«Таӵе ракат улонысь кошкыны дыртонэз ӧвӧл али»

Зоя Тихоновна вордскемын Вуж Кушкет гуртын.

— Секыт жугиськон аръёсы Кушкет гуртын улӥллям ӟуч но удмурт калыкъёс. Мон будӥ Тихон но Агафья Лопатинъёслэн огшоры куанер крестьян семьяязы. Ми вал куать нылпиос — ньыль нылъёс но кык пиос. Нина апае 1926-тӥ арын вордскемын (Белоруссиын улэ), Иван агае — 1928-тӥ арын (Ципья гуртын улӥз, кулэмын ини), Анна апае — 1930-тӥ арын (Челябинскын улӥз, со но кулэмын), Леонид выны вордскиз 1937-тӥ арын (Хабаровскын улӥз, кулэмын ини), Галина сузэры 1940-тӥ арын вордскиз (Набережные Челны городын улэ). Сютэм улӥмы, дӥсяны дӥськутмы но ӧй вал. Государстволы курегпуз, ыжгон, йӧл но вӧй сдавать кароно вал, милемлы нош сепарат йӧл гинэ сиыны кыле вал. Ма, соку нокинлы капчи ӧй вал ини, озьы ке но, чидамы, улыны тыршимы, — пичи дырзэ тодаз вае песянай.

Жугиськон кутскыку, Зоя апайлы укмыс арес гинэ луэ ке но, со 7 классэз йылпумъяны быгатэ. Собере Савалиысь техникуме агрономлы дышетскыны мынэ но, секыт но сютэм улонлы чидатэк, берен дораз бертэ. Иван агаез со дыре Ципьяысь МТС-ын тракторист луыса ужам бере, Зоя но отчы промкомбинатэ вуриськись луыса ужаны пыре. Отын кема уг ужа — агаез сое машина-трактор станцие учётчик карыса ужаны интыя.

— Егит дыр — со егит дыр ук ини. Сютэм, секыт вал ке но улон, кылдэмезлэсь пегӟыны уг луы. Огпол эшеным Вуж Турья гуртэ лыктӥ но Петя нимо арганчиен тодматски. Соин эшъяськимы, валче луимы. Озьы тӥни Петя но Ципьяе сапег вурись (сапожник — Н.Ж.) луыса ужаны интыяськиз. Берлогес ини семья кылдытыны мылкыд каримы, — азьланьтэ веранзэ Зоя апай.

1953-тӥ арын Зоя Тихоновна Вуж Турья гуртэ улыны лыктэ. 1954-тӥ арын егитъёс Можгаысь «Красная звезда» шуыса нимаськись заводэ ужаны интыясько. Одӥг арскын, 1955-тӥ арын, бадӟым пизы Юрий вордске. Пизылы куинь арес луыку, гуртысь секыт ивор вуэ: Пётр агайлэн анаез кулэ. Егит семья выльысь гуртэ бертыны малпа.

— Озьы тӥни гуртэ берытскимы но со дырысен кема аръёс ӵоже кыкнамы но Чапаев нимо колхозын ужамы. Петя пенсие потытозяз бригадирлэсь ужзэ быдэсъяз, нош мон куать ар ӵоже амбарын кладовщица луыса ужай, амбарез Бурнак гуртэ выжтэмзы бере пӧртэм мукет ужъёсты быдэсъяй. Со дыре ведь одӥг нунал но дорын пуконо ӧй вал, трудоденез тырмытоно вал. Чукиндэр, картофка бичано, уроно, фермаын толбыт парсьёслы картофка миськыса пӧзьтоно, нюлэскысь лыс тӥяса нуллоно вал, кусоен кӧжы, вика люкыса сётылӥзы турнаны, силос но сенаж саникен машинае но тракторе тыроно вал, эшшо кабанэ но сюроно вал… Огъя вераса, уж тырмыт луиз. Кузпалэ бригадир шуыса, мон ноку ужтэк ӧй пукы, мукет нылкышноосын валче вань ужъёсты быдэсъяй, — шуэ песянай.

Гуртэ улыны бертэмзы бере, Кокровъёслэн огез сьӧры мукетыз нылпиоссы вордско: 1959-тӥ арын Тамара, 1961-тӥ арын Иван, 1969-тӥ арын Юлия. Секыт но кылкутымон ужъёссы шоры учкытэк, нылпиоссэс пыд йылазы султытыны быгато кузпалъёс.

Пенсие потытозяз кӧня ке ар ӵоже Зоя Тихоновна Вуж Турья гуртысь школаын техничка луыса ужаны но вутске. 

— Калыкын верало ук: ву бызе — уд суты. Улон котьку азьпала мынэ, адямилы но азьпала вамыштыса мыноно. Тани мон 50 аресэн егит песяй луи — Юра пиелэн огез бӧрсьы мукетыз куинь пиосыз вордскизы. Шумпотыса нунокъёсмес вордыку, яратоно кузпалэ дырызлэсь вазь та улонысь кошкиз, — тодаз вае Пётр агайлэсь кулэмзэ Зоя апай.

Гажано песянайлэн вань нылпиосыз туннэ нуналэ семья кылдытыса уло. Ачиз песянай тани ньыльдон одӥг ар ӵоже ини Юрий пиеныз но Римма кенэныз тупаса улэ. Туннэ нуналэ со укмыс внукезлы но дас одӥг правнукезлы шумпотыны быгатэ.

— Соослэн будэмзылы, улэмзылы шумпотыса, туж умой, каньыл но ракат улонын улӥсько мон. Инмын но, музъемын но сабыр но тынӥсь улон мед луысал, курадӟонъёсты медаз адӟы вал нокин. Али дырысь лекъяськонъёс но Вылысь Инмармылэн юрттэменыз ӝоген мед дугдысалзы ини. «Жугиськон» кылэз вераны но кышкано ведь… Ма, зэмзэ вераны кулэ, государствомы ми кадь мӧйыосты уг вунэты — тылысь ветеран луисько, ческыт саламъёс вайыса лыктыло, пенсимес но дыраз дорамы вайыса сёто. Таче ракат улонысь кошкыны дыртонэз ӧвӧл али, — веранзэ йылпумъяз Зоя Тихоновна.