Таӵе интервью – «Азьланеын» нырысетӥзэ…

Паймытӥ-а? Ачим но паймисько.

Паймисько но уг валаськы: кызьы мынам йырам та малпан али гинэ вуэм? Малы та дырозь бамъёсам статьяосты дасясь адямиосын огпол но ӧй вераськы меда? Малы ӧй юалляськы, кызьыгес соос ужало, кыӵе шуг-секытъёсын пумисько, ӧй сёты аслэсьтым кенешъёсме...

Та янгышез тупатӥсько — ӵектӥсько тӥледлы Ольга Плотниковаен вераськонмес. Дасесь-а?

— Ӟечбур, Ольга Юрьевна! Та мон, «Азьлане» газет. Мон валасько, тон ачид дышемын адямиосын вераськыны, соослэсь интервью басьтылыны шуыса. Нош туннэ мынам аслам тыныд кӧня ке юан сётэме потэ. 90 аресъем юбилееным валче вераськонмы интыяз луоз, дыр.

— Ӟечбур, яратоно «Азьланемы»! Зэмзэ верано ке, туж тунсыко ӵектонэн вазиськид. Шумпотӥсько, 90 аръем историен гажамон газет монэным тунсыкъяське шуыса. Редакциын 15 ар ужасько ини, тонэ рос-прос тодӥсько кадь, но асэныд вераськеме ӧй вал на. Юанъёсыдлы дась! 

— Бен, кызьыгес туала дыре редакциын ужаське, вера ай? Дасо аръёс талэсь азьло кадь ик ваньмыз каньыл но огпӧртэм-а: статьяосты гожъян, вёрстка, тупатъянъёс?

— Улонлэн ритмез милемлы одӥг интыын сылыны воксё уг сёты. Дугдылытэк вылезлы дышетскиськом — тыршиськом, тон лыдӟисьёсмылы тунсыко мед луод шуыса. Ёросамы ортчись пӧртэм ужрадъёсты возьматыны турттӥськом. Выль адямиосын тодматскиськом, выль рубрикаосты малпаськом. Лыдӟисьёсын но ужаны ум вунэтӥське, тужгес подписка мынон вакытэ. Со сяна, тон тодӥськод ук, кыӵе чебер асьмелэн ёросмы, кӧня ушъямон адямиос татын уло но ужало — тынад бамъёсад ми ӵемысь соос сярысь гожъяськом. Шонерзэ верало, куддыръя вань малпам ужъёсты быдэстыны но уг луы — дыр уг тырмы. 

— Нуналлы быдэ монэным ужаны секытгес но секытгес луэ, дыр... Соин дыред уг тырмы-а?

— Озьы эн малпа. Нырысь ужаны кутскыкум, 2009-тӥ арын, мыным тонэныд зэмзэ ик секыт вал. Малы ке шуоно редакцие мон газет удыс сярысь номыр тодытэк ужаны лыктӥ. Куке но валало, тодо шуыса но ӧй оскы. Бадӟым тау шуэме потэ та ужысь усточиослы — Александр Михайлович Кунаевлы, Галина Константиновна Васильевалы, Зинаида Ивановна Гришкиналы но Любовь Пантилеймоновна Бускиналы — ас вакытаз соос мыным туж юрттӥзы газет улонэз валаны. Но ведь удмурт кылэз валам, гожъяськон правилоосты тодэм — со ӝыны уж но ӧвӧл. Быгатыны кулэ чебер но вольыт гожъяськыны, адямилы лыдӟыны тунсыко мед луоз шуыса гожъяны. Та сярысь редакциын ужась нылъёсылы но верасько. Одӥг секрет вералом-а? Тросэз гожъяськись адямиос понна кылъёслэсь предложениосты кылдытон, нош предложениослэсь текст — со туж секыт уж. Дасо аръёс ӵоже гожъяськем опытэд вань ке но. Тӥни озьы. 

Но тонэныд ужан капчиен ӧз сётскы ке но, мон тонэ котьку туж яратӥ. Азьло дырысь подшивкаосты учкылыса, тынад дано улонэныд тодматски — та тодон-валан мыным тон сярысь троссэ валаны юрттӥз.

— Озьы бере, тон подшивкаосысь мынэсьтым вуж номеръёсме адӟылӥд! Палэнысен учконо ке, туж-а мон воштӥськи?

