Сырьяын мемориальной пул усьтӥзы

…Улэм семья. Тыршись, ужась, эшлыко, адӟем карымон. Ваньмыз соослэн луэм, ваньмыз соослэн пӧрмем, но огпол, 90 ар талэсь азьло, соослэн улоназы кышкыт нунал вуэм — соосты раскулачить кариллям. Соосты келяны вань гурт калык лыктэм. Тросэз келясьёс бӧрдӥллям но, малы ке шуоно соослы зэмзэ но та семья жаль потэм.

Ивашовъёс нокинэ но экслуатировать карымтэзы, нокинэ обижать карымтэзы, ёрмыса улӥсь адямиослы но отказ сётымтэзы — маин быгатӥллям, юрттӥллям. Валзэс сётӥллям бакчаоссэс гырыны, секыт нуналъёсы гуртоосызлы коньдонэн но юрттӥллям. Трос ӟеч кылъёс вераны луэ та семья сярысь. Ӵапак сыӵе кылъёс верамын вал Ивашовъёс сярысь соослэн семьязылы сӥзем мемориальной пулэз усьтонлэн сӥё-дано ужрадаз, кудӥз ортчиз 12-тӥ толсуре Сырья гуртын.

Сӥё-дано ужрадэ пыриськизы Балтась ёрослэн исполнительной комитетэзлэн кивалтӥсез Айдар Хайрутдинов, Ципья гурт поселенилэн главаез Азат Нотфуллин, “Труд” обществолэн кивалтӥсез Рашид Хадиев, Ципья гурт поселениысь ветеранъёслэн огазеяськонзылэн председателез Пётр Чернов, Балтасьысь централизованной клубной системалэн кивалтӥсез Раиль Садыков, Ципья шоръёзо школалэн директорез Сайдаш Нурмиев, Ципьяысь “Калыкъёслэн эшъяськонзы” музейлэн директорез Гарифзян Галиев, Балтась ёросысь удмуртъёслэн “Кенеш” огазеяськонзылэн кивалтӥсез Ольга Миронова. Туж шумпотымон луиз, та ужрадэ Карлыганысь Михеева Евдокия Дмитриевна, озьы ик солэн нылпиосыз Надежда Иванова (Малый Карлыган), пиосыз Василий но Сергей (Карлыган), ӵыжы-выжызы Валентина Кузнецова (Малый Карлыган) пыриськизы шуыса. Самой кыдёкысез вуэм куно — Сергей Фомин — Калужской улосвылысь Обнинск городысь.

Айдар Хайретдинов, вераз, 1930-тӥ аръёсы асьме шаерамы репрессировать, раскулачить каремын вал ньыль миллионлы матын адямиос шуыса. Озьы ик со пусйиз, та туж бадӟым ыштон луиз шуыса. Кивалтӥсь озьы ик люкаськем калыклы таукаронзэ вуттыса, сырьяосты таӵе бадӟым ужрадэн ӟечкылаз но гуртын улӥсьёслы каньыл улон но ваньзэ умойзэ сӥзиз.

Та сярысь пыр-почгес «Азьлане» газетысь лыдӟыны быгатоды.