Сырьяын «котырес ӝӧк» ортчиз

Валамон, сыӵе бадӟым но вунонтэм датаосты Леонид Дмитриевич Сапожников, Сырья клублэн кивалтӥсез, ёросамы гинэ ӧвӧл, республикаын но, республикамылэн палэназ но тодмо луись удмурт азьветлӥсь, палэнтӥ ортчыны ӧз быгаты.

Ивашовъёслэсь (Каляка выжыослэсь) историзэс ӧжыт ке но тодӥсь, со семьяен тунсыкъяськись, Сырья гуртысь клублэн историеныз тунсыкъяськись адямиос клубе люкаськизы. Тужгес витем куноос вал Карлыган гуртысь Михеева Евдокия Дмитриевна но Михеев Сергей Алеександрович — Ивашовъёслэн выжыысьтызы представительёс. Пумиськонын ӝутӥськизы кӧня ке юанъёс: Сырья клублэн историез — Каляка выжылэн историез; Каляка выжыез данъясь буре ваён пуллэсь макетсэ юнматон но юбилеен герӟаськем ужрадъёс сярысь кенешон; Каляка выжыос сярысь тодэ ваёнъёс. Но, зэмзэ ке верано, та ӝытэ тросгес чузъяськизы Ивашовъёслэн юртэнызы герӟаськем тунсыко историос.

Ӧжытак историысь

90 ар талэсь азьло,1930-тӥ аръёсы сентябрь толэзе, Сырья гуртысь Ивашов Егор Алексеевичлэн семьяез, кулак карыса, Сибире уллямын вал. Евдокия Дмитриевна шуиз: «Атае каре ветлылӥз, товар нуллӥз. Со товарзэ базарын вузаз, сое мон тодӥсько. Малпасько, соин ик милесьтым семьямес кулаке поттӥллям, дыр». Ивашова Мария Егоровналэн верамъёсызъя, со вакытэ семьяын дас куать адями лыдъяськем. Берлогес Ивашовъёслэн бадӟым пизы Дмитрий Егорович (1898-1937) Соврудникын ыбемын, кык мукет пиоссы — Василий Егорович (1908-1942) но Иван Егорович (1909-1944) — ожын быремын.

Ивашовъёслэн улэм юртазы (туспуктэмын) 1930-1994-тӥ аръёсы Сырьяысь покчиёзо школа но ФАП (1988-тӥ арозь) луэм. 1995-тӥ арысен юртлэн кыкетӥ этажаз Хрящёвъёслэн семьязы улэ. Нырысетӥ этажаз Сырья покчиёзо школа-нылпи садлэн складэз. Нош Ивашовъёслэн тыриськон интыязы (кладовойязы) 1930-тӥ арысен Сырья гурт клуб интыяськем.

Сырьяын Ивашовъёслы сӥзем мемориальной пул луоз

Та пумиськонэз радъян но Калякаослы мемориальной пул пуктон малпан Леонид Дмитриевичлы Ципья гурт поселенилэн отчёт собранияз выступить карыны доклад дасякуз вуэм. Со собраниын ик Калякаослы мемориальной пул усьтыны дасям эскиззэ но возьматэм. 

— Туннэ татын люкаськемъёс ваньмы но 30-тӥ аръёс бере вордскемын ини. Тӥляд юртады дышетскыса будӥмы, тӥляд кладовойяды клуб карыса, Выль ар кадь бадӟым праздникъёсты пумитамы, шулдыръяськимы. Тӥляд кужыменыды лэсьтэм вукоен туннэ нуналэ вуко изӥськом, али ке но вуко ужа, — Евдокия Дмитриевналы вазиськыса, кутскиз веранзэ Леонид Дмитриевич. — Ивашовъёслэн луэм бадӟым бакчазы, садзы, трос мушъёсты но вордӥллям соос. Мирон Женя апаен гожтэтъяським, со сямен Калякаослэсь выжызэс утчаса, Сарапулэ, Воткинске ветлыса, Женя апай мыным материалъёс лэзьяз. Архивысен но, пусйыны кулэ, трос документъёс вуизы. Соин информация вань шуыны кулэ. Но нокыӵе люкам информация но Калякаослэн выжыысьтыз адямиеныз пумиськыса вераськемез уз вошты.

Собере кыл сётӥськиз Евдокия Дмитриевналы. Часлэсь тросгес кыстӥськем ужрадын трос кылъёс верамын, трос юанъёс сётъямын но трос учыръёс тодэ ваемын вал — ваньзэ гожтыса быдтыны уз луы. Юанъёслы быгатэмезъя Евдокия Дмитриевна валэктон сётъяз, пиез Сергей Александрович но юрттӥз.

— Милемыз, кулаке поттыса, Сибире келязы. Со вал Красноярск улосвылысь Соврудник гурт. Бабай татчы, Сырьяе бертыса, кулӥз. Со милесьтым азьлогес бертӥз, ӧз чида отын улыны, сюлмыз татчы кыскиз. Нош мон гуртам анаеным ӵош дас кык аресэн бертӥ (Евдокия Дмитриевналэн одӥг агаез жугиськонын кулэм, мукетыз вуэ усьыса кулэм — Н. Ж.). Тодӥсько на бертэммес. Пароходэн бертӥмы, мон туж кышкай, вуэ усёмы шуыса, — тодаз вайиз Евдокия Дмитриевна.

Соврудник посёлокын Ивашовъёслэн асьсэ юртсы но луэм, сое Евдокия Дмитриевналэн атаез пуктэм. Со луэм умой, кык комнатаен, кухняен юрт. Берлогес отчы Ивашовъёслэн Михаил пизы аслаз семьяеныз улыны кылем.

— Ми татчы бертӥмы 1952 яке 1954-тӥ арын, точно уг тодӥськы ни. Дышетскыны но рос-прос ӧз луы, анае но одӥг классэз но быдтымтэ. Кызьы кылдэм, озьы луиз ни. Котькуд адямилэн ас адӟонэз. Татчы ӧтемды понна тӥледлы бадӟым тау, — шуиз Евдокия Дмитриевна.

Пумиськонын трос адями ӧй вал ке но (ваньзэ-ӧвӧлзэ дас куинь адями), вераськонмы тунсыко но пайдаё луиз. Евдокия Дмитриевна аслэсьтыз ӵыжы-выжыоссэ но шедьтӥз, трос тунсыко историосты кылзыса, мылкыдзэ ӝутӥз, вашкала ӵыжы-выжыосызлэсь улэм юртсэс палэнысен ке но учкиз. 

Сырья клублы — 90 ар

Леонид Дмитриевич, кылдэм ке, сӥзьыл Сырья гуртысь Ивашовъёслэн династизылы но Сырья клублэн усьтӥськемезлы 90 арес тырмонлы сӥзьыса праздник ужрад ортчытыны малпа. Мемориальной пул но сӥё-дано карыса интыямын луоз шуыса витиське. Соку гурт клублэн историеныз пыр-почгес тодматскомы шуыса оскисько. Нош али тани мае пусъеме потэ: Сырья клуб ас дыраз Ципья ёросысь центральной клуб луэм (ог тямыс ар ӵоже). Пӧртэм аръёсы клубын ужасьёс но — Мария Чернова, Лариса Чернова, Лариса Плотникова — пумиськонэ вуиллям вал. Соос клубын ужамзы сярысь тодэ ваёнъёссэс вуттӥзы.