Татьяна Никифорова: «Кунянъёсын ужан — ачиз шумпотон»

Та дырозь ужам интыосаз но кивалтэтэз тыршись нылкышноез таукарон гожтэтъёсын пусйылэм вал ке но, туэез басьтэм гожтэтэз, малпасько, тужгес Татьяна Петровнаез шумпоттэм, дыр. Малы ке шуоно «Сурнай» обществоысь пудо утись аслэсьтыз ужзэ туж яратэ, вутскем вормонъёссэ но со ужзэ яратэменыз герӟа.

— Секыт ужъёслэсь кышкамтэысь, тыршыса, сюлэмме сётыса ужамысь вормонъёсы вутскиськем, дыр, — шуэ Татьяна Петровна. — Мон ведь туж яратӥсько кунянъёсты, соосын ужан — ачиз шумпотон ук со.

Нош сюлэмезлы матын луись ужаз интыяськытозяз кема аръёс ӵоже пӧртэм интыужъёсын ассэ утёно луэм солы.

Вордскем Татьяна Петровна Новосибирск улосвылын. Отын вить арес тырмытозяз гинэ улэм, собере соос анаенызы асьме ёросэ берытскиллям (анаез выжыезъя Вылын Ушма гуртысь луэ вылэм). Дышетске со нырысь Улын Ушма гуртысь покчиёзо школаын, собере — Покчи Лӧзя школаын. Отын 11 классэз йылпумъя. Школаез йылпумъямез бере егит ныл азьын выль сюресъёс усьтӥсько: городын студент улон, шулдыр вакытъёс, вылаз ик гуртысьтызы нылъёсынызы ӵош Казане вуриськисьёслы дышетскыны пыро. Вунэтонтэм егит дыр. Та аръёсыз сярысь Татьяна Петровна шуныт мылкыдын гинэ тодаз вайыса вераз.

— Городын кема ӧй дышетскы но кема ӧй улы — арен ӝыны гинэ. Картлы кошки но гуртэ бертӥ, — валэктэ Татьяна Петровна.

1994-тӥ арын, дышетсконзэ йылпумъям бераз, Улын Ушма гуртэ Вячеслав нимо пилы картлы бызе егит ныл. Декретэ потытозяз кӧня ке дыр ӵоже мех фабрикаын вуриськись луыса ужа. Со ик арын нырысетӥ нылпизы вордске — Кристина нылзы (туннэ нуналэ Кристина Балтасе картлы кошкыса улэ, солэн кык нылпиосыз вань ни). Декретысь потэмез бере ассэ пӧртэм удысъёсын уте Татьяна Петровна: Покчи Лӧзяысь нылпи садын сиён пӧзьтӥсьлэн юрттӥсез но луэ, собере тырше Улын Ушма гуртысь медпунктын санитарка луыса. 2005-тӥ арын кыкетӥ нылпиез, Никита пиез вордскем бере декретысь потэм бераз, ужаны интыяське Улын Ушмаысь кирпич заводэ. Татын со дас ар мында укладчица луыса ужа. Но та ужез но берпуметӥ уг луы солэн. 2013-тӥ арын кыктоосты, Миланаез но Мирославез ваемез бере, 2016-тӥ арын «Сурнай» обществое кунянъёсты сюдыны ужаны пыре. Татын ини нылкышно «ассэ» шедьтэ. Секыт ужъёслэсь но чурыт графиклэсь кышкатэк, сюлмыныз со выль ужез борды басьтӥське. Басьтӥське но кӧня ке арскын ини вормонъёсы но вутскыны быгатэ. Туннэ но, ужаны кутскем араз кадь ик, ужзэ яратэ.

— Кунянъёсы кыӵе бен мусо пото. Куд-ог ужасьёс шуо, кунянъёсын ужатозь, скал кыскисько шуыса. Нош мыным ке кылиз, кунянъёсын трослы ужаны умойгес. Скалъёс но ведь пӧртэм луо..., —  шуэ нылкышно.

Фермаысь жадьыса бертэм бераз, кышномурт дорысьтыз пудозэ но уте али. Гуртын, шуэ со, пудотэк уг луы. Нош дырез, пе, кулэ карид ке, котьку шедьтыны луэ. Сыӵе малпанъёсын но мылкыдъёсын улӥд ке, туж умой ини со. Соин, дыр, нылкышноез ужаз но, гуртаз но ярато но гажало. Тыршемзэ адӟо, кулэезъя дунъяло. Ачиз но кышномурт вормонъёсызлы шумпотыса, вылтӥяськытэк улыны быгатэ. Луэмезлы тау каре, шуг-секытъёслы уг сётскы. Котьку пальпотыса улыны тырше. Котьку таӵе ик капчи мылкыдо кыльыны сӥзиськомы тӥледлы, Татьяна Петровна!