Тодон-валанэн но опытэн вошъяськон ужрад

2019-тӥ арын Ӟаны школаын Николай Никифоровлэн юбилееныз валче бадӟым ужрад — научно-практической конференция — ортчем вал. Туэ 22-тӥ шуркынмонэ Ӟаны шоръёзо школаын ик кыкетӥез сыӵе конференция ортчиз, таяз радэ со 1-11-тӥ сӥземын вал.

Ужрадэ огъя, очной но заочной этапъёсты лыдъяса, пыриськиз 145 мурт, со асьме ёросысь, бускель Кукмор но Саба ёросъёсысь, Менделеевск, Агрыз ёросъёсысь, Удмурт Элькунысь но Марий Элысь дышетскисьёс но дышетӥсьёс.

Конференцилэн валтӥсь ужпумез — интеллектуально-творческой, научно-исследовательской уж пыр калыкъёслэсь лулчеберет мерассэз утён, анай кылъёсты азинтон мылкыдэз ӝутон, пӧртэм культураослы куспазы тупаса, огъя кыл шедьтыса, ог-огзэс гажаса но ог-огзылы юрттыса улыны луонлыкъёс кылдытон.

— Та тодон-валанэн но опытэн вошъяськон, — конференцилы мытон сётыса кутскиз веранзэ Ӟаны шоръёзо школалэн директорез Константин Грахов. — Оскисько, ужлэн бервылъёсыз ужрадэ пыриськемъёс понна пайдаё луозы но вань ӵектонъёс практической ужын кутӥськозы шуыса, — вераз со.

— Та туж бадӟым уж, туж ушъямон, школа аслэсьтыз дышетскисьсэ уг вунэты шуыса. Туэяз конференциын озьы ик функциональной грамотность темалы саклык висъямын. Вераны кулэ, туннэ нуналэ та туж актуальной ужпум, — пусйиз ёросысь дышетонъя управленилэн кивалтӥсезлэн учебно-методической ужъёсъя воштӥсез Хайруллина Рамзия Рафхатовна.

Конференцилэн ужез ньыль секцилы люкемын вал. Кыкез соос пӧлысь заочной этапен ортчиллям. Одӥгез секция 1-4-тӥ классъёсын дышетскисьёс пӧлын радъяськем но «Чеберлыко лыдӟон» шуыса нимаськем. Со видео амалэн ортчем, нылпиос удмурт литератураысь классикъёслэсь вордскем шаерлы сӥзем лирической кылбуръёссэс лыдӟиллям. Та тужгес бадӟым секция луэм, отчы покчи классъёсын дышетскись пиналъёслэсь 75 уж вуэм. Вормисьёсты котькуд классъя 1-тӥ, 2-тӥ но 3-тӥ степенё дипломъёсын пусйизы.

Кыкетӥез заочной секция нылпиослэн литературая творчествозылы сӥземын луэм. Татчы пиналъёслэсь удмурт, ӟуч но бигер кылын поэзияя но прозая авторской ужъёссэс кутӥллям. Шумпотымон, та секцие пыриськыны мылкыд карисьёс но шӧдскымон трос луиллям. Пусйыны кулэ, заочной секциослэн ужаз пыриськемъёс пӧлын туж трос Удмуртиысь пиналъёс, Кез, Кизнер, Шаркан, Вавож ёросъёсысь, озьы ик Кукмор, Саба, Агрыз но Менделеевск ёросъёсысь нылъёс но пиос. Та шумпотымон. Ӟаны, Ципья но Покчи Лӧзя удмурт этнокультурной компонентэн школаос сяна, конференцилэн ужаз ёросысь Балтась, Сосна, Нуринер, Бурбаш, Нурма школаослэн пыриськемзы но шумпоттэ.

Очной амалэн но кык секциос ужазы. Одӥгез нылпиос понна секция вал. Со ортчиз ZOOM форматын. Отчы пыриськизы Удмуртиысь Игра ёросысь но Татарстанысь Агрыз но Кукмор ёросъёсысь пиналъёс.

Бадӟым тунсыкъяськон кылдытӥз дышетӥсьёс понна радъям секция. Та секциын дышетӥсьёс асьсэлэн тунсыко туала амалъёсты кутыса ужамзы сярысьверазы но уж вылын возьматӥзы. Вань дышетӥсьёс нылпиослэсь функциональной грамотностьсэс кылдытон понна ужазы кутэм амалъёссы сярысь мадизы. Функциональной грамотность — со басьтэм тодон-валанъёсты, быгатонлыкъёсты пӧртэм удысысь ужпумъёсты быдэстон понна кутон. Туала нылпиосты тунсыкъяськытон понна — туж пайдаё амал.

Ужам бере, шулдыръяськыны но луэ. Секциослэн ужзы йылпумъяськем бере, конференцилэсь куноосэ «Шулдыръяськон корка» вите вал. Удмурт калык кырӟанъёс но эктонъёс эшшо но мылкыдэз ӝутӥзы. Азинтӥськиз ужрад Николай Михайлович Никифоровлы сӥзем литературной гостинойын. Ужрадэ пыриськемъёс, куноос аспалмес, солэсь улон сюрессэ, творчествозэ тодэ вайизы, кылбуръёссэ кылзӥзы. Йылпумъяськиз конференция шулдыр мылкыдъёсын — секциослэн ужазы вормемъёсты дипломъёсын пусъёнэн.