзыез луэм. Атайзыез кулэмын луэм ини, кузпалэзлэн сузэръёсыз — картъёс дорын. Соин улӥллям куинь ӵошен гинэ.

— Кузьма туж визьмо но ужась вал. Одӥг но ужтэк но тэк пуконэз ӧз вала, сюлмыз уг чида вал озьы пукыны. Кузпалэным мыным удалтӥз шуыны кулэ. Вить нылпиосмы вордскизы — ньыль нылъёсмы (Любовь, Раиса, Мария, Антонина) но Владимир пимы. Пимы тани кулӥз ини. Со сярысь малпаны кутскисько но, сюлэмлэн вӧсь луэмезлы чидаме но уг луы. Ӝытъёсы туспуктэмзэ учкыса пукисько но уг оскиськы, со ӧвӧл ини шуыса. Бигер сямен кырӟаса, бӧрдыны кутскисько.

Табере песянайлэсь верамъёссэ куспетӥ карыны нокин но ӧз дӥсьты ни… Шӧдске: анай сюлэмлы бадӟым ыштонэн соглаш луыны туж секыт.

— Умой мед улозы нылпиосы. Умой мед улозы ваньзы но. Улон тынӥсь мед луоз, жугиськон медаз луы. Ми адӟонозэ адӟимы ини, нылпиосмы, внукъёсмы сыӵе улонэз медаз адӟе. Ваньзэ адӟи, тазьы луоз шуыса ӧй малпа мон, — шуиз песянай, ӧжытак буйгатскемез бере. — Огпол одӥг адямиен вераськыкумы, со мынэсьтым юалляськыны кутскиз, кызьы но кытын улӥськод шуыса. Мон солы огнам улӥсько шуыса ответ сётӥ. Со мыным тани мар шуиз: «Ялгыз тору — тан атмаган тонен». Удмурт кылэ берыктоно ке, оген улон — шундытэм улон, пеймыт уй кадь шуэмез валэктэ. Кыӵе шонер кылъёс, озьы ведь? Но мон асме шундытэм, пеймыт улонын улӥсько шуыны уг быгатӥськы. Инмарлы тау, нылъёсы вань. Соос монэ гажало, ярато, учко. Огнам уг кельто. Тани туннэ но соос мон вӧзын, — шумпотэ Аграфина Петровна. — Внукъёсы но вань мынам, куное бертылыса уло, со мон понна самой бадӟым шумпотон. Ваньзы таза гинэ мед луозы!

Аграфина Петровналы аслыз но али кема аръёс ӵоже сӧл-таза луыса, матысьёсыз вӧзын шуныт юртаз улыны мед кылдоз.