Хезмәт

Балтач районы

18+
2024 - Гаилә елы
Азьлане

Сюлмыз техникаез куре вылэм...

Кыкетӥез «Яна тормышысь» механизатор, кудӥныз мон тодматски, луиз Владимир Елизарович Карабаев. Таиз но воргорон, Владислав Александрович Петров кадь ик, каньыл, лад-лад вераськеменыз шумпоттӥз.

Владимир Елизарович 1968-тӥ арын Вуж Кушкет гуртын вордскем. Кушкетын, Ӟаныын, Тюнтерын дышетскыны вутскем пиосмурт нылпи но егит дырзэ тодаз вайыса вераз: «Ми пичи луыкумы, гуртысь школа ӝуаз, соин кӧня ке дыр ӵоже, 1-тӥ но 2-тӥ классъёсын, клубын дышетскимы. 3-тӥ классэ выжеммы бере, выль школа лэсьтӥзы ни. Отын но кема ӧм дышетске — Ӟаные дышетскыны лыктӥмы. 7-тӥ классын ини милемыз Тюнтере келязы. Озьы 10 классэз йылпумъяй. Яра ай эшъёсы вань вал. Сюрес но начар вал соку. Тюнтере вуытозь оген пыдын ветлэмед ӧй потысал... Но озьы ке но ветлӥм, дышетским, визьнод басьтӥм. Нош школаез йылпумъяме бере, дышетскыны дыры ӧй вал ни». Дышетскыны пырымтэ бере, армие служить карыны кошке егит Владимир. Атаймузъеммы азьын дано ужпумзэ нырысь Оренбург улосвылын, собере Калининградын быдэстэ.  

— Армиын служить карыкум ик валай: монэ городын улыны уг кыскы, город улон — мон понна ӧвӧл. Городлэсь жадьыса бертӥ но гуртэ улыны кыли. Та сярысь огпол но ӧй жаля, — шуэ механизатор.

1988-тӥ арын армиысь бертыса, Владимир Нурмаысь СПТУ-е дышетскыны пыре — тракторен ветлыны право басьтон понна. Собере «Яна тормыш» обществое механизатор луыса ужаны но интыяське.

— Ужаны кутскем бере, кивалтӥсь 200 манет сётӥз. Соку ӧжыт уксё ӧй вал со. Со коньдонэн анайлы юрттыны быгатэмелы туж шумпотӥ. Нырысь ДТ-75 тракторен ужаны кутскиськем вал, собере бульдозер но оскизы, — маде Владимир Елизарович.

Кема аръёс ӵоже ужа со механизатор луыса. Ужзэ яратэ, рос-прос быдэстэ, но огдыре малпа ассэ мукет удысын утьыны — Кушкет гуртысь парсь фермаын кочегар луыса ужаны кутске. Со аръёссэ тодаз вайыса, Владимир Елизарович шуэ: «Кочегар луыса арен ӝыны гинэ ужай но берен техникае пукси. Уг кыскы вылэм монэ сыӵе уже, соку мон сое умой валай. Сюлэм техникаез куре вылэм. Пичиысен техника бордын луэм бере, амбарын ужаса будэм бере (атае но колхозын «Белорусэн» ужаз) астэ мукет интыужын уд но адӟиськыд, уд но тодӥськыд вылэм».

Туннэ нуналэ со малпаськытэк вераны быгатэ: куке но быръем ужез сярысь со уг жаля. Валче ужась эшъёсыныз, ӧнерчиосын, кивалтӥсеныз — Сайфетдинов Магсум Равилевичен — кусыпъёсыз умой. Уждун сётон ласянь но колхоз курламон ӧвӧл — уксё дыраз тыро, вылаз ик ю, куро, пӧртэм мукет кулэ луись арбериосты сётъяло. Сыӵе умой ужан условиос кылдытэмын ке, ужам но потэ, дыр. Механизаторлэн ужез капчи ӧвӧл ке но, Владимир Елизаровичлэн верамезъя, азьло дырен ӵошатымон ӧвӧл ини. «Али дырез азьлоеныз ӵошатыны уг луы ни, улон ласянь но, уж ласянь но. Али капчи улӥськомы, ваньмыз вань», — шуэ со. Капчи ке но, ӧвӧл ке но, ужась адями котьку ужам но ужа. Тани Владимир Елизарович но тэк пуконэз уг тоды. Зоръёс кутскон азьын  МТЗ-1221 трактореныз гырон ужъёсын вырем. Бусы дасян, усыян, куро нуллон, техникалы ремонт карон — котькыӵе ужлы усто со. Нош вордскем гуртаз кыӵе бадӟым но чебер юрт лэсьтыны быгатэм — синмаськымон! Валамон, матысь адямиосызлэн юрттэтсытэк таӵе ужын нокызьы уг луы. Ачиз но Владимир Елизарович ватытэк вера: семьяез — солэн юн осконэз но пыкетэз. Яратонзэ воргорон кыдёкысь утчамтэ, ас гуртысьтыз ик шедьтэм — Светлана Михайловна Кушкетысь покчиёзо школаын дышетэ. Кузпалъёслэн кык пиоссы вань — Станислав (туннэ нуналэ армиын служить каре) но Кирилл (школаын дышетске. Соос сяна семьяязы улэ Елизар Карабаев, Владимирлэн атаез, но Мария Карабаева, атаезлэн апаез.

— Со быдӟа мусо семьяе вань, соостэк кызьы улод? — мылкыдъёссэ вуттӥз Владимир Елизарович. — Куке дорад оскымон тылэд вань, улыны но, ужаны но капчи. Соос понна ик тыршыса улӥсько но ужасько, — йылпумъяз вераськонмес Владимир Елизарович.

 

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Вуж Кушкет адӟем карымон механизатор Карабаев

2
X