— Кин ке, оло, малпа но, дыр, тон уд воштӥськиськы шуыса — но та нырысь учкыса гинэ озьы кадь потэ. Мон тазьы шуысал: тон арысь аре гинэ ӧвӧл, номерлы быдэ шуымон воштӥськиськод. Кемалась ортчизы дыръёс, куке статьяос гожъяськизы киын но печатласькизы машинкаын, куке туспуктӥсь корреспондентъёс курадӟизы плёночной фотоаппаратэн, нош типографиын огыр-бугыр выризы вёрсткаен ужасьёс... Туннэ ини валтӥсь юрттӥсьёсмы — компьютер, телефон но интернет. Валамон: улонлэн воштӥськонъёсыз тынад историяд но бадӟым пытьыоссэс кельтӥзы. Тон пӧртэм аръёсы пӧртэм форматэн потылӥд, бамъёсыдлэн лыдэз но вошъяськылӥз, табере кыӵе ке праздниклы сӥзем номеръёсад нырысетӥ но берпуметӥ бамъёсыд пӧртэм буёло но луыло. Быгатэммыя тыршиськом иворез выль сямен вуттыны, тунсыко но бордаз кыскись йыръянъёсты малпаны. Одӥгез гинэ уг воштӥськы: тон котьку аслад лыдӟисьёсыдлы тунсыко, пайдаё но оскымон ивор вуттылыны тыршид. 

— Али, газетэн ӵошатыса, интернетысь иворез лыдӟыны тунсыкогес шуо ук — капчигес но, чальгес но кадь, пе...

— Зэм, милемлы туала ивортодэто улонамы капчи ӧвӧл лыдӟисьёстэ возьыны быгатыны. Со понна тыршиськом соослы кельшымон, соослы тупась статьяосты дасяны. Бен, милесьтым гожъямъёсмес но интернет вотэсъёсысь шедьтыны луэ. Но тани мае эн вунэты: тынад бамъёсад ӵемысь вӧл-вӧл бадӟым статьяос печатласькомы ке, вотэсъёсы солэн кыӵе ке люкетэз гинэ пырылэ. Со сяна, интернетысь ивор огдырлы гинэ но луыны быгатэ, нош газетын со доры котьку берытскыны луэ. 

— Куддыръя тӥ мынам бамъёсам янгышъёс кельтӥськоды — кытын ке буква усьыса кыле, кытын ке запятой вунэ. Ӵем-а тыныд со понна кивалтэтэдлэсь, лыдӟисьёсылэсь йӧтэ?

— Ужасьтэм адями гинэ уг янгыша, шуо. Та веранэн асме шонере поттэме уг поты, валэктыны гинэ тыршисько. Янгышъёс пӧртэм мугъёсын кылё, ӵемгес — дыртон вакытэ, кудӥз ке ужасьмы шутэтсконын луыку яке висеменыз сэрен ужаны потымтэеныз. Бен, ми ог-огмес вошъяны тыршиськомы, но соку нагрузкамы бадӟым луэ, ужмылэн ӟечлыкез лябӟе. Критикалы ми дась — та лыдӟисьёслэн «Азьланеен» тунсыкъяськемзы сярысь вера ук. Умой пала тыршомы воштӥськыны тон понна, лыдӟисьёсмы понна. 

— Асьмеос кемалась ӵошен ини. Пӧртэм вакытъёс луизы — куддыръя тӥледлы монэным секыт вал, но ӟечез тросгес ук, озьы-а? Тӥ котьку мыным оскиды, монэ чебертыны но выльдыны тыршиды. Тӥляд тыршеменыды гинэ мон туннэ но улӥсько. Оскисько, мон но тӥледыз малы ке но дышетыны быгатӥ, шуыса. 

— Дышетӥд котькуд покчиарняез (четвергез) «яратыны» — малы ке шуоно та нуналэ ми тонэ печате келяськом (серекъя). Серекъятэк верано ке, тон милемыз нуналлы быдэ марлы ке вылезлы дышетӥськод: дырез шонер люкыны, улонлэн куронъёсыз вылэ пыкъяськыса выль условиосын ужаны, вань иворъёслы туж ӝог реагировать карыны но пыр-поч малпаськыны. Дышетӥськод ужамы пӧртэм тунсыко амалъёсты кутыны — огъя вераса, ваньзэ вераса но уд быдты. Но самой валтӥсез, малы тон милемыз дышетӥд, — ужмес яратыны. Ӵапак ваньмыз ужез яратон бордысен кутске ук. Ужез яратэмысьтымы, ми удмурт калыкез данъяны тыршиськомы, огшоры гуртын улӥсь адямиосмы сярысь гожъяськомы. 

— Мон сыӵе кылъёслы туж шумпотӥсько, тау. Улонэ тунсыко, гумыре кузь мед луысал...

— Милям оскеммы потэ, тон улод на ай шуыса. Кӧня аръёс ӵоже тон милемыз но аслэсьтыд лыдӟисьёстэ шумпоттӥськод! Тон туж кулэ, яратоно «Азьланемы»! Малпаса гинэ утьы ай: кӧня адямилы тон юрттӥд, кыӵе гинэ ужъёсты быдэстыны ӧд быгаты. Кӧня адямиос, тонэ лыдӟемзы бере, бамъёстэ утьыса возё — угось отын соос понна кулэ луись туж шуныт чуръёс вань. Соин «туала дыре газет кулэ ӧвӧл» шуисьёсты мон чик уг валаськы. Улы, яратоно газетмы! Улы! Нош ми тыныд юрттыны тыршомы.