«Сюлэмлы чидамез понна тау…»

Берло дыре газетэ мӧйыос сярысь тросгес гожъяны кутскимы. Талэн валтӥсь мугез — лыдӟисьёсмес ёросысь арлыдо поколениысь адямиосын тодматон. Зэмзэ верано ке, тросэз арлыдоос верало секыт но сютэм улонзы, курадӟыса, тэльмырыса улэмзы сярысь. Та валамон но: кыӵе гуртын вордскизы ке но, ваньзылэн шуымон улон условиоссы огкадесь луиллям. Но со дыре ик кӧня мӧйы адямиен вераськид ке но, котькудӥзлэн улон историез сюлмез бугыртэ, котькудӥз выльысь но выльысь мар ке но сярысь малпаськытэ, улон шоры мукет синмын учкытэ. Вуж Турья гуртысь Августина Алдыровалэн но, ожысь но ужысь ветеранлэн, улон-вылонэз ӵапак сыӵе.

Ми куное вуыку, 89 аресъем Августина Александровна гидкуазяз бодызэ кутыса ветлэ вал. Арлыдэз шоры учкытэк, чебер куазь дыръя песянай ураме потыны тырше вылэм.

— Тани тазьы улӥсько туннэ нуналлы. Инмарлы тау, ваньмыз вань. Тазалык но тынычлык гинэ мед луоз, — пумита песянай кунооссэ но дораз пырыны ӧте. 

Алдырова (Шамаева) Августина Александровна Вуж Турья гуртысь самой арлыдо но гажамон песянайёслэн одӥгез луэ вылэм. Вордскемын со Улын Ушма гуртын 1932-тӥ арын.

— Инмар улыны сётӥз ке, вуоно аре мыным 90 арес тырмоз, — шуэ со. — Кӧня ар улӥд ке но, ваньмыз аслад. Ӝожтӥськеме ӧвӧл, улон мыным пӧртэм эскеронъёсты дасям вал ке но. Кожалод, ваньмыз умой вал кадь: анай-атай вань, сузэръёсы но выны будо. Нош собере ож кутскиз, атаймес жугиськонэ басьтӥзы… Нялтас вераса, мынам анае дышетӥсь вал, покчи классъёсысь нылпиосты дышетӥз. Улӥз но ужаз Кушкетын но, Ципьяын но, жугиськон дыръя Пор-Кутеш гуртын улӥмы. Мон семьяямы самой бадӟым нылпи вал, одӥг выны но кык сузэръёсы луизы. Атаймес жугиськонэ 1942-тӥ арын басьтӥзы. Мон ини соку школаын дышетскисько вал. Со дыре анаймы Ципьяысь редакциын ужаз. Нош атаймы оже кошкем бере, семьямы Пор-Кутеше выже. Анай гуртысь школаын ужаз, со гуртын ик берлогес кулӥз но…

Тросэзлэн эшъёсызлэн но огъёзоосызлэн кадь ик, Августиналэн но атаез ожысь берытскымтэ — ивортэк ышем. Нялтас вераса, атайзы, оже кошкытозяз, Ципья ёросысь райкомын парторг луыса ужам.

Августина аслаз тыршеменыз но кулэ карыса дышетскеменыз 8 классэз йылпумъяны быгатэ. Анаез Ципьяысь школаын ужан дыръяз нылаш но со школаын тодон-валан басьтэм, анаез Кутэшын ужакуз — Кутэш школаын дышетскем.

— Урод ӧй дышетскы. Тырши. Соку ведь али дышетскон сярысь гинэ малпаськоно ӧй вал, ужан сярысь но сюлмаськоно вал. Куддыръя урокъёс бырытэк ик ужаны мыноно луиз — колхозлы юрттоно ведь, ужасьёс ӧвӧл шуыны луэ… Соин нылпиос но кышномуртъёс — валтӥсь ужасьёс, колхозэз нуисьёс луизы. Бусые кӧня ветлӥмы; кезьыт куазен, кынмыса пудо-животъёслы сиён нуллӥмы. Тани араны потыса чиньыме сюрлоен вандӥ, али но пӧлые кырыж, — сӧсырмем чиньыез шоры учкыса вера песянай.

Но сӧсырмем чиньыез Августиналэн улоназ самой капчи адӟонъёслэн одӥгез пӧлысь луэ… Малы ке шуоно кема улытэк, солэн анаез висьыса кулэ.

— Ньыльдон аресэн кулӥз анаймы… Ми, ньыль нылпиос, асьме понна кылимы… Мон бадӟымез нылпи, сузэръёсы но выны пичиесь вал… Мыным соосты нылпи юртэ нуыса кельтоно луиз, — синкылиоссэ ватыны быгатытэк маде Августина Александровна. — Ачим гинэ тодӥсько, кыӵе секытэн мыным со малпанэ сётскиз. Сиён ӧвӧл, улон условиос начаресь... Вынме Казане дышетскыны басьтӥзы. Мон дорысен кыдёкын медаз луэ, куддыръя ке но соосты адӟыны мед быгатом шуыса, Смаиль гуртысь нылпи юртэ интыяны малпай сузэръёсме. Покчи сузэрелы Галялы вить арес гинэ вал, Эля нимо сузэры кыкетӥ классын дышетске вал ини. Эляез Смаиле басьтӥзы, нош Галяез ӧз басьтэ, со туж пичи али шуыса. Кӧня ветлӥ мон пудэн со нылпи юртэ, сузэръёсме отчы интыяны тырши, отын соос нянь ке но адӟозы шуыса… Но Галяез ӧз басьтэ. Собере нош ик Ципья районэ мыныса ёрос кивалтэтлэсь юалляськи, мар карыны луэ шуыса. Галяез лэзизы Татарстанысь мукет нылпи юртэ, Нурлатэ. Мынӥмы. Черодын пукиськом. Галя сузэры шоры учки но со мыным сокем жаль потӥз… Пичи, мусо… Кызьы мон тае татчы кельтом шуыса малпай но берен дорам вайи сузэрме. Соку Ушмаын улӥсько вал. Нош ик Ципьяе мыныса юалляськи, мар карыны луэ шуыса. РОНО-е пырыса заведующиез пӧяй. Сузэрме удмурт луэмысьтыз нылпи юртэ ӧз кельтэ шуи… Заведующий (фамилиез солэн Трофимов вал) Удмуртие путёвка сётомы шуыса вераз. Озьы тӥни, кӧня ке толэзь ортчыса, Галялы Удмуртиысь путёвка вуиз. Починкаысь Шестаков Павел нуиз сузэрме, али кадь тодӥсько, али кадь син азьын… Интыязы Галяез Удмуртиысь Люкской детдоме. Отын гумыр кариз ини со. Нош Эля сузэрме, сизьыметӥ классэ йылпумъямез бере, озьы ик Казане дышетскыны лэзизы. Тӥни озьы улэм адями мон. Сюлэмлы чидамез понна тау...», —шуэ Августина Александровна. Августина апай быгатэмезъя сузэръёсыз но выныз доры куное ветлэм. Кызьы со сузэръёсызлэсь но вынызлэсь мӧзмем, кыӵе соосты жалям, кылъёсын валэктэмез солэн туннэ нуналэ но уг луы.

1953-тӥ арын егит Августина Янгулысь больницае ужаны интыяське. Нош выныз но сузэрыз, асьсэ мылкыд каремзыя, Казане улыны кылё. Удмуртиысь сузэреныз кусыпъёссы ышиллям. Августина апай тодэ, Галя сузэрыз спорт ласянь вормонъёсы вутскем, пӧртэм ӵошатсконъёсы ветлэм шуыса гинэ.

— Мынам адӟемелы ини… Али Инмарлы тау, туж умой улӥськомы, тэльмырыса-курадӟыса ум ветлӥське, улонмы тыныч. Солы шумпотыса улыны быгатыны кулэ. Инмар сабырлыксэ мед сётоз. Утё, вордо, сюдо монэ, Инмарлы тау. Пересь муртлэн пӧртэм дырыз луэ ведь. Толон секытгес вал, туннэ яра али. Улон сыӵе, со ваньзэ возьматэ, — вера Августина апай.

1953-тӥ арысен кутскыса но пенсие потытозяз Августина Александровна Янгулысь больницаын дезинфектор луыса тырше. Ужзэ пумаз-йылаз вуттыса ужа, Казане ньыль толэзьлы дышетскыны но мынэ. 1957-тӥ арын Вуж Турья гуртэ картлы кошке.

— Соку мон общежитиын улӥ, монэ курыны но отчы лыктӥзы. Мынам нокинэ но ӧй вал ини со дыре — анай-атай кулэмын, вынме но сузэръёсме нылпи юртэ интыязы ведь. Картэ, Алдыров Серафим Михайлович, колхозын шофёр луыса ужаз. Мон татчы лыктыку, али пересь песяймы но, кузпаллэн кык сузэръёсыз но вань вал. Собыдӟа семьяын куспамы тупаса улӥмы. Улыса-улыса гинэ нимаз корка лэсьтӥмы.

Августина Александровна картлы кошкемез бере но Янгулын ужзэ азьланьтэ.

— Трос пыдын ветлӥськиз. Соку ведь нылпиос туж висё вал, пӧртэм инфекциос трос луизы. Пенсие потытозь но отын, больницаын, ужай мон. Кӧня ке дыр ӵоже санитарка но луыса ужай, дезинфекторлэн штатэз быремысь. Медсестра луыса но вить ар ӵоже тырши. Огъя вераса, кыӵе уж гинэ ӧз оске, ваньмыз борды басьтӥськи, пыр-поч быдэстыны тырши. 

Алдыровъёслэн куинь нылпиоссы вордско: Юрий, Иван но Людмила. Туннэ нуналэ песянай куать внукезлы но укмыс правнукезлы шумпотыса улэ. Жаляса верано, кузпалэз кемалась кулэм ини. Но со шоры учкытэк, Августина апай огназ ӧвӧл, со Иван пиезлэн семьяяз улэ. Татын сое туж ярато, гажало но утё.

— Инмарлы тау, мон узыр песяй. Семьяеным но мыным удалтӥз. Туж бадӟым тау шуэме потэ Иван пиелы но Тамара кенэлы. Соос монэ пичи нылпиез кадь учко, ваньмыз ласянь юртто, огнам уг кельто.   

Зэмзэ но, Августина апай туннэ нуналэ чебер но шуныт юртын пиеныз но солэн кышноеныз Тамараен туж тупаса улэ. Шӧдске, татын солы умой шуыса. 

— Пересьмон даурам мон понна талэсь но бадӟым шумпотон ӧвӧл ини, — шуэ песянай. — Самой валтӥсез, ваньзы таза мед луозы. Мон понна со самой бадӟым шуд.

Августина Александровналэн улоназ мукет ыштонъёсыз, курадӟонъёсыз медаз луэ вал ини. Соку со, зэмзэ но, самой шудо адями луысал…